MATEU 12:9-14 MAKO 3:1-6 LUKA 6:6-11

  • YESU MWOKA LIVOKO LYAMUTU HASAMBATA

HaSambata yikwavo, Yesu engilile musunangonga, pamo yize yamuNgalileya. Akawanyine lunga wakusoseka livoko lyachilyo. (Luka 6:6) Vaka-kusoneka navaFwaliseu vapwile nakushishika Yesu vamone numba nge mwamuka. Mwomwo ika? Vasolwele vyapwile mumichima yavo hakuhulisa ngwavo: “Uno vachitavisa kuka mutu haSambata tahi?”—Mateu 12:10.

Vatwamina vamukwitava chavaYuleya vafwelelele ngwavo, haSambata vatu vatelelele kuka kaha vatu vaze vapwile muponde yayinene. Chakutalilaho, vambilenga ngwavo kavetavisa haSambata kwolola chipwe kukasa chilyo chamujimba chize chinachingunukako. Shikaho ava vaka-kusoneka navaFwaliseu kavahulishile Yesu mwomwo yakwivwila keke uze lunga apwile nakuyandako, oloze vasakile kaha kuwanyina Yesu mulonga.

Oloze Yesu ejivile vishinganyeka vyavo vyakuhenga. Kaha ejivile ngwenyi jila vamwenenenemo lushimbi lwakukanyisa kuzata haSambata yapwile yakuhenga, kaha nawa yalimbalaka navisoneka. (Kulovoka 20:8-10) Halwola kana te namono lyehi omu vasakile kumuwanyina milonga hakuzata milimo yamwaza. Jino Yesu avakomwesele chikuma hakulweza uze lunga wakusoseka livoko ngwenyi: “Katuka, twaya hakachi.”—Mako 3:3.

Yesu alumukile nakutala vaka-kusoneka navaFwaliseu, nakwamba ngwenyi: “Mutu muka hali enu ali namukoko umwe, kaha kachi nge mukoko kana mwaholokela muwina haSambata, mwazeneka kumukwata nakumufumisamo?” (Mateu 12:11) Hakuwana nge mikoko vavamwene kupwa hiluheto, ngocho kavavasezele muwina kuheta nakulikumbi lyakavangijilehoko kuchina navaviza chipwe kufwa. Visoneka vyamba nawa ngwavyo: “Muka-kwoloka eji kuzakamanga vimuna jenyi.”—Vishimo 12:10.

Yesu atwalileho kuhanjika ngwenyi: “Mutu alema chikuma kuhambakana mukoko. Ngocho vachitavisa kulinga chuma chamwenemwene haSambata.” (Mateu 12:12) Ngachize, Yesu kahokwele lushimbi lwaSambata hakuka uze lungako. Vatwamina vamukwitava vosena vahonene kuhamika vishinganyeka vyenyi vyamwaza vyakeke. Vaholele kaha kulu.

Yesu avatalile namatoto havishinganyeka vyavo vyavipi. Jino ambile kuli uze lunga ngwenyi: “Olola livoko lyove.” (Mateu 12:13) Uze lunga olwele livoko lyenyi, kaha lyapwile lyalambwe. Uze lunga awahililile chikuma. Uno vaze vaka-kole jaYesu vevwile ngachilihi kumuchima?

Muchishishisa chakuwahilila hakumona livoko lyayou lunga lyalambwe, vaFwaliseu valovokele nakumutwama punga “nalizavu lyavatu jaHelote mangana ngwavo vamujihe.” (Mako 3:6) Halizavu kana hapwile navaka-kwitava vavaSatuse. Lwola lwosena vaSatuse navaFwaliseu kavalinwishilenga meyako, oloze halwola kanelu valinungile hamwe nakufumbukila Yesu.