JINGANDA jajivulu muKanane jinalizange jizungise vaIsalele. Vanakushinganyeka ngwavo navahasa kuvafungulula. Oloze vatu vamunganda yamukamwihi yaNgiveyone kavachimwene ngochoko. Vanejiva ngwavo vaIsalele vali nakuvakafwa kuli Kalunga, kaha kavate kwavo kuzungisa Kalunga. Unejiva munavalinga vaka-Ngiveyone tahi?

Vanasake valisolole nge vatwama kwakusuka chikuma. Malunga vamwe hikuvwala vyakutanyojoka najimendelo jakufwa. Hikulongejeka vimbulu javo jisaka jakusanyojoka najimbolo jaumu. Jino hikuya kuli Yoshuwa ngwavo: ‘Tunafumu kulifuchi lili kwakusuku chikuma, mwomwo tunevu fuma yaKalunga kenu wamunene, Yehova. Tunevu vyuma vyosena amilingilile muEjipitu. Shikaho vakulwane jetu vatulwezanga tumbate kulya chamujila nakwiza nakumilweza ngwetu: ‘Etu tuvandungo jenu. Tushikenu lushiko ngwenu kamweshi kasa jita nayetuko. Talenu uvwalo wetu unatanyojoka hakusuhwa chaungeji najimbolo jetu jinomu nakukwata mbundu.’

Yoshuwa navatwamina vakwavo hikuvetavila vaNgiveyone. Valishingile kuhona kukavazungisa. Oloze hamakumbi atatu hinavejiva nge vaka-Ngiveyone vatwama mwakamwihi chikuma.

Yoshuwa ngwenyi: ‘Mwomwo ika mwatulwezanga ngwenu mwafuma kulifuchi lili kwakusuku?’

Vaka-Ngiveyone ngwavo: ‘Twalinganga ngocho mwomwo vatulweza nge Kalunga kenu Yehova amishika kumihana Kanane. Shikaho twevwanga woma ngwetu namutujiha.’ Oloze vaIsalele vanalame lushiko valishinganga, kaha vaka-Ngiveyone kuvajiha chiku. Hikuvakwata kaha undungo.

Mwangana waYelusalema napihilila mwomwo vaka-Ngiveyone vanalishiki kuunda navaIsalele. Himwamba kuli vakwavo vamyangana vawana ngwenyi: ‘Twayenu mungukafweko kuveta vaNgiveyone.’ Kaha mukiko valingile ava vamyangana vatanu. Kutala vaNgiveyone vazangamine hakulishika kuunda navaIsalele, chize chalingishile numba vamyangana kana vezenga nakulwa jita navo tahi? Natutala kanawa.

Yoshuwa 9:1-27; 10:1-5

Yoshuwa navaka-Ngiveyone


Vihula

  • Vaka-Ngiveyone valihandunwine ngachilihi navaKanane vamujinganda japwile hakamwihi?
  • Nganomu unamono hamuvwimbimbi, vaka-Ngiveyone valingile ika, kaha mwomwo ika?
  • Yoshuwa navatwamina javaIsalele valishikile lushiko muka navaka-Ngiveyone, oloze vyuma muka vyasolokele omu mwahichile makumbi atatu?
  • Vyuma muka vyasolokele omu vamyangana vamujinganda jeka vevwile ngwavo vaka-Ngiveyone vanalivwasana kutwama mukuunda navaIsalele?

Vihula vyakuhakilako

  • Tanga Yoshuwa 9:1-27.

    Hakuwana nge Yehova alwezele vaIsalele ‘vanongese vosena vaze vatwamine mulifuchi kana,’ ngocho asolwele vilinga muka hakuhona kunongesa vaka-Ngiveyone? (Yoshu. 9:22, 24; Mateu 9:13; Vili. 10:34, 35; Petu. 2, 3:9)

    Yoshuwa hakulama lushiko alishikile navaka-Ngiveyone, ahana ngachilihi chakutalilaho chamwaza kuli vaka-Kulishitu makumbi ano? (Yoshu. 9:18, 19; Mateu 5:37; Efwe. 4:25)

  • Tanga Yoshuwa 10:1-5.

    Vatu vamuliyongomena lyalinene vali nakulondezeza ngachilihi vaka-Ngiveyone, kaha veya vali nakuvafumbukila? (Yoshu. 10:4; Zeka. 8:23; Mateu 25:35-40; Kuso. 12:17)