Yesu alwezele vaka-kumukavangiza vanangule vatu vapwenga tumbaji. (Mat 28:19) Echi chasakiwa kwambulila vatu nakuvanangula. Ngocho twatela kulihulisanga chihula chino, ‘Vyuma muka navingukafwa ngwambulilenga vatu nakuvanangula mangana vapwenga tumbaji?’

KWAMBULULA

Twatela kutondatonda “weshowo atela,” muchishishisa chakuvandamina ngwetu alijile yivene. (Mat 10:11) Shikaho, nge tuli mumulimo wakwambulula, twatela kufwila kwambulila vatu vaze ‘natuliwana navo.’ (Vil 17:17) Luchiya alumukile nakupwa kambaji mwomwo yamujimbu uze ambulwilenga kaposetolo Paulu.—Vil 16:13-15.

“Kuva mbuto jove nachimene, kaha livoko lyove kanda nalinoka palanga nakuchingoloshiko” (Kwa 11:6)

TALENU VINDIYO YAKWAMBA NGWAVO, TWALENUHO LIKA KWAMBULULA ‘CHAKUZENEKA KULITWAMINA’—MUKUTULUKILA NAKUZUVO HIZUVO, KUFUMAHO KUMBULULENU VIHULA VINAKAVANGIZAHO:

  • Uno Samuel asolwelenga ngachilihi ngwenyi afwililile kutumba mbuto jamuchano?

  • Mwomwo ika twatela kutwalaho lika kuzachisa jijila jakulisezaseza hakwambulula?

  • Uno mweji kufwilanga kwambulula mujimbu waWangana kuvatu vakufwana ngachilihi?

KUNANGULA

Twatela kuzata nangolo numba tunangule vatu vapwenga tumbaji muchishishisa chakuvaselanga kaha mikanda. Ngocho twatela kukindulukilanga kuvatu natuwana nakuvanangulanga Mbimbiliya numba vahase kuzovoloka kushipilitu. (1Ko 3:6-9) Uno vyuma muka twatela kulinga kachi nge vatu natwambulila mujimbu waWangana navahona kuzovoloka washi? (Mat 13:19-22) Twatela kutwalaho lika kutondatonda vatu vaze vapwa nge “mavu amwaza.”—Mat 13:23; Vil 13:48.

“Ami ngwatumbile, Apolo atukumwinyine meya, oloze Kalunga ikiye akoleselenga” (1Ko 3:6)

TALENU VINDIYO YAKWAMBA NGWAVO, TWALENUHO LIKA KWAMBULULA ‘CHAKUZENEKA KULITWAMINA’—KUVIHELA VYASANGA NAKUTUNGA TUMBAJI, KUFUMAHO KUMBULULENU VIHULA VINAKAVANGIZAHO:

  • Uno Solomon naMary vatukumwinyine ngachilihi mbuto jamuchano japwile muli Ezekiel naAbigail?

  • Vyuma muka twatela kufwila kutesamo hakwambulila vatu mujimbu wamwaza kuzachisa jijila jakulisezaseza?

  • Uno tunahase ngachilihi kunangula vatu nakuvaheta hamuchima?