TALA chuma chaukenya chili nakulingiwa! Vali nakujiha Yesu. Vanamuhake hachitondo. Vanamutuu jimbambo mumavoko navilyachilo. Ikaze vatu vanakumulingila Yesu ngana?

Yesu ali nakufwa

Mwomwo vatu vamwe kavazanga Yesuko. Unavejiva tahi? Umwe wavo ikiye kangelo wakuhuka Satana Liyavolo. Ikiye ahungumwishile Alama naEve numba valikange kuli Yehova. Satana ikiye nawa alingishile vaka-kole jaYesu kulinga chumechi chaukenya.

Numba shimbu kanda Yesu vamupapalile hachitondo, vaka-kole jenyi vamulingile vyuma vyavipi. Unanuka muze vejile mumilemba yaNgetesemane nakumumbata, ngwetu? Vaka-kole kana vapwile veya? Eyo, vapwile vatwamina vamukwitava. Chamwaza, tutalenu vyuma navisoloka cheka.

Omu vanambate Yesu kuli vatwamina vamukwitava, vaposetolo jenyi hinavachina. Vanamuseze Yesu uka wenyi navaka-kole, mwomwo yawoma. Oloze kaposetolo Petulu naYowano kavayile kwakusukuko. Vanakukava vamone vyuma navisoloka kuli Yesu.

Vapilishitu hikutwala Yesu kuli chilolo Anase uze apwilenga kapilishitu wakulitulaho. Nakushimbula chiku vatu hikufumako. Kufumaho Yesu navamutwala nawa kuzuvo yaKayafwase, uze ali jino kapilishitu wakulitulaho. Kuzuvo yenyi kukiko kunalikungulwila vatwamina vamukwitava vavavulu.

Kaha navamusopesa muzuvo yaKayafwase. Vanasanyika vatu navamuvangijikila Yesu. Vatwamina vamukwitava vosena ngwavo: ‘Yesu atela kufwa.’ Jino hikumufwijila kumeso, nakumulukula jikonyi.

Shimbu vinakulingiwa vyuma kana, Petulu ali muchipango haweluka wazuvo. Vatu vanawiki kakahya mwomwo yachishika naufuku. Omu vanakwota kulijiko, pwevo muka-kulama kuchikolo mwamushishika Petulu, kaha ngwenyi: ‘Ou lunga nayikiye apwanga naYesu.’

Petulu ngwenyi: ‘Nduma, keshi yamiko!’

Petulu hinavamwamba katatu kuvatu nge muvapwilanga naYesu. Oloze Petulu katatu kosena kakulihamika lika. Petulu hakulihamika kamuchitatu, Yesu mwalumuka nakumutala. Petulu ushona wamukwate hakulyonga, kaha hikulovoka nakulila.

Omu likumbi lyaputuka kututuka haChitanu nachimene, vapilishitu hinavamutwala Yesu kuzango yavo yayinene, yaSunendeline. Kuno jino navashimutwila mwakumulingila. Hikumutwala kuli Pondeu Pilatu, nguvulu kuYuleya.

Vapilishitu navalweza Pilatu ngwavo: ‘Ou mutu wamupi. Atela kufwa.’ Pilatu hakukumisa kumuhulisa Yesu vihula, himwamba ngwenyi: ‘Ami kangwamuwanyine namulongako.’ Jino Pilatu hikumutuma Yesu kuli Helote Andepa. Helote ikiye nguvulu wakuNgalileya, oloze anakutwama muYelusalema. NaHelote nahono hakumuwanyina Yesu namulonga, kaha hikumukindulwisa cheka kuli Pilatu.

Pilatu anakusaka amweche Yesu. Oloze vaka-kole jaYesu navasaka vavechele funge weka keshi ikiyeko. Ou chihwanga ikiye Mbalapa. Pilatu nalovola Yesu haweluka kafwe nalwola lwamusana chikuma. Himwamba vatu ngwenyi: ‘Talenu! Mwangana wenu!’ Oloze vapilishitu vakulitulaho hinavatambakana ngwavo: ‘Etu kumuzanga chiku! Mujihenu! Mujihenu!’ Ngocho Pilatu hikwecha Mbalapa, nakumbata Yesu vakamujihe.

Kuchiteuko chahaChitanu Yesu hikupapalilayo hachitondo. Kujisali jaYesu josena jivali vanapapalilako nawa vihwanga havitondo vafwenga, oloze kaweshi uvamone hamuvwimbimbiko. Shimbu Yesu kanda achifwe, chihwanga umwe ngwenyi: ‘Ukangwanuke omu naukeza muwangana wove.’ Yesu ngwenyi: ‘Nangukulweza ngwami naukatwama nayAmi hamwe muPalachise.’

Unwelu kalweshi lushiko lwamwazako nyi? Unayijiva palachise ali nakuvuluka Yesu? Palachise atungile Kalunga hakulivanga yapwile kulihi? Eyo, yapwile hano hamavu. Kahomu mwakayula Yesu mwamwangana mwilu, mwakasangula lunga kanou akeze nakulivwisa kuwaha Palachise yahano hamavu. Uno katwatela kuwahililako nyi?

Mateu 26:57-75; 27:1-50; Luka 22:54-71; 23:1-49; Yowano 18:12-40; 19:1-30.



Vihula

  • Iya chikupu alingishile Yesu vamujihe?
  • Vaposetolo valingile ika omu Yesu vamumbachile kuli vatwamina vamukwitava?
  • Vyuma muka vyasolokele kuzuvo yakapilishitu wakulitulaho Kayafwase?
  • Mwomwo ika Petulu alovokelele nakulila?
  • Omu Yesu vamukindulwishile kuli Pilatu, vapilishitu vakulitulaho vatambakanyine ngwavo ika?
  • Vyuma muka vyasolokele kuli Yesu halikumbi lyaChitanu hachiteuko, kaha vyuma muka ashikile chihwanga umwe uze vapapalile hachitondo kwakamwihi nayikiye?
  • Palachise yize ahanjikile Yesu nayikapwila kulihi?

Vihula vyakuhakilako

  • Tanga Mateu 26:57-75.

    Mujila muka vatu vamuzango yayinene yavaYuleya vasolwele nge vapwile namichima yayipi? (Mateu 26:59, 67, 68)

  • Tanga Mateu 27:1-50.

    Mwomwo ika natwambila ngwetu chize kupihilila evwile Yuta kachapwile chamwenemweneko? (Mateu 27:3, 4; Mako 3:29; 14:21; Koli. 2, 7:10, 11)

  • Tanga Luka 22:54-71.

    Vyuma muka natulinangula kuli Petulu hakukana Yesu haufuku vamukwachile? (Luka 22:60-62; Mateu 26:31-35; Koli. 1, 10:12)

  • Tanga Luka 23:1-49.

    Yesu alingile ika hakumulinga mwamupi, kaha natulinangula ika kuchuma kana? (Luka 23:33, 34; Loma 12:17-19; Petu. 1, 2:23)

  • Tanga Yowano 18:12-40.

    Vyuma muka vyasolola nge numba tuhu Petulu evwile woma wavatu hakashimbu kakandende, oloze azamine nakupwa kaposetolo wakulipwila? (Yowa. 18:25-27; Koli. 1, 4:2; Petu. 1, 3:14, 15; 5:8, 9)

  • Tanga Yowano 19:1-30.

    Yesu amwenenga ngachilihi vyuma vyakumujimba? (Yowa. 2:1, 2, 9, 10; 19:23, 24; Mateu 6:31, 32; 8:20)

    Mazu ahanjikile Yesu omu apwile hakamwihi nakufwa asolola ngachilihi nge akundwijile wata waYehova? (Yowa. 16:33; 19:30; Petu. 2, 3:14; Yowa. 1, 5:4)