WAMONO vili nakusoloka hano? Ava vosena himalunga vaka-kwasa jita vavaIsalele. Malunga vanafukama, vanakunwa meya. Ou lunga navemanyina ikiye Ngiteyone, muka-kuvayula. Anakuvatala muvanakunwa meya.

Tala jijila jakulihandununa vali nakunwinamo meya ava malunga. Vamwe vananongamina hameya. Oloze umwe anakukapa meya namavoko, mangana ahase kutalatala navisoloka kuze ali. Echi chachilemu, mwomwo Yehova alwezele Ngiteyone asakule kaha malunga vaze navanwa oku vanakutalatala. Vakwavo, Kalunga ngwenyi, vavakindulwise kwimbo. Tutalenu chalingishile ngocho.

VaIsalele vanengila muukalu waunene cheka. Mwomwo kavamwononokele Yehovako. VaMichane vanaputuka kuvalumukila nakuvajiha. VaIsalele miteto salu kuli Yehova avakafwe, Yehova hikuvevwilila.

Yehova mwalweza Ngiteyone ambate vaka-kwasa jita, kaha Ngiteyone nakungulula vaka-kwasa jita 32,000. Oloze vaka-kole javaIsalele vali 135,000. Jino Yehova mwalweza Ngiteyone ngwenyi: ‘Vatu uli navo vanavulu chikuma.’ Mwomwo ika Yehova nambila ngocho?

Mwomwo nge vaIsalele navafungulula vakwavo, kaha navalisasa ngwavo vakivo vanayihase. Vanahase kushinganyeka ngwavo kufungulula kana kachasakiwanga kukafwa chaYehovako. Shikaho Yehova himwamba kuli Ngiteyone ngwenyi: ‘Lweza malunga vosena vali nakuchikima vakinduluke kwimbo.’ Ngiteyone hakulinga ngocho, vaka-kwasa jita 22,000 hikuya kwimbo. Nasale namalunga 10,000 navazungisa maswalale 135,000.

Ngiteyone ali nakweseka vatu jenyi

Oloze, ivwa! Yehova ngwenyi: ‘Uchili lika navatu vavavulu.’ Shikaho mwalweza Ngiteyone atwale malunga nakunwa meya kulwiji kaha vosena vaze navanongamina hameya nakunwa avakindulwise kwimbo. Yehova mwalishinga ngwenyi: ‘Nangumilwila muli ava malunga 300 vapwanga nakutalatala hakunwa.’

Shimbu yakulwa jita yahete. Ngiteyone himwavapanga vatu jenyi 300 mumazavu atatu. Mutu himutu himwamuhana luneta, namulondo uli namumunyi mukachi. Hakachi kaufuku, vosena hikujingilika chilombo chamaswalale javaka-kole javo. Jino, halwola lumwe, vosena hikwimba jineta javo nakujiha milondo yavo, nakuvilika ngwavo: ‘Poko yaYehova naNgiteyone!’ Omu maswalale vaka-kole vanalangumuka mutulo, vanayambasana nakulichikimina. Vosena tu vo-o, kaha vaIsalele hikuvafungulula.

Vaka-kuyula tupetulu 6 swi naku 8.



Vihula

  • VaIsalele vapwile ngachilihi muukalu, kaha mwomwo ika?
  • Mwomwo ika Yehova alwezelele Ngiteyone ngwenyi apwile namalunga vavavulu vakwasa jita?
  • Malunga vangahi vasalileko omu Ngiteyone akindulwishile vaze vapwile nawoma?
  • Kweseka nou muvwimbimbi, lumbununa omu Yehova akehesele kuvula chamalunga vakwasa jita vaNgiteyone nakuheta jino ku 300.
  • Ngiteyone alongesele ngachilihi vatu jenyi 300, kaha vaIsalele vahashile kufungulula ngachilihi?

Vihula vyakuhakilako

  • Tanga Vaka-kuyula 6:36-40.

    Ngiteyone ateselemo ngachilihi mwayile muchima waYehova?

    Tweji kwijivanga ngachilihi mwaya muchima waYehova makumbi ano? (Vishi. 2:3-6; Mateu 7:7-11; Chimo. 2, 3:16, 17)

  • Tanga Vaka-kuyula 7:1-25.

    Vyuma muka natulinangula kuli malunga 300 vaze vakuzangama vasalileho hakuvesekesa kuli vaze vakuhulama vahilukile? (Kuyu. 7:3, 6; Loma 13:11, 12; Efwe. 5:15-17)

    Ngana muze malunga 300 valinangwile hakutala kuli Ngiteyone, uno nayetu tweji kulinangulanga ngachilihi hakutala Ngiteyone Wamunene, Yesu Kulishitu? (Kuyu. 7:17; Mateu 11:29, 30; 28:19, 20; Petu. 1, 2:21)

    Mukanda waVaka-kuyula 7:21 watukafwa ngachilihi tusuuluke nakala milimo vatuhana muliuka lyaYehova? (Koli. 1, 4:2; 12:14-18; Yako. 4:10)

  • Tanga Vaka-kuyula 8:1-3.

    Nge tunalimbalaka navandumbwetu, vyuma muka natulinangula kuli Ngiteyone kweseka najila akumishililemo ukalu navaEfwalime? (Vishi. 15:1; Mateu 5:23, 24; Luka 9:48)