Yehova ahakako jishimbi jize vatela kukavangiza vatu mangana vapwenga navilinga vyamwaza. Chakutalilaho, ahakileko lushimbi lwakwamba ngwenyi valunga napwevo muulo kavatela kulihandununako. (Mat 19:4-6, 9) Ahunga vilinga vyaujila vyosena. (1Ko 6:9, 10) Ahakako nawa jindongi jakutalisa kukuvwala nakulilenga jize vatela kukavangiza vangamba jenyi.—Lus 22:5; 1Ch 2:9, 10.

Makumbi ano vatu vavavulu kaveshi nakukavangiza jishimbi jaYehovako. (Lom 1:18-32) Veji kulondezezanga vilinga vyavatu vamukaye kutalisa kukuvwala nakulilenga. Vatu vaze veji kukundwizanga vilinga vyavipi veji kutolekanga vaze veji kukavangizanga jishimbi jaKalunga.—1Pe 4:3, 4.

Hakupwa tuVinjiho jaYehova, twatela kupwa vakumika hakukundwiza jishimbi jaKalunga. (Lom 12:9) Mujila muka? Twatela kupwa vakuzangama hakulweza vatu jishimbi jaYehova. Chipwe ngocho, nayetu nawa twatela kupwa navilinga vyamwaza mukuyoya chetu. Chakutalilaho, hakusakula vyakuvwala nakulilenga, tunahase kulihulisa ngwetu: ‘Uno vyuma ngunasakula vyakundwiza jishimbi jaYehova tahi nyi jakaye? Uno uvwalo wami nakulilenga chami vyasolola nge ngwevwa Kalunga woma tahi?’ Hakusakula jivindiyo chipwe jipolongalamu jahaTV, tunahase kulihulisa ngwetu: ‘Uno Yehova mwevwa kuwaha navyuma ngunasakula tahi? Uno vyakundwiza jishimbi jeya? Uno vyakuhemahema nangusakula vinahase kungulingisa nguhone kukundwiza jishimbi jaYehova tahi? (Ji 101:3) Uno vyuma kana navihukanyisa tanga yami chipwe vakwetu tahi?—1Ko 10:31-33.

Mwomwo ika chapwila chachilemu kukundwizanga jishimbi jaYehova? Kalinwomu Kulishitu Yesu anongese kano kaye nakufumisako vyuma vyavipi vyosena. (Eze 9:4-7) Vatu vaze veji kulinganga mwaya muchima waKalunga vakiko kaha navakayovoka. (1Yo 2:15-17) Shikaho twatela kukundwizanga jishimbi jaYehova mangana vatu vamone vilinga vyetu vyamwaza nakuvalingisa vatohwese Kalunga.—1Pe 2:11, 12.

Uno vyuma ngunasakula kutalisa kukuvwala nakulilenga vyasolola nge ngukwechi vilinga vyamwaza tahi?

TALENU VINDIYO YAKWAMBA NGWAVO PWENU MASEPA JAYEHOVA—LUNGA NAPWEVO NAVAKAPWANGA MUJIMBA UMWE, KUFUMAHO KUMBULULENU VIHULA VINO:

  • Mwomwo ika chapwila chachilemu kukavangizanga jishimbi jaYehova?

  • Mwomwo ika visemi vatela kunangula vana vavo jishimbi jaYehova shimbu vachili vanyike?

  • Uno tuvosena tunahase kukafwa ngachilihi vatu vanganyale kuvilinga vyamwaza etavila Kalunga?