SOLOMONE achili mukweze hakupwa mwangana. Azanga Yehova, nakukavangiza punga vamuhanyine kuli ise Ndavichi. Yehova namwivwila kuwaha Solomone, ngocho ufuku umwe mwamulweza muchilota ngwenyi: ‘Solomone, nausaka ngukuhane ika?’

Solomone ngwenyi: ‘Yehova Kalunga kami, ami ngukanyike wakuhona kwijiva mwakuyulila. Nguhane mangana akuyula vatu jove mukwoloka.’

Yehova nawahilila hachuma nalombo Solomone. Ngocho himwamba ngwenyi: ‘Mwomwo unangulombo mangana, kawalombele kuyoya chamakumbi amavulu numba vikumbako, nangukuhana mangana amavulu akuhambakana havatu vosena. Nangukuhana novyo wazenekanga kulomba, navikumba naulemu.’

Nakushimbula chiku, mapwevo vavali we-e kuli Solomone naukalu waunene. Umwe ngwenyi: ‘Ami napwevo ou twatwama muzuvo imwe. Ngwasemanga mwana, kaha woyongo makumbi avali, nayou pwevo nawa himwasema mwana. Jino naufuku mwanenyi mwafwa. Kaha shimbu ngwapwanga mutulo, ambatanga mwanenyi wakufwa nakumuhaka kuli yami nakumbata mwanami. Ami hakuhinduka nakutala mwana wakufwa, kumana keshi mwanamiko.’

Pwevo mukwavo ngwenyi: ‘Nduma! Wamutonyi mwanami, wakufwa mwanenyi!’ Pwevo watete ngwenyi: ‘Nduma! Wakufwa ikiye mwanove, wamutonyi mwanami!’ Ngocho mukiko vanakulipika mapwevo ava. Jino Solomone mwalinga ngachilihi?

Mwatuma vamusakile poko yamukwale, kahomu vanayinehe, himwamba ngwenyi: ‘Mupulenu mwana ou wamutonyi mukachi muhane pwevo umwe chimbwa pwevo mukwavo nawa chimbwa.’

Naye yamwana mwalila ngwenyi: ‘Nduma! Kanda namumujiha ou mwanako. Muhanenuyo mukwetu!’ Oloze pwevo mukwavo ngwenyi: ‘Kanda vamuhana kuli ami chipwe kuli ikiyeko; vamupule vene.’

Mwangana Solomone mwayula chihande chachikalu

Jino Solomone ngwenyi: ‘Kanda mumujiha mwanako! Muhane kupwevo watete. Ikiye vene naye.’ Solomone natachikiza ngwenyi naye yamwana ikiye azanga mwana, ngocho mwetavila numba kumuhana tuhu kupwevo weka kuchina navamujiha. Vatu hakwivwa omu Solomone nakumishila ukalu kana, vanawahilila hakupwa namwangana wamangana.

Mushimbu yachiyulo chaSolomone, Kalunga mwakisula vatu nakwimisa chikuma mbuto yatiliku, mbale, mihako yamivinyo najikuyu kaha navyakulya vikwavo. Vatu vanakuvwala uvwalo wamwaza nakutwama mujizuvo jamwaza. Vatu vosena vyuma vyamwaza kwijiva mbwe.

Vamyangana 1, 3:3-28; 4:29-34.



Vihula

  • Vyuma muka Yehova ahulishile Solomone, kaha amukumbulwile ngachilihi?
  • Yehova awahililile navyuma alombele Solomone, kaha amushikile kumuhana ika?
  • Ukalu muka vanehele mapwevo vavali kuli Solomone?
  • Nganomu unamono hamuvwimbimbi, Solomone akumishile ngachilihi ukalu kanou?
  • Chiyulo chaSolomone chapwile ngachilihi, kaha mwomwo ika?

Vihula vyakuhakilako

  • Tanga Vamyangana 1, 3:3-28.

    Malunga vazata milimo muliuka lyaKalunga makumbi ano navalinangula vyuma muka kumazu aSolomone ahali Vamyangana 1, 3:7? (Samu 119:105; Vishi. 3:5, 6)

    Vyuma alombele Solomone vyatukafwa ngachilihi tumone vyuma vyavilemu twatela kulombanga? (Vamya. 1, 3:9, 11; Vishi. 30:8, 9; Yowa. 1, 5:14)

    Hakutala omu Solomone akumishililemo ukalu wamapwevo vavali, chatukafwa tufwelele ika hali Solomone Wamunene, Yesu Kulishitu uze mwakayula kulutwe? (Vamya. 1, 3:28; Isa. 9:6, 7; 11:2-4)

  • Tanga Vamyangana1, 4:29-34.

    Yehova akumbulwile ngachilihi kulomba chaSolomone chakusaka kupwa namuchima wakulyononona? (Vamya. 1, 4:29)

    Hakuwana nge vatu vakilikichile chikuma mangana vevwilile kumangana aSolomone, ngocho twatela kumona ngachilihi kulinangula Mazu aKalunga? (Vamya. 1, 4:29, 34; Yowa. 17:3; Chimo. 2, 3:16)