HILYACHIWANA jino naufuku, omu hanahichi lyehi makumbi avali. Yesu navaposetolo jenyi 12 vaneza muzuvo yino yahelu nakulya Paseka. Uze lunga anakulovoka ikiye Yuta Isakalyote. Anakuya nakulweza vapilishitu mwakumukwachila Yesu.

Kulya chaMwata chachingoloshi

Zau, Yuta ayanga kuli vakivo nakuvehula ngwenyi: ‘Namunguhana ika nge nangumikafwa kumukwata Yesu?’ Vakivo ngwavo: ‘Jimbongo japalata makumi atatu.’ Shikaho Yuta anakuya akawane vaze malunga mangana avatwale kuli Yesu. Uno ou keshi ukenyako nyi?

Kulya chaPaseka chinakumu. Kaha jino Yesu hikuputuka kulya cheka chakulipwila. Himwahana vaposetolo jenyi mbolo ngwenyi: ‘Lyenu, ou ukiko mujimba wami vanahane hali enu.’ Kaha himwavahana nalupasa lwavinyo ngwenyi: ‘Nwenu, akiko manyinga ami, awa vene vanahingunwina hali enu.’ Kulya kana muMbimbiliya vachivuluka ngwavo ‘Kulya chaMwata chaChingoloshi.’

VaIsalele valilenga Paseka mangana yivanukise lwola kangelo kaKalunga ‘azombokele’ jizuvo javo muEjipitu, nakujiha vatwatwa mujizuvo javaEjipitu. Jino Yesu anakusaka vaka-kumukavangiza vamwanukenga ikiye, nomu echele mwono wenyi hali vakivo. Shikaho navalweze kulinganga chino chiwanyino chakulya chakulipwila hamwaka hamwaka.

Hakukumisa Kulya chaMwata chaChingoloshi, Yesu himwavashika vaposetolo vapwenga vakuhamuka nakuzama mbe mulufwelelo. Hakukumisa, hinavemba myaso kuli Kalunga nakulovoka jino. Uno hiufuku chikuma, pamo kuzomboka hakachi kaufuku. Tutalenu kunavaya.

Mateu 26:14-30; Luka 22:1-39; Yowano tupetulu 13 swi naku 17; Wavaka-Kolinde 1, 11:20.



Vihula

  • Nganomu unasolola muvwimbimbi, mwomwo ika Yesu navaposetolo jenyi 12 vanalikungulwila muzuvo yayinene yahelu?
  • Uze lunga ali nakulovoka ikiye iya, kaha ayile nakulinga ika?
  • Kulya muka chakulipwila aputukile Yesu omu vakumishile kulya chaPaseka?
  • Paseka yanukishile vaIsalele chuma muka, kahechi kulya chakulipwila cheji kwanukisanga ika vaka-kukavangiza Yesu?
  • Hakukumisa Kulya chaMwata chaChingoloshi, vyuma muka Yesu alwezele vaka-kumukavangiza, kaha valingile ika?

Vihula vyakuhakilako

  • Tanga Mateu 26:14-30.

    Mukanda waMateu 26:15 wasolola ngachilihi nge Yuta alisakwilile mumuchima wenyi kusolola Yesu kuli vaka-kole?

    Manyinga aYesu azachile milimo muka ivali? (Mateu 26:27, 28; Yele. 31:31-33; Efwe. 1:7; Hepe. 9:19, 20)

  • Tanga Luka 22:1-39.

    Mujila muka Satana engilile muli Yuta? (Luka 22:3; Yowa. 13:2; Vili. 1:24, 25)

  • Tanga Yowano 13:1-20.

    Kweseka namujimbu watwama hali Yowano 13:2, kutala tunahase kuhana Yuta mulonga hachuma alingile tahi, kaha chuma muka vangamba jaKalunga vatela kulinangulaho? (Kupu. 4:7; Koli. 2, 2:11; Ngale. 6:1; Yako. 1:13, 14)

    Yesu atunangula chuma muka chachilemu? (Yowa. 13:15; Mateu 23:11; Petu. 1, 2:21)

  • Tanga Yowano 17:1-26.

    Uno Yesu atalikishile mulihi hakulomba ngwenyi vaka-kumukavangiza vapwenga “umwe”? (Yowa. 17:11, 21-23; Loma 13:8; 14:19; Kolo. 3:14)