Omu vakwachile Yesu mumilemba yaNgetesemane, vaposetolo jenyi vevwile woma kaha vachinyine. Oloze vaposetolo vavali kavachinyine nakuya kwakusukuko. Vaposetolo kana vapwile vaPetulu “nakambaji weka,” pamo kaposetolo Yowano. (Yowano 18:15; 19:35; 21:24) Kaha vawanyine Yesu pamo omu vapwile nakumutwala kuzuvo yaAnase. Omu Anase atumine Yesu kuli Kapilishitu Wakulitulaho Kayafwase, Petulu naYowano vakavangijile munyima. Vevwile chikuma woma mwomwo valizakaminyine havyuma vinahase kusoloka kuli vakiko nakuli Mwata wavo.

Hakuwana nge Yowano vamutachikijile kuli kapilishitu wakulitulaho, ngocho ahashile kwingila muchipango chakuzuvo yaKayafwase. Oloze Petulu asalile haweluka palanga nomu akindulukile Yowano nakuhanjika kuli ngamba wapwevo uze apwile nakulama chikolo. Kaha Petulu vamwitavishile kwingila.

Ufuku kanou kwapwile chishika chikuma, ngocho vaze vapwile muchipango vawikile kakahya mangana votenga. Petulu atwamine navaze vapwile nakwota kakahya nakuvandamina “amone vyuma navisoloka” kuli Yesu. (Mateu 26:58) Jino uze mwanapwevo alaminenga kuchikolo, uze nawa etavishile Petulu kwingila, amumwene kanawa mwomwo kwapwile milangi yakakahya. Ambile ngwenyi: “Ngwetu nayove ukambaji kayou mutu, nyi mweka?” (Yowano 18:17) Kaha navatu vavavulu vamutachikijile Petulu ngwavo apwile nakutambuka naYesu.—Mateu 26:69, 71-73; Mako 14:70.

Chuma kana chevwishile Petulu kupihya. Kaha kasakile vatu vamutachikizeko, ngocho aputukile kuhiluka ufuchanyima kuchikolo. Akanyine ngwenyi kapwile hamwe naYesuko hakwamba ngwenyi: “Ami kangwamutachikizako, kaha ovyo uli nakuhanjika nawa kavyangulumbunukilileko.” (Mako 14:67, 68) Aputukile “kulyangula nakulishinga,” kulumbununa nge apwile nakusaka kulishinga mangana asolole nge mazu ahanjikile amuchano nakwitavila kumona ukalu kachi nge vyuma nahanjika keshi vyamuchanoko.—Mateu 26:74.

Chasoloka nge halwola kana chihande chaYesu chapwile nakutwalaho lika muchipango chazuvo yaKayafwase. Petulu navakwavo veka vaze vapwile nakuvandamina, vahashile kumona vinjiho vavavulu vaze vapwile nakwingila nakulovoka.

Mujila ahanjikililengamo Petulu yamusolwele nge apwile muka-Ngalileya, ngocho mazu ahanjikile akwamba ngwenyi katachikijile Yesuko apwile amakuli. Kaha Malaku uze vatetele litwitwi kuli Petulu apwile nakausoko kenyi uze apwile haze halizavu. Ngocho uze lunga atachikijile Petulu, nakwamba ngwenyi: “Kumana kangwakumonanga nenyi hamwe mumilembako nyi?” Omu Petulu akanyine kamuchitatu, ndemba atambikile ngana muze ambile Yesu.—Yowano 13:38; 18:26, 27.

Halwola kana chasolokele nge Yesu apwile helu oku natale muchipango. Kaha Mwata alumukile nakutala Petulu, ngocho Petulu evwile kukola kumuchima. Anukile mazu ahanjikile Yesu halikumbi lize vapwile mukapete kahelu. Achishinganyekenu omu Petulu evwile kumuchima wenyi hakwanuka vyuma alingile! Petulu alovokele haweluka wachipango nakulila chikuma.—Luka 22:61, 62.

Mwomwo ika chuma kana chasolokelele? Mwomwo ika Petulu uze asolokele nge wakuhya kushipilitu nakupwa wakushishika akanyinyine Mwata wenyi? Muchano vautanganyishile, kaha Yesu nawa vamumwene kupwa hichihwanga wamunene. Petulu atelele kuhakwila ou mutu wakuzeneka chuma chakumuhanyina mulonga, oloze akanyine mutu uze atwama “namazu akuyoya chahaya myaka yosena.”—Yowano 6:68.

Vyuma vyasolokelele Petulu vyasolola nge namutu walufwelelo, wakulihana nahase kulimbenja nge kaliwahishile kanawa havyeseko vinahase kusoloka kulutweko. Vyuma kanevi ahichilemo Petulu vyatela kunangula vangamba jaKalunga vosena chishina chachilemu.