ACHITALE omu kanyike nahombo nakuzeya. Ou kanyike ikiye Yosefwe. Vandumbwenyi vanamulanjisa kuvatu vanakuya kuEjipitu. Yosefwe mwakapwa ndungo kuze mwaya. Vandumbwenyi vanalingila ika chuma chachipi ngana? Mwomwo vanamwivwila Yosefwe lwiso.

Sevo Yakova azangile chikuma Yosefwe. Amutungilile kochi yakukupuka mwomwo amuzangile chikuma. Omu vayayenyi 10 vamwene Yakova nazange chikuma Yosefwe, hikuputuka kumwivwila Yosefwe lwiso nakumuhunga. Oloze kwapwile nawa chuma chikwavo vamujinjilile.

Yosefwe alotele vilota vivali. Muvilota vyosena, Yosefwe mwalota vandumbwenyi vanakufukama kuli ikiye. Yosefwe hakulweza vandumbwenyi vilota kana, hinavamujinda chikuma.

Likumbi limwe omu vayaya jaYosefwe vanakufunga mikoko jasevo, Yakova mwatuma Yosefwe kuya akatale muvali nakutwama. VandumbwaYosefwe hakumumona uze mwakeza, vamwe ngwavo: ‘Tumujihenu!’ Oloze twatwa yavo, Luvene, ngwenyi: ‘Nduma, kanda kumujihako!’ Shikaho hikumukwata Yosefwe nakumumbila muwina. Jino vatwamine vashinganyeke munavamulingila.

Halwola vene elu vaIshimele vamwe hikupalika. Yuta mwamba kuli vandumbwenyi ngwenyi: ‘Tumulanjisenu kuli vaIshimele.’ Kaha hinavalinga ngocho. Hinavamulanjisa Yosefwe najimbongo japalata 20. Olwo lwiso kana nakuhona keke!

Jino vandumbwenyi navambulula ika kuli sevo? Hikujiha pembe nakutupika kochi yakukupuka yaYosefwe mumanyinga apembe. Hikumbata yize kochi kwimbo kuli sevo Yakova nakumulweza ngwavo: ‘Twawanangeyi kochi. Yitalenu, mumone nge keshi kochi yamwanenu Yosefweko.’

Yakova himwayimona ngwenyi ikiko. Hikulila ngwenyi: ‘Yosefwe vanamuli kukanyama wamupi.’ Mukiko vandumbwaYosefwe vasakile sevo ashinganyeke. Yakova himwalishona chikuma. Hikulila makumbi amavulu. Oloze Yosefwe kafwileko. Tutalenu vyuma navisoloka kuze vanamutwale.

Kuputuka 37:1-35.

## Vihula

• Mwomwo ika Yosefwe vamwivwilile lwiso kuli vandumbwenyi, kaha valingile ika?
• VandumbwaYosefwe vasakile kumulinga muka, oloze Luvene ambile ngwenyi ika?
• Vyuma muka vyasolokele omu vaka-kusekasana vavaIshimele vapwile nakupalika?
• Vyuma muka valingile vandumbwaYosefwe mangana sevo ashinganyeke ngwenyi Yosefwe nafu?

## Vihula vyakuhakilako

• Tanga Kuputuka 37:1-35.

Vaka-Kulishitu vanahase kulondezeza ngachilihi chakutalilaho chaYosefwe nge vatu vamwe muchikungulwilo vali nakulinga vilinga vyavipi? (Kupu. 37:2; Levi 5:1; Koli. 1, 1:11)

Vyuma muka vyalingishile vandumbwaYosefwe numba vamulinge mwamupi? (Kupu. 37:11, 18; Vishi. 27:4; Yako. 3:14-16)

Vyuma muka alingile Yakova vyasolola nge kulishona chapwa chakutamo? (Kupu. 37:35)