MATEU 12:1-8 MAKO 2:23-28 LUKA 6:1-5

  • TUMBAJI NAVAHELA TILIKU HASAMBATA

  • IKIYE “MWATA WASAMBATA”

Yesu natumbaji twenyi vapwile nakuya kuNgalileya. Lwola kana lwapwile kuchivatuko chavula, ngocho mumande mwapwile tiliku. Hakwivwa zala, ava tumbaji vahelele tumitwe twatiliku nakulya. Likumbi kana lyapwile lyaSambata, kaha vaFwaliseu vavamwene.

Munahase kwanuka ngwenu vaYuleya vamwe vasakile kujiha Yesu muYelusalema hakumuvangijikila ngwavo najilulula Sambata. Halwola kanelu vaFwaliseu vasakile kuwanyina mulonga tumbaji havyuma valingile. Vambile ngwavo: “Tala! Tumbaji twove vali nakulinga chuma chize kavetavisa kulinga haSambatako.”—Mateu 12:2.

VaFwaliseu vambile ngwavo kuhela tumitwe twatiliku nakututaka mumavoko nakulya chapwile hikuzata mulimo wakwaha nakuzungula. (Kulovoka 34:21) Kukaluwisa lushimbi lwakujilila Sambata chalingishile vatu chivakaluhwile kukavangiza lushimbi kana, okunyi te likumbi kana lyatelele kujikijisa vatu kushipilitu nakuvalingisa vapwenga vakuwahilila. Shikaho, Yesu azachishile vyakutalilaho vyakusolola nge Yehova Kalunga kasakile Jishimbi jenyi jaSambata jipwenga ngochoko.

Chakutalilaho chimwe azachishile Yesu shina chaNdavichi navatu jenyi. Omu vevwile zala, vengilile mutavanaku nakulya jimbolo jakutumbika kumeso aKalunga. Jimbolo kana te vanajifumisa lyehi kumeso aYehova nakushishisako jeka, ngachize vajihanyinenga vapilishitu vajilye. Ngocho Ndavichi navatu jenyi kavavahanyine mulonga hakujilyako, mwomwo vapwile nazala.—VyavaLevi 24:5-9; Samwele 1, 21:1-6.

Yesu avahanyine chakutalilaho chikwavo ngwenyi: “Kanda mutangengaho lyehi muJishimbi  ngwavo, hajiSambata vapilishitu mutembele veji kujilululanga Sambata, oloze kaveshi kupwa namulongako nyi?” Ahanjikile mazu awa mwomwo nahaSambata vapilishitu vajihilenga tunyama nakulinga milimo yeka yamutembele hakuwahisa vimuna vakuvatula. Yesu ambile ngwenyi: “Oloze nangumilweza ngwami, hano hali ou ahambakana tembele.”—Mateu 12:5, 6; Kulava 28:9.

Yesu azachishile nawa Visoneka hakushindakanya chishina chenyi, ngwenyi: “Kachi nge mwatachikizanga mwalumbunukila mazu awa ngwavo, ‘Ami ngunasake keke keshi vimuna vakuvatulako,’ kachi kamwahanyine mulonga vatu ava vakuzeneka mulongako.” Jino akukulwile ngwenyi: “Mwomwo Mwanamutu ikiye Mwata waSambata.” Yesu apwile nakwinyikila kukuunda nachikapwa muchiyulo chenyi chaWangana chamyaka likombakaji.—Mateu 12:7, 8; Hozeya 6:6.

Vatu vanayande muundungo waSatana hamyaka yayivulu hakumona ulyanyi najijita. Oloze muSambata yayinene yize nayikapwako omu Kulishitu mwakayula, vatu kaveshi kukamonanga cheka ukaluko.