MALUNGA vali hano vanakushinjila vatu vazate milimo. Achitale lunga uze ali nakuveta vaka-kuzata nachikote! Vaka-kuzata hivausoko waYakova, vakivo vaIsalele. Kaha malunga vali nakuvashinjila kuzata vakivo vaEjipitu. VaIsalele vanapu jino hivandungo javaEjipitu. Chapwile ngachilihi ngocho?

Vaka-Ejipitu vali nakuyanjisa vaIsalele

Tanga yayinene yaYakova yatwamine mukuunda hamyaka yayivulu muEjipitu. Yosefwe, uze apwile wamulemu chikuma muEjipitu, muhato wamwangana Fwalo, ikiye avalaminenga. Jino Yosefwe afwile. Kaha Fwalo wamuhya, uze kazangile vaIsaleleko, himwapwa mwangana muEjipitu.

Jino Fwalo kanou wamupi avalumwine vaIsalele kupwa vandungo. Avahanyine malunga valwiso naukenya kupwa vaka-kuvazachisa. Vavashinjilile vaIsalele vatunge jinganda jaFwalo jajikalu kutunga. Oloze vaIsalele chivavula lika. Jino vaEjipitu vevwile woma ngwavo kulutwe vaIsalele navakavula nakukazama mbe.

Vaka-Ejipitu vali nakuyanjisa vaIsalele

Unejiva chuma alingile Fwalo? Alwezele vifungwiji vasapwilishilenga mapwevo javaIsalele, ngwenyi: ‘Vakemba vamalunga navasemukanga mwatela kuvajiha.’ Oloze mapwevo kana michima yavo yapwile yamwaza, kavapwile nakujiha vakembako.

Shikaho Fwalo alwezele vatu jenyi ngwenyi: ‘Jihenu vakemba vamalunga vavaIsalele. Echenu vakemba vamapwevo vayoye.’ Uno chuma kana kachapwile ukenyako nyi? Tutalenu omu kemba umwe walunga vamuyowele.

Kulovoka 1:6-22.



Vihula

  • Ou lunga nakwate chikote hamuvwimbimbi ikiye iya, kaha ali nakuveta iya?
  • Vyuma muka vyasolokele kuli vaIsalele omu Yosefwe afwile?
  • Mwomwo ika vaEjipitu vaputukilile kwivwa woma vaIsalele?
  • Lushimbi muka Fwalo ahanyine vifungwiji vaze vasapulwishilenga mapwevo javaIsalele?

Vihula vyakuhakilako

  • Tanga Kulovoka 1:6-22.

    Mujila muka Yehova aputukile kutesamo lushiko luze alishikile naApalahama? (Kulo. 1:7; Kupu. 12:2; Vili. 7:17)

    Uno vifungwiji vavaHepeleu vasolwele ngachilihi nge vavumbikile kuyoya? (Kulo. 1:17; Kupu. 9:6)

    Uno ava vifungwiji vavakiswile ngachilihi hakushishika chavo kuli Yehova? (Kulo. 1:20, 21; Vishi. 19:17)

    Satana asakile kutangula ngachilihi vyuma ajinyine Yehova kutalisa kuli Muka-tanga yaApalahama uze ashikile? (Kulo. 1:22; Mateu 2:16)