MATEU 26:20 MAKO 14:17 LUKA 22:14-18 YOWANO 13:1-17

  • YESU MWALYA PASEKA YAMAKUMISHILO NAVAPOSETOLO JENYI

  • ANANGWILE VAPOSETOLO JENYI CHISHINA CHACHILEMU HAKUVASANYISA KUMAHINJI

Petulu naYowano vahetele kuYelusalema nakuwahisa Paseka ngana muze avalwezele Yesu. Kufumaho, Yesu navaposetolo jenyi likumi vakatukile nakuya kuze. Likumbi lyapwile nakuteuka omu Yesu apwile nakushikumuka kufuma haPili yaMilive navaposetolo jenyi. Eli lyapwile likumbi lyamakumishilo Yesu kumona likumbi namusana palanga nomu akasangukile.

Nakushimbula chiku, Yesu navaposetolo jenyi vahetele munganda nakwingila muzuvo yize valililile Paseka. Vanyinyine jindondelo nakuya mukapete kahelu. Omu vahetele vawanyine vyuma vyosena vanavilongesa lyehi. Yesu apwile nakuvandamina lwola kana, kaha ambile ngwenyi: “Ngunafwila chikuma kulya nayenu Paseka eyi shimbu kanda nguchiyande.”—Luka 22:15.

Hamyaka yayivulu vatu vahichishilenga jipasa jajivulu mulizavu javinyo haPaseka. Omu atambwile lupasa lumwe Yesu alombele kaha ambile ngwenyi: “Wahenu, luhichisenumo munwengamo, mwomwo nangumilweza ngwami, kufuma vene oholili kangweshi kukanwa cheka vinyoko palanga nomu naukeza Wangana waKalunga.” (Luka 22:17, 18) Aha jino chasolokele hatoma nge kufwa chenyi chapwile hakamwihi.

Halwola vapwile nakulya Paseka, kwasolokele vyuma vimwe vyaungeji. Yesu akatukile, azulile uvwalo wenyi wahelu nakumbata litwayi. Kaha ahakile meya halilonga lize lyapwile hakamwihi. Kushikulu, mutu uze atambwile vangeji alwezele ndungo yenyi asanyise vangeji kana kumahinji. (Luka 7:44) Oloze halwola kanelu kakwapwile mwenyazuvoko, ngocho Yesu alisuwile kuzata mulimo kana. Vaposetolo kachi vakiko valisuwile kuzata mulimo kana, oloze naumwe wauchi alingile ngocho. Uno echi chasolwele nge vachipwile lika nachijindo mukachi kavo nyi? Kala mweshomwo chapwile, ava vaposetolo vevwile sonyi omu Yesu avasanyishile kumahinji.

Omu Yesu ejile kuli Petulu, ikiye ambile ngwenyi: “Ove kaweshi kukangusanyisa kumahinji amiko.” Yesu amukumbulwile ngwenyi: “Kuvanga ngukusanyise, mokomoko kaweshi kulikata nayamiko.” Kaha Petulu ambile ngwenyi: “Ove Mwata, kahanyi kanda ungusanyisa kumahinji kahako, oloze nakumavoko nakumutwe nawa.” Atela alikomokelele chikuma omu Yesu amukumbulwile ngwenyi: “Weshowo nasane lyehi mumujimba keshi kusakiwa kumusanyisa wosenako, shina kumahinji kaha, mwomwo natomo lyehi wosena. Kahenu munatomo, oloze keshi nge muvosenako.”—Yowano 13:8-10.

Yesu asanyishile vaposetolo jenyi vosena 12 kumahinji, kuhakilako vene naYuta Isakalyote. Omu akumishile kuvasanyisa avwalile cheka uvwalo wenyi wahelu, asendavalile kumesa nakuvahulisa ngwenyi: “Uno chuma ngunalingi kuli enu munachitachikiza tahi? Enu mweji kunguvulukanga ngwenu,  ‘Muka-kunangula,’ ngwenu, ‘Mwata,’ kaha mweji kuhanjikanga mwakwoloka, mwomwo mukiko vene mungwapwa. Shikaho kachi nge ami Mwata, ami Muka-kunangula, ngunamisanyisa kumahinji enu, nayenu nawa mwatela kulisanyisa navakwenu kumahinji enu. Mwomwo ami ngunamihane chakutalilaho mangana nayenu nawa mulingenga omu ngunalingi ami kuli enu. Chamuchano vene nangwamba kuli enu ngwami, ndungo kahambakana kaka yenyiko, kaha ou vanatumu nawa kahambakana ou namutumuko. Kachi nge munatachikiza vyuma kanevi, kaha namuwahilila nge namuvilinganga.”—Yowano 13:12-17.

Chakutalilaho kana chasolwele muchima wakulinyisa chikupu! Vaka-kukavangiza Yesu kavatela kulizezula helu nakushinganyeka ngwavo vavalemu chikuma nakusaka vakwavo vavazachilengako. Oloze vatela kukavangiza chakutalilaho chaYesu hakulisuula kuzachila vakwavo chakuzeneka kumona vakwavo ulumbi, keshi kukavangiza chisemwa chakusanyisa vakwavo kumahinjiko.