UNAMWIJIVA ou pwevo wamwaza anakusesa Ndavichi tahi? Ikiye Avingayile. Manganenyi amwaza, kaha nakanyisa Ndavichi kulinga chuma chachipi. Oloze shimbu kanda tulinangule chuma kana, tuchitalenu ovyo vinapunga nakusoloka kuli Ndavichi.

Ndavichi hakuchina Saulu, himwaswama kuwina. Vandumbwenyi navatanga jenyi vosena hikwingila vene kuze. Kuli ikiye kuneza vatu kafwe 400, kaha Ndavichi napu jino twamina yavo. Ndavichi hikuya kuli mwangana wavaMowave ngwenyi: ‘Achitave vatata namama vatwame nayove palanga nomu nangwijiva munavipwa vyuma.’ Kaha Ndavichi navatu jenyi navaputuka kuswamwojoka mujipili.

Hakiko jino, Ndavichi mwalihumangana naAvingayile. Lunga lyenyi, Navale, hilihando apita musenge wosena. Akwechi mikoko 3,000 navapembe 1,000. Navale himutu walwiso. Oloze puwenyi Avingayile wamwaza chikuma. Atachikiza nawa mwakulingila vyuma vyakwoloka. Shimbu imwe mwalwila natanga yenyi. Tutalenu mumwalinga ngocho.

Ndavichi navatu jenyi vanapunga valikoji kuli Navale. Vanamukafwe kukinga mikoko jenyi. Jino likumbi limwe Ndavichi mwatuma vatu jenyi vamwe kuli Navale avakafweko. Vatu jaNdavichi vanayi halwola Navale navaka-kuteula vali nakuteula mikoko. Eli hilikumbi lyachiwanyino, kaha Navale ali nakulya chachivulu. Jino vatu jaNdavichi ngwavo: ‘Tunapunga valikoji kuli ove. Katwevile numba mukoko woveko, oloze tunakafwe kuvalama. Achituhaneko, kulya chimwe.

Navale ngwenyi: ‘Kangweshi kuhana kulya kuvatu vanganako.’ Hikuhanjika nauminyi, namazu akusaula Ndavichi. Omu vanakinduluka vatu nakumulweza Ndavichi, Ndavichi napihilila. Mwalweza vatu jenyi ngwenyi: ‘Likasenu jipoko jenu jamikwale!’ Hikukatuka ungeji wakuya nakujiha Navale navatu jenyi.

Umwe wavatu jaNavale, uze evwile kuhanjika chaNavale, himwalweza Avingayile vyuma vyasolokanga. Hoho vene Avingayile hikuwahisa vyakulya. Himwavilongejeka havimbulu nakuya. Omu nawane Ndavichi, hikusuluka hachimbulu, nakulifukula ngwenyi: ‘Ove mwata, kanda muhaka muchima wove hali Navaleko. Hichileya, navilinga vyenyi nawa vyauleya. Wanou ngunanehe. Utambulenu, kaha tukonekelenu hachuma chinalingiwa.’

Avingayile anakuneha wana kuli Ndavichi

Ndavichi ngwenyi: ‘Upwevo wamangana. Unanguhonesa kujiha Navale halwiso lwenyi. Yako kwimbo mukuunda.’ Kutwala muze, omu nafu Navale, Avingayile hikupwa umwe wamapwevo jaNdavichi.

Samwele 1, 22:1-4; 25:1-43.



Vihula

  • Ou apwevo ali nakusesa Ndavichi ikiye iya, kaha apwile mutu wangachilihi?
  • Navale apwile iya?
  • Mwomwo ika Ndavichi atuminyine vatu jenyi vamwe vayenga nakulomba vyakulya kuli Navale?
  • Vyuma muka Navale alwezele vatu jaNdavichi, kaha Ndavichi alingile ika?
  • Avingayile asolwele ngachilihi nge apwile pwevo wamangana?

Vihula vyakuhakilako

  • Tanga Samwele 1, 22:1-4.

    Tanga yaNdavichi yasolwele ngachilihi vilinga vyamwaza twatela kupwa navyo hakukafwa vandumbwetu vosena vaka-Kulishitu? (Vishi. 17:17; Teso. 1, 5:14)

  • Tanga Samwele 1, 25:1-43.

    Mwomwo ika Navale vamuvuluka kupwa mutu wakulivwimba? (Samwe. 1, 25:2-5, 10, 14, 21, 25)

    Mapwevo vaka-Kulishitu makumbi ano navalinangula vyuma muka kuli Avingayile? (Samwe. 1, 25:32, 33; Vishi. 31:26; Efwe. 5:24)

    Vyuma muka vivali vyavipi vize Avingayile akanyishile Ndavichi kulinga? (Samwe. 1, 25:31, 33; Loma 12:19; Efwe. 4:26)

    Ndavichi evwililile vyuma amulwezele Avingayile, kahechi chatela kukafwa ngachilihi malunga makumbi ano vamone mapwevo nganomu avamona Yehova? (Vili. 21:8, 9; Loma 2:11; Petu. 1, 3:7)