Mwaka himwaka, vandumbwetu vavavulu vakuzeya kushipilitu veji kupwanga kuchilika chaKwanuka Kufwa chaMwata. Vapwilenga nakuzachila Kalunga, oloze vazeya mwomwo yaukalu wakulisezaseza. Ukalu umwe shina uze vanavuluka mumbuloshuwa ya Kinduluka Kuli Yehova. (Hep 12:1) Chipwe ngocho, ava vandumbwetu vapwa vavalemu kuli Yehova mwomwo vavalanda namanyinga aMwanenyi. (Vil 20:28; 1Pe 1:18, 19) Tunahase kuvakafwa ngachilihi mangana vakinduluke kuli Yehova?

Vakulwane muvikungulwilo veji kutondanga ava vandumbwetu vakuzeya nakuvakafwa ngana muze kafunga eji kutondanga mikoko jenyi vaze vanajimbala. (Luk 15:4-7) Muchima kana wasolola muchima waYehova wakuzakama vangamba jenyi. (Yel 23:3, 4) Tuvosena tunahase kukafwa ava vandumbwetu keshi nge vakulwane kahako. Yehova mwevwa kuwaha nakutukisula nge natuzata nangolo mangana tukafwe ava vandumbwetu. (Vis 19:17; Vil 20:35) Shikaho, shinganyekenu vandumbwenu vaze mwatela kukafwa. Lingenu ngocho chakuzeneka kulangisa.

TALENU VINDIYO YAKWAMBA NGWAVO KOLEZEZENUNGA VAZE VANAZEYE KUSHIPILITU, NAKUKUMBULULA VIHULA VINAKAVANGIZAHO:

  • Vyuma muka alingile ndumbu Abbey omu aliwanyine naChinjiho uze katachikijileko?

  • Mwowmo ika twatela kulweza vakulwane muchikungulwilo nge tunakusaka kukafwa ndumbwetu uze azeya kushipilitu?

  • Uno Abbey aliwahishile ngachilihi hakuya cheka nakukafwa Laura?

  • Uno Abbey asolwele ngachilihi muchima walukakachila, nakutalilila chikoki, nazangi hakukolezeza Laura?

  • Vyuma muka natulinangula kuchifwanyisa chaYesu chatwama hali Luka 15:8-10?

  • Nganyo muka yafumine hakukafwa Laura?