UNAKUMWIVWILA keke ou muveji tahi? Ikiye Yopa, kaha pwevo ali nenyi hipuwenyi. Unejiva ovyo anakumulweza Yopa tahi? ‘Mwangule Kalunga ufwenga.’ Tuwanenu chinamulingisa kuhanjika ngocho, nocho chinalingisa numba Yopa ayande ngana.

Yopa ali namahute

Yopa himutu wakushishika wakwononoka Yehova. Atwaminenga mulifuchi lyaUze, hakamwihi naKanane. Yehova amuzangile chikuma Yopa, oloze kwapwile umwe amujinjile. Unamutachikiza nyi?

Apwile Satana Liyavolo. Nawanuka, Satana hikangelo wamupi uze kazanga Yehovako. Alingishile vaAlama naEve valikange kuli Yehova, nakushinganyeka ngwenyi nahase nawa kulingisa vatu vosena vahone kumwononoka Yehova. Uno ahashile kulinga ngocho nyi? Nduma. Shinganyeka malunga namapwevo vavavulu tunalinangula lyehi. Unahase kuvulukaho vangahi?

Hakufwa vaYakova naYosefwe muEjipitu, Yopa ikiye apwile kaha wakushishika chikuma kuli Yehova hamavu hosena. Yehova asakile amulweze Satana nge, keshi kukalingisa vatu vosena kupwa vavapiko, himwamba ngwenyi: ‘Mushishike Yopa. Tala omu angwivwa ami woma.’

Satana ngwenyi, mbwatu: ‘Akwivwa woma mwomwo weji kumukisula, kaha ali navyuma vyavivulu shikaho. Oloze nge mumutambulavyo, kaha mwakwangula.’

Shikaho Yehova ngwenyi: ‘Linga vene ngocho. Mutambulevyo. Linga vyuma vyavipi nausaka kumulinga Yopa. Natutala nge mwangwangula. Oloze kanda kukamujihako.’

Chatete, Satana hikuneha vatu nakwiva vangombe navangamela vaYopa, nakujiha mikoko jenyi. Hikumujiha navana venyi 10 vamalunga navava vamapwevo navula yanyamanganda. Kufumaho, Satana hikuveta Yopa namusongo waupi. Yopa ayanjile mateli. Shikangaho puwenyi amwambile ngwenyi: ‘Mwangule Kalunga ufwenga.’ Oloze Yopa kate. Masepa jenyi vamakuli vejile nakumwamba ngwavo alingilenga vyuma vyavipi. Oloze Yopa ashishikile.

Echi chevwishile Yehova kuwaha nakumukisula Yopa, nge omu uli nakumumona hamuvwimbimbi uno. Amuyoyesele kumusongo wenyi. Yopa apwile cheka navana 10 vakukupuka chikuma, nakumushishishilamo kavali havangombe, mikoko, navangamela kuhambakana vaze apwile navo hakavanga.

Uno nayove mupwanga wakushishika kuli Yehova chiwenya Yopa tahi? Nge mukiko, kaha Kalunga mwakakukisula nayove nawa. Unahase kukatwama myaka yosena omu lifuchi lyosena nalikakupuka nge milemba yaEtene.

Yopa 1:1-22; 2:1-13; 42:10-17.

Yopa natanga yenyi


Vihula

  • Yopa apwile iya?
  • Vyuma muka asakile kulinga Satana, kaha kutala afukilile tahi?
  • Yehova etavishile Satana kulinga ika, kaha mwomwo ika?
  • Mwomwo ika pwevo lyaYopa alwezele lunga lyenyi ngwenyi “mwangule Kalunga ufwenga”? (Tala muvwimbimbi.)
  • Nganomu unamono hamuvwimbimbi wamuchivali, Yehova akiswile ngachilihi Yopa, kaha mwomwo ika?
  • Nge nayetu natupwa vakushishika chiwenya Yopa, kaha Yehova mwatukisula ngachilihi?

Vihula vyakuhakilako

  • Tanga Yopa 1:1-22.

    Vaka-Kulishitu makumbi ano vanahase kulondezeza ngachilihi Yopa? (Yopa 1:1; Fwili. 2:15; Petu. 2, 3:14)

  • Tanga Yopa 2:1-13.

    Uno Yopa napuwenyi valihandunwine ngachilihi mujila vakwilililemo kuvyeseko vyaSatana? (Yopa 2:9, 10; Vishi. 19:3; Mika 7:7; Mala. 3:14)

  • Tanga Yopa 42:10-17.

    Vyuma vamukiswile Yopa hakushishika chenyi vyalifwana ngachilihi navize atambwile Yesu hanyima yakuhita muvyeseko? (Yopa 42:12; Fwili. 2:9-11)

    Vyuma atambwile Yopa mwomwo yakupwa wakulonga kuli Kalunga vyeji kutukolezezanga ngachilihi? (Yopa 42:10, 12; Hepe. 6:10; Yako. 1:2-4, 12; 5:11)