WAVATACHIKIZA ava malunga novyo vanakulinga tahi? Vanakuya kujita, kaha malunga vali kulutwe vanakwimba. Oloze unahase kuhulisa ngwove: ‘Mwomwo ika vaka-kwimba kaveshi najipoko jamikwale namakunga akwashisa jitako?’ Tutalenu kanawa.

VaIsalele vanakuya kujita

Yehoshafwate ikiye jino mwangana wamiyachi yaIsalele yivali. Anakutwama mushimbu yoyimwe naMwangana Ahave naYezevele vawangana wakunote wamiyachi 10. Oloze Yehoshafwate himwangana wamwaza, kaha naise Asa apwile mwangana wamwaza. Shikaho hamyaka yayivulu vatu vamuwangana wakusulo wamiyachi yivali vanakuyoya mwamwaza.

Oloze jino kunasoloka chuma chakwivwisa vatu woma. Tunganda vanalweze Yehoshafwate ngwavo: ‘Maswalale vavavulu vakumafuchi aMowave, aAmone naPili yaSeile vali nakwiza kuli ove nakulwa jita.’ VaIsalele vavavulu hikulikungulula kuYelusalema nakulomba Yehova avakafwe. Hikuya kutembele, kaha Yehoshafwate mwalomba ngwenyi: ‘Ove Yehova Kalunga ketu, katwatachikijile mwakulingilako. Muli etu kamweshi ngolo jakulyasa jita naliyongomena lyavaka-kwasa jita linoko. Meso etu anatale kuli Ove.’

Yehova navevu, nakutuma jino ngamba yenyi umwe alweze vatu ngwenyi: ‘Kulwa jita kana kacheshi chenuko, oloze chaKalunga. Kamweshi kukalwako. Enu talenu kaha, mumone omu mwamilwila Yehova.’

Lichako Yehoshafwate mwalweza vatu ngwenyi: ‘Mufwelelenu Yehova!’ Kumbata jino vaka-kwimba hikuvatetekeza kulutwe lwamaswalale jenyi, kaha oku vanakutambuka oku vali nakwimba nakwalisa Yehova. Unejiva nachisoloka hakuheta kujita? Yehova mwalingisa maswalale vaka-kole valijihe mwavomwavo. VaIsalele hakuheta, kuwana maswalale vosena vanafu!

Kutala Yehoshafwate kalingile mwamanganako hakufwelela Yehova? Nachipwa chamangana nge netu nawa natumufwelelanga Yehova.

Vamyangana 1, 22:41-53; Mijimbu 2, 20:1-30.


Vihula

  • Yehoshafwate ikiye iya, kaha apwileko lwola muka?
  • VaIsalele vevwilile ika woma, kaha vavavulu valingile ika?
  • Yehova akumbulwile ngachilihi kulomba chaYehoshafwate?
  • Shimbu kanda jita, Yehova alingile vyuma muka?
  • Vyuma muka natulinangula kuli Yehoshafwate?

Vihula vyakuhakilako

  • Tanga Mijimbu 2, 20:1-30.

    Yehoshafwate asolwele ngachilihi vyuma vatela kulivanga kulinga vangamba jaKalunga vakushishika nge vali muukalu? (Miji. 2, 20:12; Samu 25:15; 62:1)

    Hakuwana nge Yehova azachishilenga jila yimwe hakulivwasana navatu jenyi, ngocho jila muka ali nakuzachisa makumbi ano? (Miji. 2, 20:14, 15; Mateu 24:45-47; Yowa. 15:15)

    Omu Kalunga mwakaneha ‘jita yahalikumbi lyalinene lyaKalunga Ukwechi ngolo josena,’ vyuma navikalifwana ngachilihi namuze vyapwile kuli Yehoshafwate? (Miji. 2, 20:15, 17; 32:8; Kuso. 16:14, 16)

    Hakulondezeza vaLevi, vapayiniya navamishonali veji kukundwizanga ngachilihi mulimo wakwambulula mukaye kosena? (Miji. 2, 20:19, 21; Loma 10:13-15; Chimo. 2, 4:2)