OVYO CHAPWILA CHACHILEMU: Kulitumina mijimbu hamakina chinahase kutukafwa chipwe kutunehela ponde. Ngocho vaka-Kulishitu vamwe kavasaka kulitumina mijimbu hamakinako. Oloze vaka-Kulishitu veka veji kutumanga mijimbu hamakina mangana vashimutwile navatanga javo namasepa. Chipwe ngocho, Liyavolo asaka tufwile kutumanga mijimbu yakuhenga hamakina mangana twenyeke vilinga vyetu nausoko wetu naYehova. Shikaho, twatela kuzachisa Mazu aKalunga, ngana muze alingile Yesu, mangana tutachikize jiponde jize twatela kulihendako.—Luk 4:4, 8, 12.

PONDE MWATELA KULIHENDAKO:

  • Kuzachisa makina halwola lwalusuku. Kuzachisa makina chipwe kutuma mijimbu hamakina halwola lwalusuku cheji kwenyekanga lwola luze twatela kuzachisa kumilimo yakushipilitu

    Jindongi jamuMbimbiliya: Efw 5:15, 16; Fwi 1:10

  • Kutala mivwimbimbi yayipi. Kutala mivwimbimbi yize nayilingisa mutu evwenga peha chinahase kumulingisa apwenga natato yakutalanga mivwimbimbi yavatu vali uselesele nakulinga ujila. Kaha nawa kutanga mijimbu yavatu vaze vasosoloka kulufwelelo cheji kuzeyesanga lufwelelo lwamutu

    Jindongi jamuMbimbiliya: Mat 5:28; Fwi 4:8

  • Kutuma mijimbu chipwe jifwato jakuhenga. Hakuwana nge muchima wapwa uka-kutangisa, ngocho unahase kulingisa mutu atume mijimbu chipwe jifwato jajipi hamakina. Oloze kulinga ngocho chinahase kupihisa lijina lyamutu nakumulingisa azeye kushipilitu

    Jindongi jamuMbimbiliya: Lom 14:13; Efw 4:29

TALENU VINDIYO YAKWAMBA NGWAVO, PWENUNGA VAKUVANGULUKA HAKULITUMINANGA MIJIMBU HAMAKINA, KUFUMAHO SHIMUTWILENU HAMIVWIMBIMBI YILI MWISHI: