WAVAKA-KOLINDE 1, 15:24-28

  • VYUMA NAVIKASOLOKA KULI MIKOKO NAVAPEMBE

  • VATU VAVAVULU NAVAKALIVWISA KUWAHA PALACHISE YAHANO HAMAVU

  • YESU IKIYE JILA, IKIYE MUCHANO, IKIYE KUYOYA

Omu Yesu vamumbapachishile, alihumanganyine namuka-kole uze asakile kumutangula ahone kuputuka kuzata mulimo wenyi. Eyo, Liyavolo esekele Yesu mapapa kakavulu. Kutwala muze, Yesu ahanjikile vyakutalisa kuli uze muka-kuhuka ngwenyi: “Muka-kuyula kano kaye ali nakwiza, kaha keshi nangolo hali amiko.”—Yowano 14:30.

Kaposetolo Yowano vamumwenesele vyuma vyapwile kulutwe kutalisa kuli uze ‘chazangombe wamunene, linoka wakushikulu, uze vavuluka ngwavo Liyavolo kaha nawa Satana.’ Ou muka-kole wavatu wamupi vamumbilile hano hamavu, kaha “ali namatoto amanene, mwomwo natachikiza ngwenyi ali kaha nakashimbu kakandende.” (Kusoloka 12:9, 12) Vaka-Kulishitu vosena vatela kufwelela ngwavo vali nakuyoyela muli kaze “kashimbu kakandende.” Kalinwomu “uze chazangombe, uze linoka wakushikulu” vamukase hamyaka 1,000, kaha keshi kukahungumwisa cheka vatu halwola mwakayula Yesu muWangana waKalungako.—Kusoloka 20:1, 2.

Vyuma muka navikasoloka hano hamavu halwola luze? Veya navakatwama hano hamavu, kaha navakatwama ngachilihi? Yesu ivene akumbulwile vihula kanevi. Muchifwanyisa ahanjikile chamikoko navapembe, Yesu avulukile vyuma vize vali nakuvandamina vatu vakwoloka vaze vemanyinako mikoko, vaze nawa veji kulyonononanga kuli vandumbu jaYesu nakuvalingila vyuma vyamwaza. Yesu nawa avulukile vyuma vize vili nakuvandamina vaka-kuhuka vaze vemanyinako vapembe. Ambile ngwenyi: “Ava [vapembe] navakavatetako haya myaka yosena, oloze vaka-kwoloka navakatambula kuyoya chahaya myaka yosena.”—Mateu 25:46.

Echi nachitukafwa twivwishise mazu ahanjikile Yesu kuli uze chihwanga vamupapalilile nenyi hamwe. Yesu kafwelelesele uze lunga fweto yize ashikile vaposetolo jenyi vakushishika yakukapwa hamwe naikiye muWangana wameluko. Oloze ashikile uze muka-kuhuka apihililile nakwalumuka ngwenyi: “Chamuchano vene nangukulweza lelo lino ngwami,  naukapwa nayami muPalachise.” (Luka 23:43) Shikaho uze lunga vamufwelelesele kukatambula fweto yakukatwama muPalachise, milemba yamwaza. Chikupu vene, vatu vosena vaze vanakulisolola kupwa nge mikoko makumbi ano nakukapwa “[na]kuyoya chahaya myaka yosena,” navakiko navakapwa muze muPalachise.

Vyuma kana vyalitombola navize ahanjikile kaposetolo Yowano vize navikasoloka hano hamavu. Ambile ngwenyi: “Mbalaka yaKalunga yili navatu hamwe, kaha mwakatwamanga navo, vakiko navakapwanga vatu jenyi. Kaha ivene Kalunga mwakapwanga navakiko hamwe. Mwakahunda masoji osena kumeso avo, kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako. Vyuma vyakulivanga vinafumuko lyehi.”—Kusoloka 21:3, 4.

Uze chihwanga vatela kukamusangula kuvafu numbanyi akalivwise kuwaha kuyoya chahaya myaka yosena muPalachise. Keshi nge ikiye kaha navakasangulako. Yesu asolwele hatoma chuma kana hakwamba ngwenyi: “Ola yili nakwiza omu vosena vaze vali muvimbumbe navakevwa lizu lyenyi nakulovokamo, vaze valingile vyuma vyamwaza navakasangukila kukuyoya, kaha vaze valingile vyuma vyaunyengwe navakasangukila kukuvasopesa.”—Yowano 5:28, 29.

Nyi ngachilihi vaposetolo vakushishika nalizavu lyavatu vavandende vaze navakapwa naYesu mwilu? Mbimbiliya yamba ngwayo: “Navakapwanga vapilishitu jaKalunga naKulishitu, kaha navakapwanga vamyangana nakuyula naikiye hamwe hamyaka 1,000.” (Kusoloka 20:6) Ngocho vaze navakayula hamwe naKulishitu vatela kupwa malunga namapwevo vaze vanayoyelanga hano hamavu. Vatu kana omu navakapwa vaka-kuyula mwilu, navakevwila keke vatu vahamavu nakuvevwishisa.—Kusoloka 5:10.

Yesu mwakazachisa wana wandando yenyi yakusokola kuli vaze navakapwa hamavu nakuvasokola kulushingo lwashili vaswana. Ikiye navaze mwakayula navo hamwe navakakafwa vatu vakushishika mangana vakahase kupwa vakukupuka mwosena. Chikupu vene, vatu navakalivwisa kuwaha kuyoya ngana muze ajinyine Kalunga hakavanga omu alwezele Alama naEve ngwenyi vaseme nakuzalisa hamavu. Nakufwa chize cheza mwomwo yashili yaAlama kacheshi kukapwako chekako.

Ngocho Yesu mwakakumisa milimo yosena yize amuhanyine Yehova kuzata. Kusongo yaChiyulo chenyi chaMyaka Likombakaji, Yesu mwakakindulwisa Wangana navatu vakukupuka mwosena kuli Ise. Kutalisa kuchumechi chamwaza mwakalinga Yesu mwomwo yakulinyisa chenyi, kaposetolo Paulu asonekele ngwenyi: “Omu navikalinga vyuma vyosena hivanaviluula lyehi kuli ikiye, kaha naivene Mwana nawa mwakaliluula kuli Ou aluwile vyuma vyosena kuli ikiye, mangana Kalunga apwenga vyuma vyosena kuli vosena.”—Wavaka-Kolinde 1, 15:28.

Chikupu vene, Yesu azata mulimo waulemu chikuma muvyuma afwila kutesamo Kalunga. Omu vyuma ajina Kalunga navikaya nakutesamo chikoki chikoki haya myaka yosena, Yesu mwakatesamo jino ulumbunwiso alihana ivene wakwamba ngwenyi: “Ami yami jila, yami muchano, yami kuyoya.”—Yowano 14:6.