KUNASOLOKA chuma chimwe chachipi. Yowano Muka-kumbapachisa mukumujiha vene ngana. Helochiya, pwevo lyamwangana kamuzangileko. Alingishile mwangana avatule mutwe waYowano.

Yesu hakuchivwa, himwalinyenga chikuma. Hikuya kwauka wenyi. Oloze vatu chivamukava. Yesu hakumona mayongomena avatu, keke yamukwate. Ngocho himwavalweza vyawangana waKalunga, nakuhindula vatu javo vaka-kuviza.

Hakulembalemba chalikumbi tumbaji twenyi hinavapandama kuli ikiye nakwamba ngwavo: ‘Kuno kupambo, kaha kunatoko lyehi. Vasuule vatu vayenga mumembo ali mukamwihi vakalilanjile vyakulya.’

Yesu ali nakulisa liyongomena lyavatu

Yesu ngwenyi: ‘Kavatela vakivo kufumahoko. Vahanenu vyakulya vene yenu.’ Yesu mwatala kuli Fwilipu nakumuhula ngwenyi: ‘Kulihi natulanda vyakulya vyavivulu vyakulisa vatu vano?’

Fwilipu ngwenyi: ‘Nachisakiwa jimbongo jajivulu chikuma jakulanda kulya chakuvazukisa numba mutu himutu atambule kamwe.’ Andelei ngwenyi: ‘Mukweze anakulama kulya chetu, ali najimbolo jitanu navaishi vavali. Oloze kavyeshi vizuke kuvatu vapwaha nganako.’

Yesu ngwenyi: ‘Valwezenu vatu vatwame hamwila.’ Alombele kuli Kalunga hakulya kana, nakuputuka kujipazula muvihanda. Kufumaho, tumbaji hikupangila jimbolo navaishi kuvatu vosena. Hali malunga 5,000, namakulukaji amavulu akwavo amapwevo navana. Vosena hikulya nakwikuta. Kahomu tumbaji vanakungulula vihanda vanasezeho, hikuzalisa mitonga 12!

Jino Yesu hikusuula tumbaji twenyi vayenga muwato vazauke musali yaChijiva chaNgalileya. Kuheta ufuku, peho yayinene yaputuka kuhuhwa, kaha wato hikutelwomwoka namakanya. Tumbaji vanevu woma. Jino, mukachi kaufuku, hinavamona mutu anakutambuka hameya nakupandama kuli vakivo. Hikutetumuka nawoma, mwomwo chuma vanakumona kuchijiva nduma.

Yesu ngwenyi: ‘Yami vene, kanda namwivwa womako!’ Oloze vakivo kwitavila chiku. Shikaho Petulu ngwenyi: ‘Ove Mwata, kachi nge yove vene, ngulweze ngwize kuli Ove helu lyameya.’ Yesu ngwenyi: ‘Twaya!’ Kaha Petulu himwafuma muwato nakutambuka hameya! Jino woma wamukwate nakuputuka jino kulondomana, oloze Yesu himwamuyovola.

Kutwala muze, Yesu mwalisa cheka makombakaji avatu. Hashimbu kana mwazachisa jimbolo jitanu najivali navaishi vamwe vavandende. Cheka nawa vatu vosena hikulya nakwikuta. Kutala kumana Yesu kazakama vatu mujila yamwazako nyi? Omu mwakayula mwamwangana wakuli Kalunga katweshi kukalizakaminanga hachuma numba chimweko!

Mateu 14:1-32; 15:29-38; Yowano 6:1-21.



Vihula

  • Vyuma muka vyavipi vyasolokele kuli Yowano Muka-kumbapachisa, kaha Yesu evwile ngachilihi?
  • Yesu alishile ngachilihi vatu vavavulu vaze vamukavangijile, kaha kulya chasalileho vachilongele mumitonga yingahi?
  • Mwomwo ika tumbaji vevwile woma naufuku, kaha vyuma muka vyasolokele kuli Petulu?
  • Yesu alishile ngachilihi makombakaji avatu kamuchivali?
  • Mwomwo ika vyuma navikawahila omu Yesu mwakayula hamavu kupwa Mwangana waKalunga?

Vihula vyakuhakilako

  • Tanga Mateu 14:1-32.

    Mujimbu wahali Mateu 14:23-32 watukafwa ngachilihi kwijiva vilinga vyaPetulu?

    Mijimbu yamuVisoneka yasolola ngachilihi nge Petulu alitwaminyine muchima wenyi wakazamuzamu? (Mateu 14:27-30; Yowa. 18:10; 21:7; Vili. 2:14, 37-40; Petu. 1, 5:6, 10)

  • Tanga Mateu 15:29-38.

    Yesu asolwele ngachilihi nge amwene vyakulya vyafumine kuli Ise kupwa vyavilemu? (Mateu 15:37; Yowa. 6:12; Kolo. 3:15)

  • Tanga Yowano 6:1-21.

    Vaka-Kulishitu makumbi ano vanahase ngachilihi kukavangiza chakutalilaho chaYesu kutalisa kufulumende? (Yowa. 6:15; Mateu 22:21; Loma 12:2; 13:1-4)