LUKA 2:21-39

  • YESU NAVAMUJIHANA NAKUMUTWALA KUTEMBELE

Yosefwe naMaliya vasalile kuMbetelema muchishishisa chakukinduluka kuNazaleta. Omu Yesu apwile namakumbi akusemuka 8, vamujihanyine kweseka naJishimbi jaKalunga jize ahanyine vaIsalele. (VyavaLevi 12:2, 3) Kaha nawa kweseka nachisemwa chavaIsalele, halikumbi kana hakiko valukilenga vakemba vamalunga majina. Ngachize vaYosefwe naMaliya valukile mwanavo ngwavo Yesu, nge muze avalwezele kangelo Ngavalyele.

Mwahichile kafwe kakweji wamuundu namakumbi, kaha Yesu apwile jino namakumbi akusemuka 40. Uno visemi jenyi vamutwalile kulihi? Vamutwalile kutembele muYelusalema, yize yapwile kwakamwihi nakuze vapwile nakutwama. Kweseka naJishimbi, pwevo atelelele kuhana wana wakulitomesa mutembele hanyima yamakumbi 40 kufuma hakusema mwana walunga.—VyavaLevi 12:4-7.

Omu mukiko alingile Maliya. Ahanyine wana watujila vavandende vavali. Echi chasolwele nge Yosefwe naMaliya vapwile vaka-kukalikiza. Jishimbi jaMose javulukile nge vatu vatelelele kuhana mwanamukoko nakajila. Oloze nge pwevo kahashile kuhana wana kanouko, kaha atelelele kuhana tukwilimba vavali chipwe tutela vavali. Ngocho Maliya kahashile kuhana mwanamukoko nakajilako, shikaho ahanyinyine wana watujila vavandende vavali.

Omu vahetele hatembele, kashinakaji umwe walunga ejile kuli Yosefwe naMaliya. Lijina lyenyi ikiye Shimeyone. Kalunga amulwezele ngwenyi keshi kukafwa chakuzeneka kumona Kulishitu, chipwe ngwetu Meshiya uze vashikileko. Jino halikumbi kaneli, Shimeyone vamutwaminyinyine kuli shipilitu yajila ayenga kutembele kuze akawanyine Yosefwe naMaliya namwanavo. Shimeyone atambwile uze mwana nakumusata hamavoko enyi.

Shimbu asachile Yesu, Shimeyone asakwililile Kalunga ngwenyi: “Ove Mwata Wakulitulaho, unasuula jino ami ndungo yove nguyenga mukuunda kweseka namazu ove, mwomwo meso ami anamono lyehi jila naukanehelamo ulwilo wove yize unalongesa lyehi kumeso avatu vosena, unapu mumunyi wakufumisa chiwuva hali vaka-mafuchi, kaha nawa hiupahu wavatu jove vaIsalele.”—Luka 2:29-32.

Yosefwe naMaliya valikomokelele hakwivwa vyumevi. Shimeyone avakiswile, kaha ambile kuli Maliya ngwenyi, mwanenyi “vanamutongola mangana akalingise vatu vavavulu muIsalele vakalimbuke nakuvakatula cheka,” kaha nawa ngwenyi mwakevwa chinyengo chikuma kwijiva nge poko yamukwale yakuvambuka yinamutuvasana.—Luka 2:34.

Halwola kanelu, hatembele hapwile nawa mutu weka. Mutu kana shina Ana, kapolofweto wamyaka yakusemuka 84. Ou kashinakaji ayilenga lwola lwosena kutembele. Jino apandamine kuli Yosefwe, naMaliya namwanavo Yesu. Ana aputukile kusakwilila Kalunga nakulweza vatu vyaYesu.

Achishinganyekenu ocho kuwaha vevwile vaYosefwe naMaliya havyuma vyosenevi vyalingiwile hatembele. Chikupu vene vyuma kanevi vyasolwele nge mwanavo apwile Uze Vashikile kuli Kalunga.