NGE wafwanga, noko nahase kwivwa ngachilihi nge vanakusangula? Mwawahilila chiyovo! Uno mutu nafu nahase kuyoya cheka nyi? Uno chasolokaho lyehi tahi?

Achitale ou lunga, nou pwevo nakanyike. Ou lunga ikiye kapolofweto Elija. Ou pwevo ikiye tuliwe wamunganda yaZalefwate, kahou kanyike himwanenyi. Enga, likumbi limwe kanyike naputuka kuviza. Misongo chiyitohwa lika swi nomu nafu. Elija mwalweza pwevo ou ngwenyi: ‘Nguhane ou kanyike.’

Tuliwe namwanenyi vanasangula vali hamwe naElija

Elija himwatwala mwana wakufwa muzuvo yahelu nakumusavalika hakahela. Jino mwalomba ngwenyi: ‘Ove Yehova, achilingise kanyike ayoye cheka.’ Kaha kanyike hikuputuka kuhwima! Elija mwamushikumwisa muzuvo yahelu nakulweza naye ngwenyi: ‘Tala, mwanove nayoyo lyehi!’ Shikaho naye nawahilila ngana.

Kapolofweto mukwavo wamulemu waYehova ikiye Elisha. Ikiye muka-kukafwa Elija. Jino Yehova mwazachisa nawa Elisha alinge vyuma vyakukomwesa. Likumbi limwe Elisha nayi kunganda yaShuneme, kwatwama pwevo amutala nalikoji chikuma. Kaha pwevo kanou mwasema mwana walunga.

Chimene chimwe, oho nakolo lyehi, himwaya naise nakuzata kuwande. Kukasumuka kanyike miteto salu ngwenyi: ‘Mutwe wami unakukola!’ Omu vanamutwale kuzuvo, kanyike hikufwa. Naye ocho kunyengetela kana! Hoho vene hikuya nakusaka Elisha.

Omu neza Elisha, hikwingila muzuvo muli kanyike wakufwa. Mwaputuka kulomba kuli Yehova, nakusavala hali mwana. Nakushimbula chiku, mujimba wakanyike hinauzuma, himwachehula katanu nakavali. Naye ocho kuwahilila kana hakwingila nakuwana mwanenyi wamutonyi!

Vatu vavavulu vanafu. Echi chinalingisa jitanga namasepa javo kunyengetela chikuma. Katweshi nangolo jakusangula vafuko. Oloze Yehova atwama najo. Kanda numba tulinangule mumwakasangula vatu jimiliyoni.

Vamyangana 1, 17:8-24; Vamyangana 2, 4:8-37.


Vihula

  • Ava vatu vatatu vali hamuvwimbimbi vakivo veya, kaha vyuma muka vyasolokele kuli uze kanyike?
  • Vyuma muka alombele Elija kuli Kalunga hali uze kanyike, kaha vyuma muka vyasolokele?
  • Mutu akafwilenga Elija ikiye iya?
  • Elisha vamusanyikilile ika kuzuvo yapwevo wakuShuneme?
  • Elisha alingile ika, kaha vyuma muka vyasolokele kuli uze kanyike afwile?
  • Yehova akwechi ngolo muka, nganomu ajisolwele kuhichila muli Elija naElisha?

Vihula vyakuhakilako

  • Tanga Vamyangana 1, 17:8-24.

    Uno kwononoka chaElija nalufwelelo lwenyi vavyesekele ngachilihi? (Vamya. 1, 17:9; 19:1-4, 10)

    Mwomwo ika lufwelelo lwatuliwe wakuZalefwate lwapwile lwakulipwila? (Vamya. 1, 17:12-16; Luka 4:25, 26)

    Mujimbu watuliwe wakuZalefwate wasolola ngachilihi muchano wamazu aYesu vasoneka hali Mateu 10:41, 42? (Vamya. 1, 17:10-12, 17, 23, 24)

  • Tanga Vamyangana 2, 4:8-37.

    Pwevo wakuShuneme atunangula ika hamuchima wazumbu? (Vamya. 2, 4:8; Luka 6:38; Loma 12:13; Yowa. 1, 3:17)

    Mujijila muka tunahase kusolwelamo likoji kuli vangamba jaKalunga makumbi ano? (Vili. 20:35; 28:1, 2; Ngale. 6:9, 10; Hepe. 6:10)