MATEU 27:31, 32 MAKO 15:20, 21 LUKA 23:24-31 YOWANO 19:6-17

  • PILATU MWASAKA KUSUULA YESU

  • YESU NAVAMUSOPESA NAKUMUTWALA VAKAMUJIHE

Numba tuhu Yesu vamuyanjishile chikuma nakumusaula, Pilatu asakile kumusuula, oloze vapilishitu vavakulwane navatu javo kavamwivwililileko. Kavasakile kupwenga vyuma vimwe vize navivahonesa kujiha Yesuko. Vatambakanyinenga ngwavo: “Vamupapalile hachitondo! Vamupapalile hachitondo!” Pilatu avambile ngwenyi: “Mumbatenu enu vavene mumupapalile hachitondo, mwomwo ami kangwamuwanyine nakatengako.”—Yowano 19:6.

VaYuleya vahonene kukunyula Pilatu atachikize nge Yesu vamuwanyine namulonga wakuhokola lushimbi lwalifuchi lwakutela kumujihilaho. Nyi ngachilihi mulonga wakutalisa kukwitava chavo uze vamuvangijikilile? Omu Yesu vamusopesele muzango yaSunendeline, vamuvangijikilile mulonga wakusaula Kalunga. Vambile ngwavo: “Etu twatwama nalushimbi, kaha kweseka nalushimbi kana, atela kufwa, mwomwo nalilingisa ivene kupwa mwanaKalunga.” (Yowano 19:7) Ou nawa wapwile mulonga weka kuli Pilatu.

Pilatu akindulukile mukachi kanganda yenyi mangana awane jila yakusuwilamo ou lunga vayanjishile chikuma, uze nawa pwevo lyaPilatu alotele chilota. (Mateu 27:19) Nyi ngachilihi ou mulonga vamuhanyine vaYuleya ngwavo ou funge nalyambe ngwenyi “MwanaKalunga”? Pilatu atachikijile ngwenyi Yesu afumine kuNgalileya. (Luka 23:5-7) Oloze ahulishile Yesu ngwenyi: “Wafuma kulihi?” (Yowano 19:9) Uno Pilatu apwile nakushinganyeka ngwenyi Yesu pamo atwamineko mwilu tahi?

Pilatu evwile kuli Yesu ivene omu amulwezele ngwenyi apwa mwangana, oloze Wangana wenyi kawapwile wamukaye kanoko. Ngocho Yesu aholele kulu, mwomwo kasakile cheka kushindakanya vyuma ahanjikile hakavangako. Omu Yesu aholele kulu, Pilatu apihililile, kaha ambile kuli Yesu ngwenyi: “Kaute kuhanjika kuli ami tahi? Kawatachikijile ngwove ami ngukwechi ngolo jakukukasununa, kaha nawa ngukwechi ngolo jakukupapalila hachitondoko nyi?”—Yowano 19:10.

Yesu amukumbulwile ngwenyi: “Kaweshi kuhasa kupwa nangolo hali amiko, shina kuvanga vanakuhanejo kufuma mwilu. Shikaho mutu uze nangunehe kuli ove ali nashili yayinene.” (Yowano 19:11) Yesu hakuhanjika mazu awa, kapwile nakushinganyeka hamutu umweko. Oloze apwile nakulumbununa nge Kayafwase, navatu jenyi, naYuta Isakalyote vakiko vapwile namulonga waunene kuhambakana Pilatu.

Vyuma ahanjikile Yesu vyakomwesele Pilatu, ngocho evwile woma nakushinganyeka ngwenyi Yesu pamo afumine mwilu, kaha esekele cheka kumusuula. Oloze vaYuleya vevwishile Pilatu woma hakwamba ngwavo: “Kachi nge mukasununa ou mutu, kaha kaweshi usepa lyaKesaleko. Weshowo mwalilingisa ivene kupwa mwangana, ali nakulikanga kuli Kesale.”—Yowano 19:12.

Ou nguvulu alowele cheka Yesu haweluka, kaha atwamine hachitwamo chakusopesa. Alwezele vatu ngwenyi: “Talenu! Mwangana wenu ou!” Oloze vaYuleya vatambakanyine ngwavo: “Mujihe! Mujihe! Vamupapalile hachitondo!” Pilatu avahulishile ngwenyi: “Ngwenu mwangana wenu ngumupapalile hachitondo?” Numba tuhu vaYuleya kavasuulukile nachiyulo chavaLomako, oloze ava vapilishitu vavakulwane vambile ngwavo: “Etu katweshi namwangana wekako, shina Kesale kaha.”—Yowano 19:14, 15.

Hakuwana nge Pilatu evwililile vyuma vapwile nakuhanjika vaYuleya, ngocho asuwile Yesu vakamujihe. Maswalale vapulile lihina lyaYesu lichila nakumuvwika uvwalo wenyi wahelu. Omu Yesu vapwile nakumutwala nakumujiha, alimbachilile ivene chitondo chakumuyanjishila.

Eli lyapwile hilikumbi lyamuChitanu nachimene, Nyisane 14. Yesu kasavalileko kufuma vene lyaChiwana nachimene, kaha nawa vamuyanjishile chikuma. Jino omu vamutwikile chitondo chachilemu chakumupapalilaho, ngolo jamukumine. Ngocho maswalale valwezele Shimona, wakuKulene muAfrica uze apwile nakulihichila kwenyi, ambate chize chitondo nakuchitwala kuchihela chakujihila vatu. Vatu  vavavulu vakavangijile munyima, vamwe vapwile nakulishona, veka valilile havyuma vyapwile nakusoloka.

Yesu ambile kuli mapwevo vaze vapwile nakulila ngwenyi: “Enu vana vaYelusalema vamapwevo, kanda namungulila amiko. Lilililenu enu vavene navana venu, mwomwo makumbi ali nakwiza omu vatu navakamba ngwavo, ‘Vawahilila vomba, namajimo aze kawasemene vanako, namavele aze kawamwishile vanako!’ Jino navakaputuka kwamba kujipili jajinene ngwavo, ‘Tushiukilenu!’ Nakwamba kujipili jajindende nawa ngwavo, ‘Tufwikenu!’ Kachi nge navalinga vyumevi shimbu mutondo uchili ututa, kaha nachikapwa ngachilihi nge mutondo unomu lyehi?”—Luka 23:28-31.

Yesu ahanjikile kutalisa kumuyachi wavaYuleya. Muyachi kana wapwile nge mutondo uze wapwile nakusaka kuma, oloze wapwile lika ututa, mwomwo Yesu navaYuleya vavavulu vaze vamufwelelele kuvapwile. Oloze omu navakavafumisa vosena mulifuchi, ou muyachi naukoma kushipilitu kaha naukapwa nge mutondo unomu. Muyachi kana naukalila chikuma omu Kalunga mwakazachisa maswalale javaLoma vakavanongese.