MAMA yami! Chinakusoloka nge Ndanyele ali muukalu waunene. Oloze vandumba kaveshi nakumulyako! Unatachikiza vivanahonena tahi? Uno iya nambili Ndanyele muno muli vandumba ngana? Tuwanenu chalingishile.

Ndaliu ikiye jino ali hawangana waMbavilone. Namuzange chikuma Ndanyele mwomwo apwa walikoji namangana. Ndaliu mwatongola Ndanyele kupwa mukulwane wavaka-kuyula muwangana wenyi. Echi chalingishile vakwavo vamuwangana kumwivwila Ndanyele lwiso, ngocho hinavalinga ngana.

Ndaliu

Hikuya kuli Ndaliu ngwavo: ‘Ove mwangana, tunalivwasana ngwetu utunge lushimbi lwakwamba nge hamakumbi 30 wauchi mutu atela kulomba kukalunga chipwe mutu wekako, kuvanga Ove mwangana kaha. Nge mutu kate kwononoka, kaha vakamumbile muwina wavandumba.’ Ndaliu kwijiva chuma vanakusakila kupwenga lushimbi kana, nduma. Ikiye nevu nge lushimbi lwamwaza, ngocho lushimbi kana alusonekele. Kaha lushimbi kana kulwalumuna chiku.

Ndanyele hakulwivwa lushimbu kana, hikuya kuzuvo nakulomba, muze mwenyi mwamwaka. Vatu vavapi vanatachikiza ngwavo Ndanyele keshi kuhasa kwecha kulomba kuli Yehovako. Vanawahilila, mwomwo vanamono jino ngwavo jila yavo yakumujihilamo Ndanyele yinasoloka.

Mwangana Ndaliu hakwijiva ovyo vasakilanga ava malunga kutunga lushimbi kana, himwanyengetela chikuma. Oloze mwakwalumwina lushimbi mwauchi, shikaho kuvanga vene Ndanyele amusuule vamumbile muwina wavandumba. Oloze mwangana mwalweza Ndanyele ngwenyi: ‘Ngwafwelela Kalunga kove, ou weji kuzachilanga, mwakuyovola.’

Ndaliu tulo pimbi naufuku mwomwo yaushona. Lichako nachimene anguhwishile nakuya kuwina wavandumba. Unakumumona uze, kuze. Mwavilika ngwenyi: ‘Ove Ndanyele, ngamba yaKalunga wakuyoya! Kalunga kove weji kuzachilanga nakuyovola kuvandumba tahi?’

Ndanyele ali muwina wavandumba

Ndanyele ngwenyi: ‘Kalunga natumu kangelo kenyi nakusoka kutunwa twavandumba kuchina navangulya.’

Mwangana nawahilila chikuma. Hikwamba ngwenyi Ndanyele vamufumise muwina. Jino himwambata malunga vavapi vasakanga kujiha Ndanyele nakuvambila kuvandumba. Shimbu kanda vachihete kumavu awina, vandumba hikuvakwata nakuvahokwojola vifuhwa.

Jino Mwangana Ndaliu mwasoneka kuvatu vosena vamuwangana wenyi ngwenyi: ‘Ngunahane lushimbi ngwami vatu vosena vatela valemesenga Kalunga kaNdanyele. Eji kulinga vyuma vyakukomwesa vyavinene. Nayovola Ndanyele kuhona kumulya kuvandumba.’

Ndanyele 6:1-28.



Vihula

  • Ndaliu ikiye iya, kaha amwenenga ngachilihi Ndanyele?
  • Vatu vamwe valwiso valwezele Ndaliu alinge ika?
  • Ndanyele alingile ika omu evwile lushimbi lwaluhya?
  • Mwomwo ika Ndaliu evwililile ushona nakuhona kusavala tulo, kaha lyacheleko nachimene alingile ika?
  • Ndanyele akumbulwile ngachilihi Ndaliu?
  • Vyuma muka vyasolokele kuvatu vavapi vaze vasakile kujihisa Ndanyele, kaha Ndaliu asonekelele ika vatu vosena vamuwangana wenyi?

Vihula vyakuhakilako

  • Tanga Ndanyele 6:1-28.

    Mujimbu wakufumbukila Ndanyele weji kutwanukisanga ngachilihi vyuma veji kulinganga vaka-kutwimanyina nakole hakusaka kuhonesa mulimo wetu makumbi ano? (Ndanye. 6:7; Samu 94:20; Isa. 10:1; Loma 8:31)

    Vangamba jaKalunga makumbi ano navalondezeza ngachilihi Ndanyele hakuliluula kuli “vaze vali nangolo jakuyula”? (Ndanye. 6:5, 10; Loma 13:1; Vili. 5:29)

    Natulondezeza ngachilihi Ndanyele hakuzachila Yehova “makumbi osena”? (Ndanye. 6:16, 20; Fwili. 3:16; Kuso. 7:15)