ACHITALE Yoshuwa. Ali nakwamba ngwenyi: ‘Likumbi, imana!’ Kaha likumbi linemana. Hanga linemanyina hakachi kalilu tando yamusana yosena. Yehova ikiye nalingi ngocho! Oloze tuwanenu ovyo anakusakila Yoshuwa likumbi limunyike nakutwalaho.

Likumbi

Vaze vamyangana vatanu vamuKanane hakuputuka kulwa jita navaNgiveyone, vaNgiveyone hikutuma mutu kuli Yoshuwa avakafweko. Vambile ngwavo: ‘Twayenu washi! Tulwilenu! Vamyangana vosena vatwama kulifuchi lyajipili vananyemukila vandungo jenu.’

VaYoshuwa navaka-kwasa jita nakulangisa chiku. Hikutambuka ufuku wosena. Hakuheta kuNgiveyone, maswalale javamyangana vatanu vanevu woma, hikuputuka kuchina. Yehova hikuholola vula yamalolwa amanene kufuma kwilu, kaha hinayijiha maswalale vavavulu kuhambakana vakujiha kuli malunga jaYoshuwa vaka-kwasa jita.

Yoshuwa

Yoshuwa himwamona ngwenyi linwomu likumbi lilauke. Nakutoka, kaha maswalale vavavulu vavamyangana vavapi vatanu navatuchina. Shikaho Yoshuwa hikulomba kuli Yehova ngwenyi: ‘Likumbi, imana!’ Kahomu likumbi lili lika nakumunyika, vaIsalele hikuhasa jino kukumisa kuvaveta.

MuKanane muli nawa vamyangana vavapi vakwavo vahunga vatu jaKalunga. Yoshuwa navatu jenyi vaka-kwasa jita hinavalwa navo myaka yitanu naumwe numba hikufungulula vaze vamyangana 31 vamulifuchi kana. Jino Yoshuwa hikupangila Kanane kumiyachi yinahono ngalila.

Hakuhita myaka yayivulu, Yoshuwa hikufwa namyaka 110. Omu ikiye namasepa jenyi vachili vavatonyi, vatu vanononoka Yehova. Oloze omu vanafu malunga vamwaza ava, vatu hikuputuka kulinga vyuma vyavipi nakwingila muukalu. Hakiko jino navasaka Kalunga avakafwe.

Yoshuwa 10:6-15; 12:7-24; 14:1-5; Vaka-kuyula 2:8-13.



Vihula

  • Vyuma muka ali nakuhanjika Yoshuwa hamuvwimbimbi, kaha mwomwo ika?
  • Yehova akafwile ngachilihi Yoshuwa navatu jenyi vaka-jita?
  • Yoshuwa afungulwile vamyangana vangahi, kaha chambachile myaka yingahi?
  • Mwomwo ika Yoshuwa apangile lifuchi lyaKanane?
  • Yoshuwa apwile namyaka yingahi omu afwile, kaha vyuma muka vyasolokele kuvatu mukuhita chalwola?

Vihula vyakuhakilako

  • Tanga Yoshuwa 10:6-15.

    Vyuma muka twatela kufwelela makumbi ano hakwijiva ngwetu Yehova emikile likumbi nakakweji kuli vaIsalele? (Yoshu. 10:8, 10, 12, 13; Samu 18:3; Vishi. 18:10)

  • Tanga Yoshuwa 12:7-24.

    Iya chikupu afungulwile vamyangana 31 muKanane, kaha mwomwo ika chuma kana chapwila chachilemu kuli etu makumbi ano? (Yoshu. 12:7; 24:11-13; Lushi. 31:8; Luka 21:9, 25-28)

  • Tanga Yoshuwa 14:1-5.

    Lifuchi valipangile ngachilihi kweseka namiyachi yavaIsalele, kahechi chatulweza vyuma muka navikasoloka muPalachise natukaswana? (Yoshu. 14:2; Isa. 65:21; Ezeke. 47:21-23; Koli. 1, 14:33)

  • Tanga Vaka-kuyula 2:8-13.

    Iya makumbi ano ali nakukinga vakwavo kukusosoloka kulufwelelo, ngana muze alingilenga Yoshuwa muIsalele? (Kuyu. 2:8, 10, 11; Mateu 24:45-47; Teso. 2, 2:3-6; Chitu. 1:7-9; Kuso. 1:1; 2:1, 2)