MOSE hakukinduluka kuEjipitu, alwezele yayenyi Alone visava vyosena akamwene. Kahomu Mose naAlone valingile visava kumeso avaIsalele, vosena vetavile nge Yehova apwile nakuvazachisa.

Jino Mose naAlone vayile kuli Fwalo. Vamwambile ngwavo: ‘Yehova Kalunga kavaIsalele nambe ngwenyi, Suwula vatu jami makumbi atatu, vayenga vakangulemese mupambo.’ Oloze Fwalo ngwenyi: ‘Ami kangwetavila muli Yehovako. Kangweshi nguvasuwule vaIsaleleko.’

Fwalo apihililile, mwomwo vatu vasakile vazezame kumilimo nakuya nakulemesa Yehova. Jino avazachishile chikuma. VaIsalele valumukilile Mose hakuvayanjisa mwamupi, kaha Mose evwile keke. Oloze Yehova amwambile nge kanda alizakaminako. Yehova ngwenyi: ‘Nangumulingisa Fwalo avasuwule vatu jami.’

Mose naAlone vali nakuhanjika naFwalo

Mose naAlone vakindulukile cheka kuli Fwalo. Valingile jino chisava. Alone ambilile mukombo hamavu, kaha walumukile kupwa linoka wamunene. Vatu jaFwalo vaka-visava navakivo vambilile mikombo yavo hamavu, kaha yalumukile manoka. Jino, tala! Linoka lyaAlone ali nakumina manoka javatu vaka-visava. Oloze Fwalo kavasuwile vaIsaleleko.

Yehova jino mwamuzangamisa Fwalo. Unejiva mwalingile? Anehele vipupu 10, chipwe ngwetu makava amanene, hali vaEjipitu.

Hakusoloka chavipupu vyavivulu, Fwalo asanyikilenga Mose nakumwamba ngwenyi: ‘Kumisa chipupu, kaha nangusuwula vaIsalele vayenga.’ Oloze omu chipupu nachikuma, Fwalo kwenyi pyaku. Kate kusuwula vatu. Hakukuma chachipupu chakusokesa 10, Fwalo asuwile vaIsalele.

Kutala vipupu vyosena 10 unavitachikiza tahi?

Kulovoka 4:27-31; 5:1-23; 6:1-13, 26-30; 7:1-13.



Vihula

  • Vyuma vyakukomwesa vize alingile Mose naAlone vyakafwile ngachilihi vana vaIsalele?
  • Vyuma muka Mose naAlone valwezele Fwalo, kaha Fwalo avakumbulwile ngachilihi?
  • Nganomu unamono hamuvwimbimbi, vyuma muka vyasolokele omu Alone ambilile mukombo wenyi hamavu?
  • Yehova anangwile ngachilihi Fwalo, kaha Fwalo akwileko ngachilihi?
  • Vyuma muka vyasolokele omu chakumine chipupu chakusokesa mulikumi?

Vihula vyakuhakilako

  • Tanga Kulovoka 4:27-31 na 5:1-23.

    Fwalo alumbunwine ika hakwamba ngwenyi: “Kangwatachikiza Yehovako”? (Kulo. 5:2; Samwe. 1, 2:12; Loma 1:21)

  • Tanga Kulovoka 6:1-13, 26-30.

    Mujila muka Yehova kalisolwele kuli Apalahama naIsaka naYakovako? (Kulo. 3:13, 14; 6:3; Kupu. 12:8)

    Uno tweji kwivwanga ngachilihi hakwijiva ngwetu, Yehova atwalileho lika kuzachisa Mose numba tuhu Mose ashinganyekele ngwenyi katelemo kuzata mulimo vamuhanyine? (Kulo. 6:12, 30; Luka 21:13-15)

  • Tanga Kulovoka 7:1-13.

    Vangamba jaKalunga makumbi ano vanahase kulinangula vyuma muka kuli Mose naAlone omu vahanjikile natwima vyakusopesa chaYehova kuli Fwalo? (Kulo. 7:2, 3, 6; Vili. 4:29-31)

    Yehova asolwele ngachilihi nge apwile nangolo kuhambakana tulunga vavaEjipitu? (Kulo. 7:12; Miji. 1, 29:12)