SHIMBU kanda Ndavichi achifwe, alwezele Solomone mwakutungila tembele yaYehova kweseka nomwo asakile ivene Kalunga. Mumwaka wamuchiwana muwangana wenyi, Solomone mwaputuka kutunga tembele, kaha nahahita myaka yitanu nayivali nachimbwa chamwaka numba yikume. Hatembele hanakuzata vihita vyavatu, kaha zuvo yinafwiki mali amavulu. Mwomwo vanayitungisa chikuma ulu napalata.

twamutavanaku mapapa kavali. Solomone mwahaka chikasha chalushiko mukapete kamukachi katembele, kaha mukapete kakwavo hikuhakamo vyuma vikwavo valaminenga mutavanaku.

Omu vanakumisa tembele, chilika chachinene chinakwate. Solomone kuya hamambuli fuka kulutwe lwatembele nakulomba, nge muuli nakumona hamuvwimbimbi. Solomone mwamba kuli Yehova ngwenyi: ‘Nge lilu nalilu linakukehela, nyize zuvo eyi ngunatungu? Oloze Ove Kalunga kami, achivwilile kulomba chavatu jove chachihela chino.’

Mwangana Solomone ali nakulomba

Solomone hakukumisa kulomba, kakahya hinakafuma mwilu. Hinakocha wana vanawahisa wakanyama wakuvatula. Kaha kumunyika chaYehova jino zwalala mutembele. Chikiko kusolola nge Yehova anakwivwilila, nakwivwila tembele nakulomba chaSolomone kuwaha. Kutembele jino kukiko navayanga vatu nakulemesa Kalunga, keshi kutavanakuko.

Solomone mwayula vatu mwamangana hamyaka yayivulu, vatu chiseke tepu. Jino Solomone hikumbata mapwevo vavavulu vakumafuchi eka vaze kavalemesa Yehovako. Wamumono umwe uze anakulifukula kukaponya nyi? Jino mapwevo kana hinavamulingisa Solomone kulifukula kutulunga veka. Unejiva tahi chuma nachisolokaho Solomone hakulinga ngocho? Mwecha kutetela vatu. Hakukenyuka, vatu jino chiseke chosena ngwaju.

Mwangana Solomone ali nakulemesa kaponya

Yehova napihilila jino naSolomone, kaha ngwenyi: ‘Ngunakukutambula wangana nakuuhana kumutu weka. Kangweshi kulinga chuma kanechi mumakumbi oveko, oloze mushimbu yachiyulo chamwanove. Mwanove nawa kangweshi kukamutambula vatu vosena vawanganako.’ Tutalenu munachipwa.

Mijimbu 1, 28:9-21; 29:1-9; Vamyangana 1, 5:1-18; Mijimbu 2, 6:12-42; 7:1-5; Vamyangana 1, 11:9-13.



Vihula

  • Solomone atungile tembele yaYehova hamyaka yingahi, kaha mwomwo ika yafwikilile jimbongo jajivulu?
  • Tembele kana yapwile natupete vavanene vangahi, kaha vyuma muka vahakile mukapete kamukachi?
  • Vyuma muka alombele Solomone omu akumishile kutunga tembele?
  • Yehova asolwele ngachilihi ngwenyi evwililile kuwaha kulomba chaSolomone?
  • Mapwevo jaSolomone vamukunywile alinge ika, kaha vyuma muka vyasolokele kuli Solomone?
  • Mwomwo ika Yehova apihililile naSolomone, kaha Yehova ahanjikile vyuma muka kuli ikiye?

Vihula vyakuhakilako

  • Tanga Mijimbu 1, 28:9, 10.

    Kweseka namazu aNdavichi ahali Mijimbu 1, 28:9, 10, vyuma muka twatela kufwila kulinganga hakumbi hakumbi? (Samu 19:14; Fwili. 4:8, 9)

  • Tanga Mijimbu 2, 6:12-21, 32-42.

    Solomone asolwele ngachilihi ngwenyi Kalunga Wakulitulaho keshi kuhasa kutwama muzuvo yakutunga kuli mutuko? (Miji. 2, 6:18; Vili. 17:24, 25)

    Mazu aSolomone vasoneka hali Mijimbu 2, 6:32, 33 asolola Yehova kupwa Kalunga wangachilihi? (Vili. 10:34, 35; Ngale. 2:6)

  • Tanga Mijimbu 2, 7:1-5.

    Ngana muze vana vaIsalele valishile Yehova hakumona upahu wenyi, nayetu twatela kulinga ika hakumona omu Yehova ali nakukisula vatu jenyi? (Miji. 2, 7:3; Samu 22:22; 34:1; 96:2)

  • Tanga Vamyangana 1, 11:9-13.

    Mujimbu wakuyoya chaSolomone wasolola ngachilihi nge chapwa chachilemu kupwa vakushishika palanga nakusongo? (Vamya. 1, 11:4, 9; Mateu 10:22; Kuso. 2:10)