UNATACHIKIZA chuma anakulombela ou lunga kuli Yehova tahi? Natanjikila ika mikanda kulijiko lyaYehova lyakulumbila? Ou lunga ikiye Hezekiya. Ikiye mwangana wamiyachi yivali yakusulo yaIsalele. Kaha ali muukalu waunene. Mwomwo ika?

Mwangana Hezekiya ali nakulomba

Mwomwo maswalale vavaSulya vanenyeka lyehi miyachi yakunote 10. Yehova echele vavazangamise mwomwo vapwile vatu vavapi chikuma. Jino maswalale vavaSulya vaneza nakulwa nawangana wamiyachi yivali.

Mwangana waSulya namutumina Mwangana Hezekiya mikanda. Yikiko mikanda nahake kumeso aKalunga. Mikanda kana yakusaula Yehova, nakumulweza Hezekiya alitwamine tuhu. Shikaho Hezekiya anakulomba ngwenyi: ‘Ove Yehova, tulwile kuli mwangana waSulya. Mangana vaka-mafuchi osena vatachikize ngwavo ove uka wove uKalunga.’ Kutala Yehova mwamwivwilila Hezekiya nyi?

Hezekiya himwangana wamwaza. Kalifwanyine navamyangana vavapi vawangana wamiyachi yaIsalele 10, chipwe mwaise Ahaze, Mwangana wamupiko. Hezekiya napunga nakukavangiza kanawa jishimbi jaYehova josena. Shikaho, Hezekiya hakukumisa kulomba, kapolofweto Isaya hikumutumina mujimbu unafumu kuli Yehova ngwenyi: ‘Mwangana waSulya keshi kukengila muYelusalemako. Kakweshi kukapwe numba liswalale lyenyi umwe mwakeza kukamwihiko. Numba mwivwi kaveshi kukawasa mungandako.’

Achitale hamuvwimbimbi halifwo lino. Unavejiva ava maswalale vakufwa vosena? Vakivo vaSulya. Yehova atumine kangelo kenyi nakwiza nakujiha maswalale javaSulya 185,000 naufuku. Kaha mwangana waSulya hikukinduluka kwimbo.

Maswalale vavaAsulya vanafu

Wangana wamiyachi yivali vanaupululula, kaha vatu hikutwalaho nakutwama mukuunda chachindende cheka. Omu nafu Hezekiya, mwanenyi Manase himwamuswana. Manase namwanenyi Amone amuswanyine, hivamyangana vavapi chikuma. Ngocho lifuchi hinalizala cheka nauhwanga naulyanyi. Omu Mwangana Amone vanamutape kuli vangamba jenyi, mwanenyi Yoshiya himwapwa mwangana wawangana wamiyachi yivali.

Vamyangana 2, 18:1-36; 19:1-37; 21:1-25.



Vihula

  • Ou lunga ali aha hamuvwimbimbi ikiye iya, kaha mwomwo ika ali muukalu?
  • Mikanda muka nahake Hezekiya kumeso aKalunga, kaha ali nakulomba ika?
  • Hezekiya apwile mwangana wangachilihi, kaha Yehova amulwezele ika kuhichila muli kapolofweto Isaya?
  • Kangelo kaYehova alingile ika kuli vaAsulya, nganomu unasolola muvwimbimbi?
  • Numba tuhu wangana wamiyachi yivali wapwile mukuunda halwola lwalundende, oloze vyuma muka vyasolokele omu Hezekiya afwile?

Vihula vyakuhakilako

  • Tanga Vamyangana 2, 18:1-36.

    Uno Lavashake uze apwile muka-kuhanjikilako vaAsulya asakile ngachilihi kuzeyesa lufwelelo lwavaIsalele? (Vamya. 2, 18:19, 21; Kulo. 5:2; Samu 64:3)

    Vinjiho jaYehova veji kulondezezanga ngachilihi chakutalilaho chaHezekiya hakutwama navatu vaze veji kuvafumbukilanga? (Vamya. 2, 18:36; Samu 39:1; Vishi. 26:4; Chimo. 2, 2:24)

  • Tanga Vamyangana 2, 19:1-37.

    Vatu jaYehova makumbi ano veji kulondezezanga ngachilihi Hezekiya nge vali muukalu? (Vamya. 2, 19:1, 2; Vishi. 3:5, 6; Hepe. 10:24, 25; Yako. 5:14, 15)

    Uno Mwangana Senakelive vamufungulwile ngachilihi mapapa katatu, kaha emanyinako iya? (Vamya. 2, 19:32, 35, 37; Kuso. 20:2, 3)

  • Tanga Vamyangana 2, 21:1-6, 16.

    Mwomwo ika natwambila ngwetu Manase apwile mwangana wamupi sulumunu havamyangana vosena vayulile muYelusalema? (Miji. 2, 33:4-6, 9)