MATEU 21:28-46 MAKO 12:1-12 LUKA 20:9-19

  • CHIFWANYISA CHAVANA VAMALUNGA VAVALI

  • CHIFWANYISA CHAVAKA-KULIMA MUWANDE WAMIVINYO

Omu Yesu apwile kutembele, akumbulwile vapilishitu vavakulwane navakulwane javatu vaze vamuhulishile vatachikize ngolo apwile nakuzachisa hakulinga vyuma vyakukomwesa. Vyuma avakumbulwile Yesu vyavalingishile vahone mwakumukumbulwila. Kaha ahanjikile chifwanyisa chize chasolwele hatoma vilinga vyavo.

Yesu ambile ngwenyi: “Lunga umwe apwile navana venyi vavali. Ayile kuli uze wakulivanga nakwamba ngwenyi, ‘Ove mwanami, lelo yako ukazate muwande wamivinyo.’ Ikiye akumbulwile ngwenyi, ‘Kangweshi kuyako.’ Oloze hakukuminyina alumwine muchima wenyi, kaha ayile. Ayile nawa kuli uze wamuchivali nakwamba mwomumwe. Ikiye akumbulwile ngwenyi, ‘Nanguya tata,’ oloze kayileko. Hali ava vavali, ulihi alingile mwayile muchima waise?” (Mateu 21:28-31) Uze mwana wakulivanga ikiye alingile mwayile muchima waise.

Ngocho Yesu ambile kuli vaka-kole jenyi ngwenyi: “Chamuchano vene nangwamba kuli enu ngwami, vaka-kutambula mitelo navaka-ujila navalivanga kwingila muWangana waKalunga.” Hakavanga, vaka-kutambula mitelo navaka-ujila kavazachililenga Kalungako. Ngana mwauze mwana wakulivanga, vapihililile nakwalumuka, nakuputuka jino kumuzachila. Oloze vatwamina vamukwitava vapwile nge uze mwana wamuchivali, valisolwele nge vazachililenga Kalunga oloze kavalingilenga ngochoko. Kaha Yesu ambile ngwenyi: “Yowano [Muka-kumbapachisa] ejile kuli enu mujila yakwoloka, oloze enu kamwamwitavilileko. Oloze vaka-kutambula mitelo navaka-ujila vamwitavilile. Kahenu numba tuhu mwamwene chuma kanechi, kamwalumwine michima yenu mangana mumwitavileko.”—Mateu 21:31, 32.

Yesu ahanjikile chifwanyisa chikwavo. Muchifwanyisa kana Yesu asolwele nge vatwamina vamukwitava kavakanyine kaha kuzachila Kalungako, oloze vapwile nawa vatu vakuhuka. Yesu ambile ngwenyi: “Mutu umwe atumbile wande wamivinyo nakushitako chipato che ndo. Afulilemo chikamwino chavinyo nakutungamo kaposhi. Auhanyine vaka-kulima, kaha ayile kulifuchi lyeka. Omu yahetele ngonde yakwaha mihako, atumine ndungo yenyi kuli vaze vaka-kulima mangana akamutambwile mihako yimwe yamuwande kuli vakiko. Oloze vamukwachile, vamuvetele nakumuhilwisa mavokovoko. Kaha atumine cheka ndungo mukwavo kuli vakiko, oloze naikiye vamuvetele kumutwe nakumusaula. Jino atumine weka nawa, oloze vamujihile. Atumine nawa vandungo jenyi veka vavavulu, vamwe vavavetele, vamwe vavajihile.”—Mako 12:1-5.

Uno vatu vaze vapwile nakwivwilila kuli Yesu vevwishishile chifwanyisa kana tahi? Pamo vanukile mazu ahanjikile Isaya, ngwenyi: “Wande wamivinyo waYehova wamayongomena yikiko zuvo yaIsalele, kaha vatu vamuYuta vanapu wande uze azangile. Atalililile chiyulo chakwoloka, oloze kwapwile chiyulo chakuhenga.” (Isaya 5:7) Awa mazu alifwana nachifwanyisa ahanjikile Yesu. Mwenyawande apwile Yehova, kaha wande wamivinyo wapwile muyachi waIsalele, uze vajingilikile chipato, kulumbununa Jishimbi jaKalunga jize javakingile. Yehova atumine vapolofweto jenyi mangana vanangule vatu nakuvakafwa vemenga mihako yamwaza.

Oloze “vaka-kulima” vayanjishilenga nakujiha “vandungo” vaze atumine kuli vakiko. Ngocho Yesu ambile ngwenyi: “[Mwenyawande wamivinyo] asalile naumwe kaha, mwanenyi azanga. Ngocho amutumine kuli vakiko nakwamba ngwenyi, ‘Mwanaminyi navakamuvumbika.’ Oloze vaze vaka-kulima valihanjikishile mwavomwavo ngwavo, ‘Ou ikiye swana. Twayenu tumujihe, kaha uswana naupwa wetu.’ Ngocho vamukwachile, vamujihile.”—Mako 12:6-8.

Jino Yesu ahulishile ngwenyi: “Uze mwenyawande wamivinyo mwakavalinga muka?” (Mako 12:9) Vatwamina vamukwitava vamukumbulwile ngwavo: “Hakuwana nge vatu kana vavapi, mwakavanongesa mwamupi nakuhana uze wande wamivinyo kuli vaka-kulima veka vaze navakamuhananga mihako hangonde yakwaha.”—Mateu 21:41.

Ngocho valisopesele vavene chakuzeneka kutachikiza,  mwomwo vapwile “vaka-kulima” “muwande wamivinyo” waYehova, uze wapwile muyachi waIsalele. Yehova afwelelele kumona mihako kuli vaka-kulima, yakufwana nge kufwelela Mwanenyi Meshiya. Yesu atalile vatwamina vamukwitava swi, kaha avambile ngwenyi: “Uno kanda mutangengaho lyehi chisoneka chino ngwavo: ‘Lilolwa lize vakanyine vaka-kutunga linapu jino lilolwa lyalinene lyamumbango, Yehova ikiye nachilingisa chipwenga ngocho, kaha chinapu chakukomwesa kumeso etu’ nyi?” (Mako 12:10, 11) Jino Yesu ashindakanyine chishina echi ngwenyi: “Shikaho nguli nakwambila kuli enu ngwami, Wangana waKalunga navakamitambulawo nakukauhana kumuyachi uze naukalovolanga mihako yawo.”—Mateu 21:43.

Vaka-kusoneka navapilishitu vavakulwane vatachikijile ngwavo Yesu ahanjikile ‘chifwanyisa kanechi kutalisa kuli vakiko.’ (Luka 20:19) Aha jino hakiko vasakile chikuma kumujiha ou “swana.” Oloze vevwile woma mayongomena aze amwene Yesu kupwa kapolofweto, shikaho kavahashile kumujiha hahaze veneko.