LUKA 12:1-34

  • CHIFWANYISA CHALUNGA WALUHETO

  • YESU MWAHANJIKA MAKOLOLO NAJITEMO

  • “UTANGA WAMIKOKO WAUNDENDE” NAUPWA MUWANGANA

Omu Yesu apwile nakulya muzuvo yakaFwaliseu umwe, vatu vavavulu vapwile nakumuvandamina haweluka. Omu mukiko chapwile nahalwola apwile muNgalileya. (Mako 1:33; 2:2; 3:9) Halwola kana omu apwile muYuleya, vatu vavavulu vasakile kumumona nakwivwa vyuma mwanangula, kaha kavapwile ngana mwavaFwaliseu vaze apwile nakulya navoko.

Vyuma ahanjikile Yesu hakavanga vyapwile naulumbunwiso wakulipwila kuli tumbaji twenyi. Ambile ngwenyi: “Zangamenu nachimbalwila chavaFwaliseu, chikiko kulyonga.” Yesu ahuhumwine cheka tumbaji twenyi hachihande kanechi, oloze vyuma amwene halwola vapwile nakulya vyasolwele nge mazu avahuhumwine asakiwile chikuma halwola kanelu. (Luka 12:1; Mako 8:15) VaFwaliseu vaswekele vilinga vyavo vyakuhuka nakusoloka nge vakeke, oloze vapwile naukalu waunene uze wasakiwile kuusolola hatoma. Yesu alumbunwine ngwenyi: “Kakweshi chuma chakusweka kanawa chize navakahona kusolola hatomako, chipwe chuma chakuswama chize navakahona kutachikizako.”—Luka 12:2.

Pamo vatu vavavulu vaze valikungulwilile kuli Yesu vapwile vaYuleya vaze kavevwile vyuma anangwile muNgalileyako. Ngocho ahilukilile vishina vize ahanjikile hakavanga. Akolezezele vatu vosena vaze vapwile nakumwivwilila ngwenyi: “Kanda namwivwa woma vaze navajiha mujimbako, kaha kufumaho kaveshi kuhasa kulinga chuma chekako.” (Luka 12:4) Ngana muze anangwile hakavanga, ahanjikile havyuma vize navikafwa vaka-kumukavangiza vafwelele Kalunga uze nahase kuvazakama. Vatelele kutachikiza Mwanamutu nakwanuka ngwavo Kalunga nahase kuvakafwa.—Mateu 10:19, 20, 26-33; 12:31, 32.

Kaha mutu weka mulizavu anehele chihande chenyi kuli Yesu, ambile ngwenyi: “Ove Muka-kunangula, mulweze ndumbwami tulipangile uswana wetu hakachi.” (Luka 12:13) Jishimbi jahanjikile nge mwana watwatwa atelele kutambula vyazano vivali vyauswana, ngocho kahatelele kupwa ukalu hachihande kanechiko. (Lushimbi lwamuchivali 21:17) Chasolokele nge ou lunga apwile nakusaka vyuma vyavivulu kuhambakana muze jahanjikile Jishimbi. Oloze Yesu akanyine kupendamina kusali yimwe. Ngocho ahulishile uze lunga ngwenyi: “Ove lunga, iya angutongola kupwa ngumuka-kuyula chipwe lihako hali enu vavali?”—Luka 12:14.

Ngocho Yesu ahuhumwine vosena ngwenyi: “Tonenunga, lilamenunga kuchipululu chosena, mwomwo numba nge mutu ali navyuma vyavivulu, vyuma aheta kavyeshi kumuhana kuyoyako.” (Luka 12:15) Numba tuhu mutu alilumbikila luheto lwaluvulu, oloze nahase kufwa nakuseza vyuma vyosena. Yesu ashindakanyine chishina kanechi nachakutalilaho chize chasolola omu chalema kutunga lijina lyamwana naKalunga. Ambile ngwenyi:

“Wande wamutu umwe muka-luheto wemine chikuma. Shikaho aputukile kushinganyeka mumuchima wenyi ngwenyi, ‘Nangulinga muka hakuwana nge kangweshi namwakukungulwila jimbuto jamiko?’ Ngocho ambile ngwenyi, ‘Nangulinga ngana: Nangupuzula visete vyami nakutunga vyeka vyavinene, kaha mukiko vene nangukungulwila manona ami osena navyuma vyami vyosena. Kaha nangulyamba ami ivene ngwami: “Uli navyuma vyamwaza vyavivulu unalitulikila vyakuzachisa hamyaka yayivulu. Ijiva kunoka jino, lyakonga, nwakonga, livwisenga kuwaha.”’ Oloze Kalunga ambile kuli ikiye ngwenyi, ‘Ove mutu wakuhona mangana, ufuku uno vene navakutambula mwono wove. Kaha vyuma unalitulikila navikapwa vyeya?’ Omu mukiko vene mwanapu namutu uze mwalilunjikila luheto, oloze keshi naluheto kuli Kalungako.”—Luka 12:16-21.

Ngocho tumbaji twaYesu navatu veka vaze vapwile nakwivwilila vahashile kufwa mumuheto nge navatondatonda luheto chipwe kulilunjikilalwo. Chipwe vene kulizakamina hakuyoya chavo chinahase  kuvalingisa vahone kumuzachila Yehova. Ngocho Yesu ahilukililile mazu ahuhumwine vatu kafwe mwaka umwe nachimbwa kunyima omu ahanjikile Chihande chenyi ChahaPili. Ambile ngwenyi:

“Litwaminenu kulizakaminanga hakuyoya chenu ngwenu namulya ika, chipwe hamijimba yenu ngwenu namuvwala ika. . . . Achishinganyekenu hali makololo. Kaveshi kukuva mbutoko, chipwe kwahako, kaha kaveshi nawa nazuvo yakutulikila chipwe chiseteko. Oloze Kalunga eji kuvalisanga. Uno enu kamwalema chikuma kuhambakana tujilako numba? . . . Achishinganyekenu omu jeji kukulanga jitemo. Kajeshi kufulyangila, chipwe kutunga mahinako. Oloze nangumilweza ngwami, numba vene Solomone muupahu wenyi wosena, kavwalile uvwalo umwe wakulita natemo yimweko. . . . Ngocho litwaminenu kulizakamina havyuma namusaka kulya navize namusaka kunwa. Litwaminenu kulizakaminanga . . . Senu atachikiza ngwenyi nayenu mwasakiwa vyuma kanevi. . . . Tondenunga lika chatete Wangana wenyi, kaha vyuma kanevi navakamihanavyo.”—Luka 12:22-31; Mateu 6:25-33.

Uno veya vatela kutondatonda Wangana waKalunga? Yesu asolwele hatoma ngwenyi lizavu “[lya]utanga wamikoko waundende” lyavatu vakushishika vakiko navakalinganga ngocho. Kutwala muze, kuvula chavo vachivulukile ngwavo vapwile kaha 144,000. Uno vyuma muka vavatulikila kulutwe? Yesu avafwelelesele ngwenyi: “Senu namitongwela kumihana Wangana.” Ava kavashinganyeka vyakulilunjikila luheto hano hamavuko mwomwo vanahase kulwiva. Oloze vahaka michima yavo “[ku]luheto luze kalweshi kukuma mwiluko,” muze navakayulanga hamwe naKulishitu.—Luka 12:32-34.