YESU hano anakusoloka napihilila, nyi chiku? Unatachikiza vinamusulakanyisa ngana tahi? Mwomwo malunga ava vali hatembele yaKalunga muYelusalema valizangamina. Vali nakulyapula vatu vanakwiza nakulemesa Kalunga.

Yesu ali nakwandumuna jimesa jili najimbongo

Wavamono vaze vana vavangombe namikoko natutela ngwetu? Eyo, ava malunga vanakulanjishila vimuna mutembele. Unejiva vivanakulingila ngocho? Mwomwo vaIsalele vanakusaka vimuna natujila vakuhana wana kuli Kalunga.

Jishimbi jaKalunga ngwajo nge kaIsalele navulumuna mulonga, kaha atela kuhana wana kuli Kalunga. Kwapwile lwola lweka nawa vatelele vaIsalele kuhana mawana. Jino kaIsalele mwahasa kuwana kulihi wana watujila navimuna wakuhana kuli Kalunga?

kavapichile vimuna chipwe tujilako. Veka vatwaminenga hahasuku naYelusalema ngocho kavahashilenga kwiza navimuna javo kutembeleko. Shikaho vatu vejilenga kuno nakulanda vimuna chipwe tujila vasakiwilenga. Oloze malunga ava valyapwilenga vatu. Vapwile nakwonga vatu. Kaha nawa, kavatela kulandulwila muno mutembele yaKalungako.

Shikaho napihilila Yesu. Kaha hikwandumuna jimesa javatu jili najimbongo nakujimwanga. Kaha nawa, hikujinga chikote chajingoji nakuhanga vimuna vosena mutembele. Himwalundumunamo vatu vanakulanjisa tutela ngwenyi: ‘Twalenu vyumevi kweka! Zuvo yaTata kanda muyitenga nge zuvo yakuwanyinamo maliko.’

Vaka-kukavangiza Yesu vamwe muvali mutembele muYelusalema. Vanalikomokela hakumona vyuma anakulinga Yesu. Kaha hinavanuka mazu vasoneka muMbimbiliya akuvuluka MwanaKalunga ngwavo: ‘Zangi yakuzanga zuvo yaKalunga nayikakwata nge kakahya.’

Shimbu Yesu achili muno muYelusalema kuPaseka, himwalinga vyuma vyakukomwesa vyavivulu. Kufumaho, Yesu hikufuma kuYuleya nakukinduluka kuNgalileya. Oloze hakuya, mwahichila mwimbo lyaSamaliya. Tuwanenu vyuma navisoloka kuze.

Yowano 2:13-25; 4:3, 4.



Vihula

  • Mwomwo ika vatu valanjishilenga vimuna hatembele?
  • Vyuma muka vyalingishile Yesu apihilile?
  • Nganomu unamono hamuvwimbimbi, Yesu alingile ika, kaha vyuma muka alwezele vaze malunga vapwile nakulanjisa tutela?
  • Omu vaka-kumukavangiza Yesu vamwene vyuma alingile, vanukile ika?
  • Yesu ahichile mungalila muka hakukinduluka kuNgalileya?

Chihula chakuhakilako

  • Tanga Yowano 2:13

    Hakushinganyeka chuma alingile Yesu chakuhanga vatu vaze valanjishililenga mutembele, twatela kumona ngachilihi vyakusekasanyina haZuvo yaWangana? (Yowa. 2:15, 16; Koli. 1, 10:24, 31-33)