MwanaYefweta

WASHIKAHO lyehi lushiko wawanyine jino kupwa lwalukalu kulutesamo tahi? Mwalingile ou lunga ali hamuvwimbimbi, shikaho nahombo ngana. Ou lunga ikiye Yefweta, muka-kuyula vaIsalele wakuhamuka.

Yefweta anakutwama hashimbu vaneche vaIsalele kulemesa Yehova. Vanakulinga vyakuhuka cheka. Yehova hikwecha vavazangamise kuli vaAmone. Jino chavalingishile vaIsalele kuteta kuli Yehova ngwavo: ‘Tunakuvulumuna. Tulwilenu!’

Yefweta navatu jenyi

Vatu vanalikonekela hakulinga vyuma vyavipi. Vanasolola ngwavo vanalikonekela hakumulemesa Yehova cheka. Yehova hikuvakafwa cheka.

Yefweta vanamusakula kuvatu ayenga nakuzunga navaAmone vavapi. Yefweta mwafwila chikuma Yehova amukafwe mujita. Himwamushika Yehova ngwenyi: ‘Nge naunguhana vaAmone mulivoko lyami, kaha hakukinduluka kujita, mutu wakulivanga kulovoka muzuvo yami nakungusesa nangukamuhana kuli ove.’

Yehova mwevwilila kulushiko namushiki Yefweta nakumulwila. Unejiva mutu watete kulovoka nakumusesa Yefweta hakukinduluka kwimbo? Mwanenyi wapwevo, umwe kaha lyamunwe. Yefweta namulikumbu lyakulila: ‘Mama yami, ove mwanami! Owo ushona unangunehela. Oloze ngunamushiki lyehi Yehova, kaha kangweshi kuhasa kuluhilwisa nawako.’

MwanaYefweta hakwivwa lushiko kana, nayikiye hakavanga himwalinyenga. Mwomwo mwaseza ise namasepa jenyi. Oloze mukuyoya chenyi chosena mwazachilanga Yehova mutavanaku yakuShilo. Mwalweza ise ngwenyi: ‘Omwo unamushiki lyehi Yehova, kuvanga ulingemo.’

MwanaYefweta wapwevo hikuya kuShilo nakuzachilanga Yehova mutavanaku myaka yosena. Vana vamapwevo vavaIsalele vanakuwahililanga hakuya nakumumeneka makumbi awana hamwaka hamwaka. Vatu vanamuzange mwanaYefweta wapwevo mwomwo napu ngamba yaYehova wamwaza.

Vaka-kuyula 10:6-18; 11:1-40.



Vihula

  • Yefweta apwile iya, kaha lwola muka apwileko?
  • Lushiko muka Yefweta ashikile Yehova?
  • Mwomwo ika Yefweta alinyengele omu akindulukile kwimbo hakufuma nakulwa jita navaAmone?
  • MwanaYefweta wapwevo ahanjikile ika omu evwile vyalushiko lwaise?
  • Mwomwo ika vatu vazangilile mwanaYefweta wapwevo?

Vihula vyakuhakilako

  • Tanga Vaka-kuyula 10:6-18.

    Vyuma muka natulinangula kumujimbu wavaIsalele wakuhona kushishika kuli Yehova? (Kuyu. 10:6, 15, 16; Loma 15:4; Kuso. 2:10)

  • Tanga Vaka-kuyula 11:1-11, 29-40.

    Twejiva ngachilihi ngwetu omu Yefweta ambile ngwenyi mwakahana mwanenyi kupwa “wana wakulumba” kalumbunwine nge asakile kumujiha nakumuhana kupwa wana wakulumba halijikoko? (Kuyu. 11:31; Levi 16:24; Lushi. 18:10, 12)

    Yefweta ahanyine ngachilihi mwanenyi kupwa wana?

    Natulinangula ika kuli Yefweta hakutesamo lushiko alishikile naYehova? (Kuyu. 11:35, 39; Kwambu. 5:4, 5; Mateu 16:24)

    MwanaYefweta wapwevo ahana ngachilihi chakutalilaho chamwaza kuli vaka-Kulishitu vavakweze hakusakula kuzata mulimo washimbu yosena? (Kuyu. 11:36; Mateu 6:33; Fwili. 3:8)