UNATACHIKIZA chuma alivangile kulinga Nowa hakulovoka muwato natanga yenyi nyi? Ahanyine wana kuli Kalunga. Tala omu anakuhana wana hamuvwimbimbi uli mwishi. Nowa ahanyine wana wavimuna asakwilile Kalunga hakuyovola tanga yenyi mulivaji lyalinene.

Wato nakongolo

Unashinganyeka ngwove Yehova azangile wana kana tahi? Eyo, auzangile. Ngocho amushikile Nowa ngwenyi keshi kukenyeka cheka kaye nalivajiko.

Jino hamavu homine chau, kaha Nowa natanga yenyi vaputukile kuyoya chachihya hakufuma muwato. Kalunga avakiswile nakuvalweza ngwenyi: ‘Kasemenu vana vavavulu. Mukavule chikuma palanga nomu nahakazala hamavu hosena navatu.’

Pamo vatu hakwivwa vyalivaji lyalinene, navakalizuzukila nawoma ngwavo livaji kana nalikeza cheka. Shikaho Kalunga ahanyine chuma nachikanukisanga vatu mazu alishingile akuhona kukaneha cheka livaji hamavu hosena. Unejiva chuma ahakileko chakuvanukisanga tahi? Ahakileko kongolo.

Nowa natanga yenyi

Kongolo eji kusolokanga muutangatanga hakumunyika chamusana nge vula yineche kunoka. Vakongolo vanahase kupwa naulombo wauvulu wamwaza. Wamonaho lyehi kongolo tahi? Unamumono ou ali hamuvwimbimbi uno tahi?

Kalunga jino ngwenyi: ‘Kangweshi kukanongesa cheka vatu natunyama nalivajiko. Ngunakuhaka kongolo yami halivwi. Omu mwakasoloka kongolo, kaha nangukamumona nakwanuka lushiko lwami ngunalishiki.’

Jino omu mumona kongolo, atela kukwanukisa yika? Atela kukwanukisa lushiko atushikile Kalunga nge keshi kukanongesa cheka vatu nalivajiko.

Kuputuka 8:18-22; 9:9-17.



Vihula

  • Nganomu unasolola muvwimbimbi, chuma muka alingile Nowa omu alovokele muwato?
  • Vyuma muka Kalunga alwezele Nowa natanga yenyi omu lyakumine Livaji?
  • Lushiko muka alishikile Kalunga navatu?
  • Nge tunamono kongolo, kaha eji kutwanukisanga ika?

Vihula vyakuhakilako

  • Tanga Kuputuka 8:18-22.

    Uno makumbi ano tunahase kuhana ngachilihi wana “[wa]livumba lyalupengopengo” kuli Yehova? (Kupu. 8:21; Hepe. 13:15, 16)

    Vyuma muka ahanjikile Yehova kutalisa kumichima yavatu, kaha natulinangulaho ika? (Kupu. 8:21; Mateu 15:18, 19)

  • Tanga Kuputuka 9:9-17.

    Lushiko muka alishikile Yehova navyuma vyakuyoya vyosena vyahano hamavu? (Kupu. 9:10, 11)

    Lushiko lwakongolo nalupwanga nakuzata palanga nakumwaka uka? (Kupu. 9:16)