MATEU 20:29-34 MAKO 10:46-52 LUKA 18:35–19:10

  • YESU MWAHINDULA MALUNGA VATUPUPUTA KUYELIKO

  • ZAKEU MUKA-KUTAMBULA MITELO MWAPIHILILA NAKWALUMUKA

Yesu navatu vaze apwile navo vahetele kuYeliko, tunda yize vatambukilenga vatu likumbi lyamuundu kufuma kuYelusalema. Yeliko yapwile najinganda jivali, kaha tunda yakufuma kunganda yamwaka nakuya kunganda yayihya yavaLoma, yapwile kafwe kilomita yimwe nachimbwa. Omu Yesu namayongomena aze apwile nawo vapwile nakufuma kunganda yimwe hajinganda kaneji nakuya kunganda yikwavo, tupuputa vavali vaka-kulombalomba vevwile liuya lyavatu. Umwe lijina lyenyi ikiye Mbalachimeu.

Omu vevwile ngwavo Yesu ali nakuhita, Mbalachimeu nasepa lyenyi vatambakanyine ngwavo: “Ove Mwata, ove MwanaNdavichi, tuteteleko!” (Mateu 20:30) Vatu vamwe vapwile haliyongomena lize valwezele ava tupuputa ngwavo vahole kulu, oloze ava tupuputa vaputukile jino kutambakana chikuma. Omu Yesu evwile vyema, emanyine. Kaha alwezele vaze apwile nakuya navo vasanyike weshowo apwile nakumutambakana. Vayile kuli vaze tupuputa vaka-kulombalomba, kaha valwezele umwe ngwavo: “Likolezeze. Katuka, Yesu ali nakukusanyika.” (Mako 10:49) Uze kapuputa awahililile, ambilile uvwalo wenyi wahelu, alupukile nakuya kuli Yesu.

Yesu avahulile ngwenyi: “Vyuma muka muli nakusaka ngwenu ngumilingile?” Vaze tupuputa vosena vavali vambile ngwavo: “Ove Mwata, tonesa meso etu.” (Mateu 20:32, 33) Yesu evwile keke, kaha avakwachile hameso avo nakwamba kuli umwe ngwenyi: “Yakonga kwove. Lufwelelo lwove lunakuhindula.” (Mako 10:52) Vaze tupuputa vavali vaka-kulombalomba vavatonesele, kaha vosena vaputukile kutohwesa Kalunga. Omu vatu vamwene vyuma kanevi, navakiko vaputukile kwalisa Kalunga. Vaze malunga vapwile tupuputa vaputukile jino kukavangiza Yesu.

Kwapwile mayongomena amavulu aze apwile naYesu omu apwile nakuhita muYeliko. Vatu vosena vapwile nakusaka kumona mutu atonesele vaze malunga vatupuputa. Vatu vavavulu valihomenene kuli Yesu ngocho chapwile chachikalu kuli vamwe kumumona. Omu mukiko chapwile nakuli Zakeu. Ou lunga apwile mukulwane wavaka-kutambula mitelo munganda yaYeliko. Kahashile kumona vyuma vyapwile nakulingiwako mwomwo apwile wamwihi chikuma. Ngocho Zakeu alahilile kulutwe nakunyina kumutondo wamusukumole (chipwe musuwa) uze wapwile kwakamwihi najila yize apwile nakuhita Yesu. Zakeu ahashile kumona kanawa vyuma vyosena vyapwile nakulingiwa. Omu Yesu ahetele kwakamwihi nauze mutondo amwene Zakeu, kaha ambile ngwenyi: “Ove Zakeu, suluka washiwashi, mwomwo lelo ngwatela kutwama muzuvo yove.” (Luka 19:5) Kaha Zakeu asulukile kuze kumutondo nakuya washiwashi kuzuvo yenyi mangana akatambwokese ou ngeji wakulipwila.

Omu vatu vamwene vyuma vyapwile nakulingiwa, vaputukile kuyayavala. Vashinganyekele ngwavo chapwile chakuhenga kuli Yesu kuya kuzuvo yayou lunga vamwene kupwa muka-shili. Zakeu ahetele chikuma luheto mwomwo evilenga jimbongo hakulyapula vatu vanehelenga mitelo.

Omu Yesu engilile muzuvo yaZakeu, vatu vayayavalile ngwavo: “Nayi nakutwama kuzuvo yamuka-shili.”  Oloze Yesu amwene ngwenyi Zakeu nahase kupihilila nakwalumuka, ngocho Yesu kevwile sonyiko. Zakeu emanyine nakulweza Yesu ngwenyi: “Tala! Ove Mwata, chimbwa chavikumba vyami nanguchihana vaka-kuhutwa, kaha weshowo ngwalyapwile nakumutambula chuma, nangumushishishilamo viwana.”—Luka 19:7, 8.

Eyi yapwile jila yamwenemwene yize Zakeu asolwelelemo kupihilila chenyi nakwalumuka. Chasoloka nge ahashile kuhituluka mumijimbu yamitelo atambwilenga nakutachikiza jino jimbongo atambwile kuli vaYuleya vakulisezaseza, kaha alishingile ngwenyi mwavahilwishila vyuma vyavo nakuvahakilaho mapapa kawana. Echi chahambakanyine namuze jahanjikile jishimbi jaKalunga. (Kulovoka 22:1; VyavaLevi 6:2-5) Kaha nawa Zakeu ashikile kukapangila chimbwa chavikumba vyenyi kuli vaka-kuhutwa.

Yesu evwile kuwaha haunjiho kanou wakusolola nge Zakeu apihililile nakwalumuka, kaha amulwezele ngwenyi: “Likumbi lyalelo ulwilo uneza kuzuvo yino, mwomwo naikiye nawa apwa mwanaApalahama. Mwomwo Mwanamutu ejile nakutondatonda vaze vajimbalile nakuvalwila.”—Luka 19:9, 10.

Makumbi ahichile kunyima, Yesu ashindakanyine hachifwanyisa ‘chamwana wakujimbala.’ (Luka 15:11-24) Aha jino Yesu asolwele chakutalilaho chakuwana mutu uze ajimbalile. Vatwamina vamukwitava navatu vaze vavakavangijilenga vayayavalile chikuma hali Yesu nakumupopolola hakuzakama vatu vakufwana nge Zakeu. Oloze Yesu atwalileho lika kutondatonda ava vana vaApalahama vakujimbala nakuvakindulwisa.