MATEU 12:15-21 MAKO 3:7-12

  • MAYONGOMENA NAWASHINDAKANYA YESU

  • MWATESAMO UPOLOFWETO WAISAYA

Omu Yesu ejivile ngwenyi vaFwaliseu navaka-kukavangiza Helote vanakutonda kumujiha, Yesu natumbaji twenyi vakatukile nakuya kuKalungalwiji waNgalileya. Kuli ikiye kwejile mayongomena avatu kufuma kuNgalileya, nakujinganda jamuTule, naShitone, nakumusamuko waKalwiji Yotau, nakuYelusalema, nakusulo yaIndumeya. Yesu okile vaka-kuviza vavavulu. Ngocho vaze vapwile namisongo yayinene valishinjejekele vayenga kuli ikiye. Muchishishisa chakuvandamina ikiye avakwate, ava vatu valishinjejekele nakuya kuli ikiye mangana vamukwate.—Mako 3:9, 10.

Hakutohwa chalizavu, Yesu alwezele tumbaji twenyi vamunehele wato afume hatunda mangana vahone kumushindakanya. Kaha nawa avanangule oku ali muwato chipwe kuya kuchihela cheka mangana akafwe veka kungenge yachijiva.

Kambaji Mateu ambile ngwenyi milimo yaYesu yateselemo “mazu vahanjikile kuhichila muli kapolofweto Isaya.” (Mateu 12:17) Upolofweto muka waIsaya ateselemo Yesu?

“Talenu! Ngamba yami ou ngwasakwile, ou ngwazanga, ou ngweji kwivwilanga kuwaha. Nangukamuhana shipilitu yami, kaha mwakasolola muchapwa chiyulo chakwoloka kuli vaka-mafuchi. Keshi kukakokojola, chipwe kukateta mitetoko, chipwe mutu kwivwa lizu lyenyi mujijilako. Keshi kukachika lihongo lyakufunyukako, keshi kukajima wanda uze uli nakufwinda wishiko, palanga nomu mwakaneha chiyulo chakwoloka. Chikupu vene, lutalililo lwavaka-mafuchi nalukapendamina halijina lyenyi.”—Mateu 12:18-21; Isaya 42:1-4.

Chapundu vene, Yesu ikiye ngamba yaKalunga vazanga uze evwila kuwaha. Ikiye asolola chiyulo chakwoloka, chize vahona kusolola vatwamina vamukwitava chamakuli. VaFwaliseu kavapwilenga nakukafwa vaveji haSambatako, mwomwo yakuzachisa Jishimbi jaKalunga mujila yakuhenga. Hakusolola chiyulo chaKalunga nakusolola nawa nge shipilitu yaKalunga yili hali ikiye, Yesu asokwele vatu muvisemwa vyavipi. Evi vikiko vyalingishile vatwamina vamukwitava vasake kumujiha. Vishinganyeka kana omu vyapihya!

Uno mazu akwamba ngwavo keshi “kukakokojola, chipwe kukateta mitetoko, chipwe mutu kwivwa lizu lyenyi mujijilako” alumbununa ika? Yesu ketavishilenga vatu okilenga, chipwe vandemone ‘vamujimbule kuvatuko.’ (Mako 3:12)  Kasakile vatu vamutachikize hakumuvilika mumikwakwa chipwe kumijimbu yalingwavoko.

Yesu ambulwilenga mujimbu wenyi wakuvendejeka kuli vatu vaze natufwanyisa kulihongo lyakufunyuka linahenge lize vanalyatangila. Vapwile nge wanda uze uli nakufwinda wishi uze kalinwomu ujime. Yesu kahokwele eli lihongo lyakufunyuka chipwe kujima wanda ou unakufwinda wishiko. Oloze hakeke nazangi yenyi, akolezezele ava vatu vavavwovu. Muchano vene, Yesu himutu navakawanyina vaka-mafuchi lutalililo.