Kwanuka Kufwa chaMwata cheji kutulingisanga tushinganyeke havyuma vyakulutwe natukalivwisa kuwaha mwomwo yandando yakusokola, vyakufwana nge kusanguka. Yehova kasakile ngwenyi vatu vafwengako. Echi chikiko cheji kutulingisanga tulishone chikuma nge tunafwisa mutu twazanga. (Koli. 1, 15:26) Yesu evwile kukola kumuchima hakumona tumbaji twenyi vali nakulila Lazalu. (Yowa. 11:33-35) Hakuwana nge Yesu asolola muchima atwama nawo Ise, ngocho twafwelela ngwetu naYehova eji kwivwanga kukola kumuchima hakutumona tuli nakulishona havatu twazanga vaze vanafu. (Yowa. 14:7) Yehova atalilila kulwola luze mwakasangula vangamba jenyi vaze vafwa, kaha nayetu twatela kulinga vene ngocho.—Yopa 14:14, 15.

Hakuwana nge Yehova kapwa Kalunga waliuyako, ngocho chapwa chakwoloka kufwelela ngwetu kusanguka nachikapwako mujila yakulonga. (Koli. 1, 14:33, 40) Muchishishisa chakupwanga navipeji, natukevwanga kuwaha kusambilila vatu vaze navakasanguka. Kutala mweji kushinganyekanga halutalililo lwakusanguka, chikumanyi nge munafwisa tahi? (Koli. 2, 4:17, 18) Kutala mweji kusakwililanga Yehova hakutuhana ndando yakusokola nahakutulweza muVisoneka ngwenyi vafu navakasanguka tahi?—Kolo. 3:15.

  • Masepa jenu muka chipwe vausoko wenu vaze mwafwila chikuma kukamona cheka?

  • Vatu muka vavuluka muMbimbiliya vaze muli nakufwila kukamona nakushimutwila navo?