OU UKIKO muvwimbimbi wapalachise yize pamo Kalunga amwenesele kapolofweto kenyi Isaya. Isaya apwileko kufuma chindende kaha hakufwa chaYona.

Vatu vali muPalachise

Palachise yalumbununa “litepa” chipwe “milemba.” Kutala yinakwanukisa chuma chimwe twamonanga lyehi mumukanda uno nyi? Yinakusoloka kwijiva nge milemba yamwaza yize Yehova Kalunga atungilile vaAlama naEve, nyi chiku? Uno kaye kosena nakakapwa palachise tahi?

Yehova alwezele kapolofweto Isaya asoneke vyakwiza chapalachise yayihya yavatu jaKalunga. Ngwenyi: ‘Tungunge navakatwamanga navana vamikoko hamwe mukuunda. Vana vavangombe navana vavandumba navakalyanga hamwe, kaha vanyike vavandende navakavalamanga. Numba kemba kaveshi kukamusumako nge mwakahemena hawina walinoka waulembe.’

Vatu vavavulu ngwavo: ‘Echi kacheshi kuhasa kalingiwako. Lamba lyapwa lyamwaka hano hamavu, kaha nalikatwalaho lika.’ Oloze achishinganyeke: Limbo lyamuyachi muka Kalunga ahanyine vaAlama naEve?

Kalunga ahakile vaAlama naEve mupalachise. Hakuhona kwononoka Kalunga hakiko vajimbalishile limbo lyavo lyamwaza, kaha vashinakajiwile nakufwa. Kalunga nashiki kukahana vatu vamuzanga vyuma vize vene vajimbalishile vaAlama naEve.

Mupalachise inakwiza nachuma nachikalemekanga chipwe kwenyeka chauchi. Nakukapwa kuunda chakukupuka. Vatu vosena navakapwa vape, vakuwahilila. Nachikapwa ngana vene muze Kalunga asakile kachi chipwenga hakuputuka. Oloze kanda numba tulinangule mumwakalinga Kalunga ngocho.

Isaya 11:6-9; Kusoloka 21:3, 4.



Vihula

  • Isaya apwile iya, apwileko lwola muka, kaha Yehova amumwenesele ika?
  • Lizu “palachise” lyalumbununa ika, kaha linakukwanukisa ika?
  • Vyuma muka Yehova alwezele Isaya asoneke kutalisa kuPalachise yayihya?
  • Mwomwo ika Alama naEve vajimbalishile limbo lyavo lyamwaza?
  • Vyuma muka Yehova ashika vatu vaze vamuzanga?

Vihula vyakuhakilako

  • Tanga Isaya 11:6-9.

    Mazu aKalunga asolola ngachilihi omu vatu natunyama navakatwama hamwe mukuunda mulifuchi lyalihya? (Samu 148:10, 13; Isa. 65:25; Ezeke. 34:25)

    Mazu aIsaya ali nakutesamo ngachilihi kushipilitu kuli vatu jaYehova makumbi ano? (Loma 12:2; Efwe. 4:23, 24)

    Iya ali nakwalumuna vilinga vyavatu makumbi ano uze nawa mwakalumuna vilinga vyavatu mulifuchi lyalihya? (Isa. 48:17, 18; Ngale. 5:22, 23; Fwili. 4:7)

  • Tanga Kusoloka 21:3, 4.

    Visoneka vyasolola ngachilihi nge Kalunga ali nakutwama navatu muchifwanyisa oholyapwa hamavu? (Levi 26:11, 12; Miji. 2, 6:18; Isa. 66:1; Kuso. 21:2, 3, 22-24)

    Masoji muka nakukola vize navakafumisako? (Luka 8:49-52; Loma 8:21, 22; Kuso. 21:4)