VYUMA vyamwaza vyosena tukwechi vyafuma kuli Kalunga. Atengele likumbi litumunyikilenga namusana, kaha kakweji navatanganyika vitumunyikilenga naufuku. Kalunga atutengelele mavu tutwamengaho.

Oloze Kalunga kavangile kutenga likumbi, kakweji navatanganyika namavuko. Unejiva vyuma avangile kutenga tahi? Kalunga avangile kutenga vatu vamufwana. Katweshi kuhasa kuvamonako chiwenya mutwahona kumumona Kalunga. Vatu kana vavavuluka muMbimbiliya ngwavo vangelo. Kalunga atengele vangelo mangana vatwamenga nayikiye mwilu.

Kangelo watete kutenga kuli Kalunga apwile wakulipwila. Apwile MwanaKalunga watwatwa, uze azachilenga naIse. Akafwilenga Kalunga kutenga vyuma vyosena. Akafwile Kalunga kutenga likumbi, kakweji, vatanganyika namavu etu ano.

Jino mavu apwilenga ngachilihi halwola kana luze? Hakuputuka, kawapwile akutamo kutwamaho vatuko. Hapwilenga vimeya vyafwikile kumavu kwosena. Oloze Kalunga asakile hano hamavu hakatwamenga vatu. Shikaho aputukile kutuwahishila chimweza vyuma. Alingile vyuma vika?

Chamwaza, chatete hamavu hasakiwile hapwenga musana. Shikaho Kalunga alingishile kumunyika chalikumbi kuputuka kumunyika hamavu. Alingile ngocho mangana kupwenga ufuku namusana. Jino alingishile mavu kutunduka helu lyameya akalungalwiji.

Hakuputuka hamavu hapwile hamokomoko. Hapwile ngana muuli nakumona hamuvwimbimbi uno. Kahapwile jitemo chipwe mitondo chipwe tunyamako. Mutulungalwiji kamwapwile vaishiko. Kalunga apwile namulimo waunene wakuwahisa mavu hakapwe tunyama navatu.

Yelemiya 10:12; Wavaka-Kolose 1:15-17; Kuputuka 1:1-10.

Hamavu hangana vene


Vihula

  • Uno vyuma vyosena vyamwaza vyafuma kulihi, kaha vulukako vimwe?
  • Chuma muka chatete atengele Kalunga?
  • Mwomwo ika kangelo wakulivanga apwililile wakulipwila?
  • Hakuputuka hamavu hapwilenga ngachilihi? Lumbununa. (Tala muvwimbimbi.)
  • Kalunga aputukile ngachilihi kuwahisa hamavu mangana vatu natunyama vatwamengaho?

Vihula vyakuhakilako

  • Tanga Yelemiya 10:12.

    Vilinga muka vyaKalunga vize vyasoloka muvyuma atenga? (Isa. 40:26; Loma 11:33)

  • Tanga Wavaka-Kolose 1:15-17.

    Mulimo muka azachile Yesu hakutenga vyuma, kahechi chatela kutulingisa tumumone ngachilihi? (Kolo. 1:15-17)

  • Tanga Kuputuka 1:1-10.

    Uno kano kaye kafuma kulihi? (Kupu. 1:1)

    Kalunga atengele vyuma muka halikumbi lyatete? (Kupu. 1:3-5)

    Lumbununa vyuma vyasolokele halikumbi lyamuchivali lyakutenga vyuma. (Kupu. 1:7, 8)