MATEU 20:1-16

  • VAKA-KUZATA MUWANDE WAMIVINYO “VAKUKUMINYINA” NAVAPWA “VAKULIVANGA”

Yesu alwezele vaka-kumwivwilila muPeleya ngwenyi “vavavulu vaze vanalivange navakapwa vakukuminyina, kaha vakukuminyina navakapwa vakulivanga.” (Mateu 19:30) Ngocho ashindakanyine mazu awa nachifwanyisa chavaka-kuzata vamuwande wamivinyo, ambile ngwenyi:

“Wangana wamelu unafwane nge mwenyazuvo uze ayile chimenemene nakukamba vaka-kuzata muwande wenyi wamivinyo. Omu alingile nalivwasana lyehi navaka-kuzata kuvafweta ndenali yimwe halikumbi, avatumine muwande wenyi wamivinyo. Kahomu ayile cheka kafwe haola yamuchitatu, amwene veka vanemana chakuzeneka milimo kuchilanjilo. Kaha ambile kuli vakiko ngwenyi, ‘Nayenu nawa yenu muwande wamivinyo, kaha nangumihana yeshoyo fweto yinatemo.’ Ngocho vayile. Cheka nawa, ayile haola yakusokesa 6, nahaola yakusokesa 9, kaha alingile mwomumwe nawa. Kukuminyinako, ayile kafwe haola yakusokesa 11, awanyine veka nawa vanemana, kaha avehwile ngwenyi, ‘Ika munemanyina lika hano likumbi lyosena chakuzeneka milimo?’ Vakiko vamukumbulwile ngwavo, ‘Mwomwo kakweshi mutu natukambeko.’ Kaha ambile kuli vakiko ngwenyi, ‘Nayenu nawa yenu muwande wamivinyo.’”—Mateu 20:1-7.

Omu Yesu avulukile “Wangana wamelu” ‘namwenyazuvo,’ vatu vaze vapwile nakumwivwilila atela vapwile nakushinganyeka ngwavo ali nakuvuluka Yehova Kalunga. Visoneka vyasolola nge Yehova ikiye mwenyawande wamivinyo, kaha wande wamivinyo wemanyinyineko muyachi waIsalele. (Samu 80:8, 9; Isaya 5:3, 4) Vaze vatwama mulushiko lwamuJishimbi vavafwanyisa kuli vaka-kuzata muwande wamivinyo. Chipwe ngocho, Yesu kapwile nakulumbununa vyuma vyakunyimako. Oloze apwile nakulumbununa vyuma vyapwileko mulwola lwenyi.

Vatwamina vamukwitava vapwile nge vaFwaliseu vaze vesekele Yesu hachihande chakulukulula mapwevo, vatelelele kuzachila Kalunga lwola lwosena. Vapwile nge vatu vaze vatelele kuzata likumbi lyamuundu, nakuvafweta ndenali yimwe hamulimo vazachile.

Vapilishitu navakwavo veka vaze vapwile mulizavu kaneli vamwenenga vaYuleya vamokomoko kupwa hivatu vaze kavazachililenga Kalunga chikumako, nge hivatu vaze vazachilenga muwande waKalunga wamivinyo halwola lwalundende. Muchifwanyisa ahanjikile Yesu, malunga kana ava vanapu nge vaze vengishile milimo “kafwe haola yamuchitatu” (9:00 yachimene) chipwe halwola lweka lwakufwana nge haola yakusokesa 6, nahaola yakusokesa 9, nahaola yakusokesa 11 (kafwe 17:00).

Malunga namapwevo vaze vakavangijile Yesu vavamwene kupwa hivatu ‘vakwangula.’ (Yowano 7:49) Mukuyoya chavo chosena vanapunga vaka-kuta vaishi chipwe vaka-kuzachila vatu. Kukuputuka chamwaka wa 29 C.E., “mwenyawande wamivinyo” atumine Yesu kwiza nakusanyika vatu ava vamokomoko vazachile Kalunga kupwa tumbaji twaKulishitu. Ava vakiko vapwile vatu “vakukuminyina” vaze ahanjikile Yesu ngwenyi vejile muwande wamivinyo haola yakusokesa 11.

Hakukumisa kuhanjika chifwanyisa kana, Yesu alumbunwine vyuma vyasolokele hakutoka chalikumbi, ambile ngwenyi: “Omu kwatokele, uze mwenyawande wamivinyo ambile kuli muka-kumulamina vyuma vyenyi ngwenyi, ‘Sanyika vaka-kuzata uvahane fweto yavo, kuputukila kuli vaze vakukuminyina nakuneha kuli vaze vakulivanga.’ Omu vejile vaze akambile haola yakusokesa 11, vatambwile mutu himutu ndenali yimwe. Jino omu vejile vaze vakulivanga, vashinganyekele ngwavo navatambula fweto yayinene, oloze navakiko nawa vavafwetele ndenali yimwe. Hakuyitambula vaputukile kuyayavala kuli uze mwenyazuvo nakwamba ngwavo, ‘Ava vakukuminyina vanazate mulimo waola yimwe kaha. Oloze unavahane fweto yakuteseka hamwe nayetu tunakilikita likumbi lyosena nakuwema namusana wakaza.’ Oloze ikiye akumbulwile minavo umwe ngwenyi, ‘E lunga, ami kangwalingile chuma chachipi kuli oveko. Ngwetu wetavilanga kukuhana ndenali yimwe, nyi mweka? Mbata fweto yove uyenga. Nguli nakusaka nguhane ou wakukuminyina fweto yakuteseka hamwe nayeyi ngunakuhane ove. Uno kangweshi nangolo jakulinga mweshomwo ngunasake kulinga navyuma vyamiko nyi? Nyi pamo unevu kupihya ami hakulinga mwamwaza?’ Shikaho vaze vakukuminyina navakapwa vakulivanga, kaha vakulivanga navakapwa vakukuminyina.”—Mateu 20:8-16.

 Atela tumbaji valikomokelele hakwivwa omu Yesu akukulwile chize chifwanyisa ahanjikile. Uno vatwamina vamukwitava chavaYuleya vaze valimwenenga ngwavo vapwile “vakulivanga” oloze jino navapwa “vakukuminyina” vevwile ngachilihi? Kaha tumbaji twaYesu vapwile ngachilihi “vakulivanga”?

Tumbaji twaYesu vaze vamwene kuli vaFwaliseu navakwavo veka ngwavo vapwile “vakukuminyina,” vakiko vapwile hakamwihi nakupwa “vakulivanga” kutambula fweto yavo yosena. Hakufwa chaYesu, Yelusalema yahano hamavu vatelele kuyifumisako, kaha Kalunga apwile nakusakula muyachi wauhya, “Isalele yaKalunga.” (Wavaka-Ngalesha 6:16; Mateu 23:38) Yowano Muka-kumbapachisa avulukile vatu kana omu ahanjikile vyakumbapachisa vatu nashipilitu yajila. Vatu vaze vapwile “vakukuminyina” vakiko jino vapwile vakulivanga kuvambapachisa nashipilitu nakupwa nakutokwa chakupwa vinjiho jaYesu “kuvihela vyakwakusuku vyahamavu.” (Vilinga 1:5, 8; Mateu 3:11) Omu tumbaji vatachikijile kwalumuka chapwile muchifwanyisa ahanjikile Yesu, vamwene jino ngwavo vatwamina vamukwitava navakapihilila mwomwo yakupwa jino “vakukuminyina.”