KAFWE myaka yivali yinahichi kufuma haze Mbavilone vayitambwile kuli vaMete navaka-Peleja. Tala vinakusoloka jino! Eyo, vaIsalele vanakulovoka muMbavilone. Vasokokele ngachilihi? Iya avasuwile?

Mwangana wavaPeleja, Kuluse ikiye avasuwile. Shimbu kanda Kuluse asemuke, Yehova alingishile kapolofweto kenyi Isaya asoneke ngwenyi: ‘Naukalinga vyuma ngunasake ukalinge. Vikolo navakaviseza vyawashi mangana nganda ukayifungulule.’ Kaha Kuluse ikiye apwile twamina hakuya nakufungulula Mbavilone. VaMete navaka-Peleja vengilile munganda naufuku muvikolo vasele vyawashi.

Oloze kapolofweto kaYehova, Isaya, ambile nawa ngwenyi Kuluse mwakahana lushimbi lwakutungulula Yelusalema natembele. Kutala Kuluse ahanyine lushimbi kanolu nyi? Eyo, ahanyine. Kuluse mwalweza vaIsalele ngwenyi: ‘Yenu, oholyapwa, kuYelusalema nakutunga tembele yaYehova, Kalunga kenu.’ Kaha omu mukiko vanakuya nakulinga ava vaIsalele.

VaIsalele vali nakufuma muMbavilone

Oloze keshi nge vaIsalele vosena muMbavilone navahasa kutambukou ungeji wausuku wakukinduluka kuYelusalemako. Hitunda yayisuku chiyovo, kafwe jikilomita 800 kaha vavavulu kaveshi vahaseko mwomwo yaushinakaji chipwe kuviza. Kuli vyeka nawa navihonesa vamwe kuya. Jino Kuluse mwalweza vaze vanahono kuya ngwenyi: ‘Hanenu palata naulu namawana akwavo kuvatu vanakukinduluka vakatunge Yelusalema natembele.’

Kaha vaIsalele vanakuya kuYelusalema hikuvahana aze mawana amavulu vambate. Kaha nawa, Kuluse himwahana malonga najipasa vize ambachile Mwangana Nevukataneza mutembele yaYehova omu enyekele Yelusalema. Vatu vali navyuma vyavivulu vyakumbata.

Hakutambuka tukweji vawana, vaIsalele hiwasha kuYelusalema halwola lwakutamo. Hanahichi chikupu myaka 70 kufuma haze venyekele nganda, nakuyiseza yakuhona vatu. Oloze numba vaIsalele vanakinduluka mulifuchi lyavo, ukalu hanga navaumona lika, nge munatulinangula muchihande chinakavangizaho.

Isaya 44:28; 45:1-4; Ezela 1:1-11.



Vihula

  • Nganomu vanasolola hamuvwimbimbi, vaIsalele vali nakulinga ika?
  • Kuluse ateselemo ngachilihi upolofweto waYehova uze ahanjikile kuhichila muli Isaya?
  • Kuluse alwezele ika vaIsalele vaze kavahashile kukinduluka kuYelusalemako?
  • Vyuma muka Kuluse ahanyine vatu vayenga navyo kuYelusalema?
  • VaIsalele vatambukile tukweji vangahi numba vahete kuYelusalema?
  • Mwahichile myaka yingahi kufuma haze venyekele nganda kana?

Vihula vyakuhakilako

  • Tanga Isaya 44:28 na 45:1-4.

    Yehova asolwele ngachilihi nge upolofweto wakuvuluka Kuluse naukatesamo chikupu? (Isa. 55:10, 11; Loma 4:17)

    Upolofweto waIsaya wakuvuluka Kuluse wasolola ngachilihi nge Yehova Kalunga akwechi ngolo jakutachikiza vyuma vyakulutwe? (Isa. 42:9; 45:21; 46:10, 11; Petu. 2, 1:20)

  • Tanga Ezela 1:1-11.

    Hakukavangiza chakutalilaho chavaze vahonene kukinduluka kuYelusalema, nayetu makumbi ano tunahase ‘kukolezeza ngachilihi mavoko’ avaze vanakusaka kuzata mulimo washimbu yosena? (Ezela 1:4, 6; Loma 12:13; Kolo. 4:12)