OMU Yesu anakuhita mumembo, anakuka navaka-kuviza. Mujimbu wavyuma vyakukomwesa hisanganya mumembo najingalila josena. Jino vatu hikumunehela vitonji natupuputa natumama, navaka-kuviza veka vavavulu. Kaha Yesu hikuvahindula vosena.

Hanahichi jino kafwe myaka yitatu kufuma hakumbapachisa Yesu kuli Yowano. Kaha Yesu mwalweza vaposetolo jenyi ngwenyi kalinwomu ayenga kuYelusalema, vakamujihe, nakusanguka cheka. Oloze oholyapwa Yesu chatwalaho lika nakuhindula vaka-kuviza.

Yesu ali nakuhindula muveji

Likumbi limwe Yesu ali nakunangula haSambata. Sambata lyapwa likumbi lyavaYuleya lyakuhwima. Ou pwevo unakumona hano napunga nakuviza chikuma. Napunga wakuzembama ngonga, chakuhona numba kwoloka hamyaka 18. Jino Yesu mwamunangika mavoko, kaha nayikiye uno hikwoloka. Vanamuhindula!

Echi hinachisulakanyisa vakulwane vamukwitava. Umwe hikutenukila lizavu ngwenyi: ‘Kuli makumbi atanu nalimwe atela vatu kuzatanga milimo. Shikaho twayenunga hamakumbi aze vamihindule, keshi halikumbi lyaSambatako!’

Oloze Yesu ngwenyi: ‘Enu vatu vavapi. Enu muvosena mutu himutu nahase kukasununa chimbulu chenyi nakumutwala kumeya haSambata. Nyi ou pwevo mwanambala, ou naviji myaka 18, katelele kumuhindula halikumbi lyaSambatako numba?’ Omu nahanjika Yesu ngocho, vatu vavapi sonyi yinavakwate.

Jino Yesu navaposetolo jenyi hinavaswikako ungeji wakuya kuYelusalema. Shimbu vachili kukulo yalimbo lyaYeliko, tupuputa vavali hikwivwa ngwavo Yesu anakupalika. Hinavavilika ngwavo: ‘Yesu, achitukafwe!’

Yesu hikuvasanyika vano tupuputa vavali, nakuvahula ngwenyi: ‘Munasake ngwenu ngumilingile ika?’ Ngwavo: ‘Ove Mwata, vatutonese meso etu mwane.’ Yesu mwakwata hameso avo, hoho vene hinavatona! Unatachikiza vyanakulingila Yesu vyuma vyakukomwesa vyosenevi nyi? Mwomwo azanga vatu, kaha anakusaka vamwitavile. Ngocho natufwelela ngwetu omu mwakayula mwaMwangana kakweshi kukapwe mutu mwakaviza chekako.

Mateu 15:30, 31; Luka 13:10-17; Mateu 20:29-34.



Vihula

  • Vyuma muka alingile Yesu omu apwile nakutambwojoka mumembo?
  • Omu mwahichile myaka yitatu kufuma haze vamumbapachishile, Yesu alwezele ika vaposetolo jenyi?
  • Ava vatu vali hamuvwimbimbi vakivo veya, kaha vyuma muka Yesu amulingilile uze pwevo?
  • Mazu akumbulwile Yesu vatwamina vamukwitava avevwishile ngachilihi sonyi?
  • Omu Yesu navaposetolo jenyi vahetele kwakamwihi naYeliko, Yesu alingile ika kuli tupuputa vavali?
  • Mwomwo ika Yesu alingililenga vyuma vyakukomwesa?

Vihula vyakuhakilako

  • Tanga Mateu 15:30, 31.

    Yesu asolwele ngachilihi ngolo jaYehova, kahechi chatela kutukafwa ngachilihi twijive kanawa vyuma atushika Yehova mulifuchi lyalihya? (Samu 37:29; Isa. 33:24)

  • Tanga Luka 13:10-17.

    Yesu hakulinga vyuma vimwe vyakukomwesa haSambata, chasolola ngachilihi vyuma vyamwaza mwakalingila vatu muChiyulo chenyi chamyaka likombakaji? (Luka 13:10-13; Samu 46:9; Mateu 12:8; Kolo. 2:16, 17; Kuso. 21:1-4)

  • Tanga Mateu 20:29-34.

    Mujimbu kanou wasolola ngachilihi nge Yesu apwilenga nalwola lwakukafwa vatu, kaha vyuma muka natulinangulaho? (Lushi. 15:7; Yako. 2:15, 16; Yowa. 1, 3:17)