UNEJIVA mukanda anakutanga ou kanyike wapwevo navakwavo nyi? Eyo, wou vene mukanda unakutanga nayove—Mukanda Wami waVihande VyamuMbimbiliya. Vali nawa nakutanga chihande uli nakutanga yove—“Omwo Tunahase Kuyoya Haya Myaka Yosena.”

Kanyike walunga ali nakutanga

Unejiva vyuma vanakulinangula tahi? Chatete, shina chakuvuluka nge twatela kumwijiva Yehova naMwanenyi Yesu numba tuhase kuyoya haya myaka yosena. Mbimbiliya yamba ngwayo: ‘Eyi yikiko jila yakuyoya chahaya myaka yosena. Kumutachikiza Kalunga wamuchano uka wenyi, naMwanenyi atumine, Yesu Kulishitu.’

Natumutachikiza ngachilihi Yehova Kalunga naMwanenyi Yesu? Jila yimwe yakulinga ngocho shina yakutanga Mukanda Wami waVihande VyamuMbimbiliya kufuma kuwaputukila swi nakusongo. Wambulula vyuma vyavivulu vyaYehova naYesu, keshi ngochoko? Kaha nawa weji kutulweza vyuma vyavivulu vanalingi lyehi navyuma navakalinga kulutwe. Oloze twatela kulinga vyuma vyavivulu keshi kutanga uno mukanda kahako.

Mbimbiliya

Waumono mukanda ukwavo uli hamavu tahi? Eyi Mbimbiliya. Wanako mutu umwe akutangile vihanda vyaMbimbiliya haze hanafumu vihande vyamukanda uno. Mbimbiliya yatulweza vyuma vyosena twatela kwijiva mangana tuvosena tuhase kumuzachila Yehova mukwoloka nakukayoya haya myaka yosena. Shikaho twatela kulijilisa kutanga Mbimbiliya shimbu yosena.

Oloze kuli vyavivulu twatela kulinangula keshi kumutachikiza Yehova Kalunga naYesu Kulishitu kahako. Tunahase chikupu kuvatachikiza nakwijiva nawa vivalongesa, oloze kukatambula kuyoya chahaya myaka yosena chiku. Unejiva chuma chikwavo chinakusakiwa?

Twatela nawa kuyoya mwaya vyuma tunakulinangula. Unakwanuka Yuta Isakalyote ngwetu? Apwile umwe wavaze 12 asakwile Yesu kupwa vaposetolo jenyi. Yuta ejivile vyavivulu vyaYehova naYesu. Oloze jino alingile ngachilihi? Kapyapya kakandende kaha hikupwa nalwiso, nakumulandulula Yesu kuli vaka-kole jenyi najimbongo japalata 30. Shikaho Yuta keshi kukatambula kuyoya chahaya myaka yosenako.

Unakwanuka Ngehaze, lunga uze twalinangwile muChihande 69 ngwetu? Asakile kutambula uvwalo najimbongo vize vyapwile vyambala. Ngocho alyongele mangana atambule vyuma kana. Kaha Yehova amuzangamishile. Nayetu nawa nahase kutuzangamisa nge natukana kwononoka kujishimbi jenyi.

Oloze kuvali vatu vamwaza vavavulu vaze shimbu yosena vanamuzachilanga Yehova mukashishi. Natusaka tupwenga chiwenya vakivo, ngwetu? Kanyike Samwele hichakutalilaho chamwaza chakulondezeza. Nawanuka, nge muze twamonanga muChihande 55, aputukile kuzachila Yehova mutavanaku shimbu apwile myaka yiwana chipwe yitanu kaha. Shikaho numba upwa tuhu ukanyike chikuma ngachilihi, unahase kumuzachila Yehova.

Enga, mutu natusaka kulondezeza ikiye Yesu Kulishitu. Omu vene apwile kanyike, nge muze vamusolola muChihande 87, apwile mutembele nakushimutwila naveka vyaIse wamwilu. Tukavenu mwalingile. Twatela kulweza vatu vavavulu chikuma vyaKalunga wamwaza, Yehova, naMwanenyi Yesu Kulishitu. Kachi nge natulinga vyuma kanevi, kaha natukatwama haya myaka yosena mupalachise yaKalunga yayihya hano hamavu.

Yowano 17:3; Samu 145:1-21.



Vihula

  • Vyuma muka twatela kutachikiza numba tukayoye haya myaka yosena?
  • Tunahase kulinangula ngachilihi vyaYehova Kalunga naYesu, nganomu ali nakulinga ou kanyike wapwevo namasepa jenyi hamuvwimbimbi?
  • Mukanda weka muka unamono hamuvwimbimbi, kaha mwomwo ika twatela kuutanganga?
  • Vyuma vyeka muka twatela kulinga numba tukayoye haya myaka yosena?
  • Vyuma muka tunalinangula muChihande 69?
  • Chakutalilaho chamwaza chaSamwele vavuluka muChihande 55 chasolola ika?
  • Uno tunahase kulondezeza ngachilihi Yesu Kulishitu, kaha nge natulinga ngocho, natukanganyala ngachilihi kulutwe?

Vihula vyakuhakilako

  • Tanga Yowano 17:3.

    Visoneka vyasolola ngachilihi nge kutachikiza Yehova Kalunga naYesu Kulishitu kachapwa kaha kulamina vyuma mumutweko? (Mateu 7:21; Yako. 2:18-20; Yowa. 1, 2:17)

  • Tanga Samu 145:1-21.

    Vyuma muka vyatela kutulingisa tumwalise Yehova? (Samu 145:8-11; Kuso. 4:11)

    Uno Yehova apwa ngachilihi “wamwaza kuli vosena,” kahechi nachitukafwa ngachilihi tupandame chikuma kuli ikiye? (Samu 145:9; Mateu 5:43-45)

    Kachi nge twazanga chikuma Yehova, kaha natulinga ika? (Samu 119:171, 172, 175; 145:11, 12, 21)