VATU makombakaji hikutambuka ungeji wausuku kufuma kuMbavilone nakuya kuYelusalema. Hakuheta, kuwana Yelusalema yalyenyeka lyehi chikuma. Kamwatwama numba mutuko. VaIsalele vatela kutunga cheka vyosena.

Chatete kutunga shina lijiko lyakulumbila. Hakiko hakulumbila wana watunyama vakuvatula, kuli Yehova. Hatukweji vavandende, vaIsalele hikuputuka kutunga tembele. Oloze vaka-kole vamumafuchi vanalihate nawo kavasakile vaIsalele vayitungeko. Kaha hinavavevwisa woma mangana valitwamine. Kutwala muze, vaka-kole hikulweza mwangana wavaka-Peleja wamuhya atunge lushimbi lwakukanyisa mulimo wakutunga.

Myaka chiyihita. Jino hanahichi lyehi myaka 17 kufuma haze vaIsalele vafumine kuMbavilone. Yehova mwatuma tupolofweto twenyi vaHangai naZekaliya vayenga nakulweza vatu vaputuke kutunga cheka. Vatu hinavafwelela kukafwa chaKalunga, nakwitava mazu atupolofweto. Hikuputuka kutunga cheka, numba tuhu lushimbi kalwetavishileko.

Shikaho nguvulu yavaka-Peleja, Tatenai, hikwiza nakuhulisa vaIsalele kuvanawane lisesa lyakutunga tembele. VaIsalele ngwavo omu vapwile muMbavilone, Mwangana Kuluse avambile ngwenyi: ‘Yenu, jino, kuYelusalema mukatunge tembele yaYehova, Kalunga kenu.’

Tatenai hikutuma mukanda kuMbavilone nakuhulisa nge chapundu mwahanjikile mbozo, Kuluse. Nakushimbula chiku mukanda we-e kufuma kuli mwangana wavaka-Peleja. Ngwawo mukiko chikupu mwambile Kuluse. Kaha mwangana himwasoneka ngwenyi: ‘Vechenu vaIsalele vatunge tembele yaKalunga kavo. Ngunamitumu muvakafweko.’ Mumyaka kafwe yiwana tembele hikuyikumisa, kaha vaIsalele vanawahilila chikuma.

Hinahahita myaka yayivulu. Hanahichi jino kafwe myaka 48 kufuma haze vakumishile kutunga tembele. Vatu muYelusalema vakuhutwa, kaha nganda natembele yaKalunga kayeshi nakusoloka kanawako. Jino kuMbavilone, kaIsalele Ezela mwashinganyeka vyakuwahisa tembele yaKalunga. Unatachikiza chuma mwalinga tahi?

Ezela hikuya nakumona mwangana waPeleja, Alatakaseleke, kahou mwangana wamwaza himwamuhana Ezela mawana amavulu akutwala kuYelusalema. Ezela mwalomba vaIsalele vali muMbavilone vamukafwe kutwala mawana kana kuYelusalema. Kafwe vatu 6,000 navetavila kuya. Vali napalata naulu yayivulu navikumba vikwavo vyandando vatela kumbata.

Ezela nalizakamina, mwomwo jila navaya yatwama navatu vavapi. Ava vatu vanahase kuvanyanga palata naulu, nakuvajiha. Shikaho Ezela hikusanyika vakunguluke, nge muuli nakumona hamuvwimbimbi. Kaha hinavalomba kuli Yehova avakinge haungeji wavo wausuku wakukinduluka kuYelusalema.

Ezela navatu vali nakulomba

Yehova hikuvakinga. Hakutambuka tukweji vawana, hinavalitula muYelusalema vavatonyi. Kutalechi kachasolwele nge Yehova nahase kukinga vatu navafwelela ngwavo mwavakafwa nyi?

Ezela tupetulu 2 swi naku 8.



Vihula

  • Vatu vangahi vafumine muMbavilone nakukinduluka kuYelusalema, oloze vyuma muka vakawanyine kuze?
  • VaIsalele vaputukile kutunga ika omu vahetele kuze, oloze vaka-kole javo valingile ika?
  • Hangai naZekaliya vapwile veya, kaha vyuma muka valwezele vatu?
  • Mwomwo ika Tatenai atuminyine mukanda kuMbavilone, kaha vamukumbulwile ngwavo ika?
  • Ezela alingile ika omu ashinganyekele vyakuwahisa tembele yaKalunga?
  • Kweseka nou muvwimbimbi Ezela alombele ika, kaha kulomba chenyi vachikumbulwile ngachilihi, kaha vyuma muka natulinangulaho?

Vihula vyakuhakilako

  • Tanga Ezela 3:1-13.

    Nge lwola lumwe tuli kuchihela kuze kakweshi chikungulwilo chavatu jaKalungako, kaha twatela kutwalaho lika kulinga ika? (Ezela 3:3, 6; Vili. 17:16, 17; Hepe. 13:15)

  • Tanga Ezela 4:1-7.

    Vatu jaYehova vatela kulinangula ika kuli Zeluvavele kutalisa kukulikata navatu vamukwitava chamakuli? (Kulo. 34:12; Koli. 1, 15:33; Koli. 2, 6:14-17)

  • Tanga Ezela 5:1-5, 17 na 6:1-22.

    Mwomwo ika vaka-kwimanyina vatu jaKalunga nakole vahonene kwimika mulimo wakutunga tembele? (Ezela 5:5; Isa. 54:17)

    Vyuma valingile vakulwane vavaYuleya vinahase kukolezeza ngachilihi vakulwane vaka-Kulishitu valombenga kuli Yehova avakafwe nge vanavemanyina nakole? (Ezela 6:14; Samu 32:8; Loma 8:31; Yako. 1:5)

  • Tanga Ezela 8:21-23, 28-36.

    Shimbu kanda tulinge vyuma vimwe, chakutalilaho muka chamwaza chaEzela twatela kukavangiza? (Ezela 8:23; Samu 127:1; Vishi. 10:22; Yako. 4:13-15)