OU MWANAPWEVO wamwaza ikiye Maliya. HikaIsalele, wamwimbo lyaNazaleta. Kalunga nejiva ngwenyi atwama kanawa. Shikaho namutumina kangelo kenyi Ngavalyele ahanjike nenyi. Unejiva ovyo Ngavalyele neza nakumulweza Maliya tahi? Tutalenu kanawa.

Ngavalyele ngwenyi: ‘Wahililanga, ove unawane uselewa. Yehova ali nayove.’ Maliya kanda amumoneho lyehi mutu kanou. Woma unamukwate, mwomwo vyanahanjika kavyamulumbunukilileko. Kaha Ngavalyele himwamuunjisa.

Maliya

Ngwenyi: ‘Ove Maliya, kanda wivwa womako. Yehova nakwivwila kuwaha. Shikaho mwakulingila chuma chamwaza chiyovo. Kalinwomu useme mwana. Kaha mukamuluka ngwove ikiye Yesu.’

Ngavalyele nawa ngwenyi: ‘Ou mwana mwakapwa wamulemu, kaha navakamuvulukanga ngwavo MwanaKalunga waKulitulaho. Yehova mwakamupwisa mwangana ngana mwapwile Ndavichi. Oloze Yesu mwakapwa mwangana wahaya myaka yosena, nawangana wenyi kaweshi kukakumako!’

Maliya ngwenyi: ‘Ocho nachipwa ngachilihi ngocho? Ami kanda numba vachingumbate. Ami kanda nguchilimone nalunga, nyi mwana nangupwa nenyi ngachilihi?’

Ngavalyele ngwenyi: ‘Ngolo jaKalunga najiza halyove. Shikaho ou mwana navakamuvuluka ngwavo MwanaKalunga.’ Jino mwalweza Maliya ngwenyi: ‘Unanuka kausoko kove Elizaveta. Vatu vavulukilenga ngwavo nashinakajiwa chikuma keshi kukasema vanako. Oloze kalinwomu aseme mwana. Shikaho tala, kakweshi chuma mwahona kulinga Kalungako.’

Hoho vene Maliya ngwenyi: ‘Ngundungo yaYehova! Chipwenga kuli yami ngana muunahanjika.’ Kangelo himwaya.

Maliya hikuya lumbushi kuli Elizaveta. Elizaveta hakwivwa lizu lyaMaliya, kemba mwalyungununa mujimo lyaElizaveta. Elizaveta nazale nashipilitu yaKalunga, kaha himwamba kuli Maliya ngwenyi: ‘Ove unatokwa muli mapwevo.’ Maliya himwatwama naElizaveta tukweji vatatu, nakukinduluka cheka kwimbo kuNazaleta.

Maliya ali kwakamwihi nakusomboka kuli lunga walijina lyaYosefwe. Oloze Yosefwe hakwijiva ngwenyi Maliya nemita, himwafwila ahone kumumbata. Jino kangelo kaKalunga mwamwamba ngwenyi: ‘Kanda mwivwa woma wakumumbata pwevo lyove Maliyako. Mwomwo Kalunga ikiye namuhane mwana.’ Kaha Maliya naYosefwe hikulimbata, nakuvandamina Yesu asemuke.

Luka 1:26-56; Mateu 1:18-25.



Vihula

  • Ou pwevo ali hamuvwimbimbi ikiye iya?
  • Vyuma muka Ngavalyele alwezele Maliya?
  • Ngavalyele alumbunwine ngachilihi kuli Maliya ngwenyi mwakapwa namwana numba tuhu kanda alimone nalunga?
  • Vyuma muka vyasolokele omu Maliya ayile kuli kausoko kenyi Elizaveta?
  • Vyuma muka ashinganyekele Yosefwe omu evwile ngwavo Maliya nemita, oloze mwomwo ika alumwine vishinganyeka vyenyi?

Vihula vyakuhakilako

  • Tanga Luka 1:26-56.

    Mukanda waLuka 1:35 wasolola ika kutalisa kushili yaAlama yapwile mukaliulu kalusemo kamujimo lyaMaliya omu kuyoya chaMwanaKalunga vachinungulwile kufuma mwilu? (Hangai 2:11-13; Yowa. 6:69; Hepe. 7:26; 10:5)

    Yesu vamuvumbikile ngachilihi omu apwile mujimo? (Luka 1:41-43)

    Chakutalilaho muka chamwaza Maliya asela vaka-Kulishitu makumbi ano vaze vatwama namilimo yakulipwila? (Luka 1:38, 46-49; 17:10; Vishi. 11:2)

  • Tanga Mateu 1:18-25.

    Numba tuhu Yesu kavamulukile ngwavo Emanweleko, oloze ateselemo ngachilihi ulumbunwiso walijina kana omu apwile hamavu? (Mateu 1:22, 23; Yowa. 14:8-10; Hepe. 1:1-3)