Numba tuhu vaka-kutambuka hatuvalu vawana vapwa vakukomwesa kaha nawa vakwivwisa woma, oloze kamwatela kulizakaminako. Mwomwo ika? Mwomwo Mbimbiliya navyuma vinakusoloka mukaye makumbi ano, vinakutukafwa tutachikize kanawa ovyo vemanyinako vaka-kutambuka hatuvalu. Numba tuhu kutambuka chavaka-tuvalu chaneha vihuli hano hamavu, oloze chinahase nawa kumihana lutalililo lwamwaza hamwe kaha navaka-tanga yenu. Mujila muka? Chatete, tuchitalenu jino ovyo vemanyinako.

MUKA-KUTAMBUKA HAKAVALU UTOMA

Chakumwenesa kana chatwama namazu akwamba ngwavo: “Ngwatalile, ngwamwene kavalu utoma. Uze atwamineho apwile nauta wamanana, kaha vamuhanyine muchama, ngocho ayile nakufungulula mangana akumise kufungulula chenyi.”—Kusoloka 6:2.

Uno iya anakutambukisa ou kavalu utoma? Ou muka-kutambukisa vamusolola kanawa mumukanda woumwe waKusoloka, kaha vamuvuluka ngwavo “Lizu lyaKalunga.” (Kusoloka 19:11-13) Vulukiso yakwamba ngwavo, “Lizu” yatalisa kuli Yesu Kulishitu, mwomwo apwa muka-kuhanjikilako Kalunga. (Yowano 1:1, 14) Vamuvuluka cheka ngwavo “Mwangana wavamyangana, Mwata wavamyata.” Kaha nawa apwa “Wakushishika, Wamuchano.” (Kusoloka 19:16) Chikupu vene, Yesu atwama nangolo, kaha kajizachisa mujila yakuhengako. Kahechi chaneha vihula vyavivulu.

Iya ahana Yesu ngolo jakufungulula? (Kusoloka 6:2) Muchakumwenesa chize amwene kapolofweto Ndanyele, Meshiya vamufwanyishile ‘kumwanamutu,’ kaha vamuhanyine “chiyulo, naulemu, nawangana” kuli uze napungako “Kufuma Kushikulu” Yehova Kalunga. * (Ndanyele 7:13, 14) Ngocho Kalunga Wangolo Josena ikiye ahana Yesu ngolo, nalisesa lyakuyula nakusopesa vatu. Kavalu utoma atamo kwimanyinako jita yakwoloka yize mwakalwa Mwana Kalunga mwomwo kakavulu Visoneka vyazachisa vyuma vitoma kwimanyinako kwoloka.—Kusoloka 3:4; 7:9, 13, 14.

Lwola muka vaka-kutambuka hatuvalu vaputukile kutambuka? Nyingililenu ngwenu Yesu, uze apwa muka-kutambuka hakavalu watete, aputukile kutambukila hakavalu omu vamuhanyine muchama. (Kusoloka 6:2) Mwaka uka vaswanyishile Yesu kupwa Mwangana mwilu? Kavamuswanyishile hahaze vene akindulukile mwilu kufuma hakufwa chenyiko. Mbimbiliya yasolola nge avangililile kuvandamina. (WavaHepeleu 10:12, 13) Yesu alwezele vaka-kumukavangiza chinjikizo chalwola mwakakumisa kuvandamina naluze mwakaputuka kuyula mwilu. Ambile ngwenyi omu mwakaputuka kuyula, vyuma navikapihya chikuma mukaye. Nakukapwa jijita, najizala namisongo yachihita. (Mateu 24:3, 7; Luka 21:10, 11) Omu Jita yaKaye yakulivanga yaputukile mu 1914, chasolokele hatoma nge vatu vengilile jino mulwola lwalukalu chikuma luze vavuluka muMbimbiliya ngwavo “makumbi akukuminyina.”—WaChimoteu 2, 3:1-5.

Mwomwo ika vyuma vinakupihilako lika ngana muno mukaye kufuma halwola luze Yesu aputukile kuyula mu 1914? Mwomwo Yesu aputukile kuyula mwilu keshi hano hamavuko. Kufumaho, mwilu mwepukile jita, ngocho Yesu uze apwa Mwangana wamuhya vavuluka ngwavo Mikayele vamuhakile halitanda, kaha ambilile Satana navandemone jenyi hano hamavu. (Kusoloka 12:7-9, 12) Kufuma vene haze Satana vamumbilile hano hamavu, ali lika namatoto amanene mwomwo atachikiza ngwenyi nalitulu namakumbi amandende kaha. Shikaho, kalinwomu Kalunga anongese Satana. (Mateu 6:10) Ngocho, tushimutwilenu jino hali vaka-kutambuka hatuvalu vatatu vaze vasolola hatoma nge tuli nakuyoyela mulwola lwalukalu vavuluka ngwavo “makumbi akukuminyina.” Ava vaka-kutambuka hatuvalu vatatu vanemanyinako ukalu vali nakumona vatu mukaye kosena.

MUKA-KUTAMBUKA HAKAVALU UCHILA

“Kwalovokele nawa kavalu uchila nge kakahya, kaha uze atwamineho vamuhanyine ngolo jakufumisa kuunda hamavu mangana vatu valijihe mwavomwavo. Vamuhanyine nawa poko yamukwale yayinene.”—Kusoloka 6:4.

Ou muka-kutambuka hakavalu kana emanyinako jijita. Kaha nawa afumisa kuunda hamavu hosena keshi mulifuchi limwe kahako. Mumwaka wa 1914, mukaye kosena mwepukile jita yatete yayinene. Kufumaho kwepukile nawa jita yakaye yamuchivali yize yajihile chikuma vatu. Kuhehwojola chimwe chasolola nge kuvula chavatu vanafu mujijita kufuma mu 1914, chinatoho chikuma kuhambakana kunyima. Kaha nawa vatu vavavulu vayanjiwile naukalu weka.

Uno jijita jinalisale ngachilihi makumbi ano? Makumbi ano, vatu vanazovoloka chikuma mukutunga vitwa vyakujihisa vatu kuhambakana kunyima. Namauka aze alivukula kupwa akakuneha kuunda akufwana nge United Nations, anahono kukanyisa ou muka-kutambuka hakavalu uchila.

MUKA-KUTAMBUKA HAKAVALU WILAVA

“Ngwatalile, ngwamwene kavalu wilava, kaha uze atwamineho apwile nachipezaliso mulivoko lyenyi. Hakachi kavaze vaka-kuyoya vawana ngwevwileho lizu lyakwamba ngwavo: ‘Kwate yimwe yatiliku, ndando yayo ndenali yimwe, kaha jikwate jitatu jambale, ndando yajo ndenali yimwe. Kaha kanda nawenyeka maji amulive navinyoko.’”—Kusoloka 6:5, 6.

Ou muka-kutambuka hakavalu emanyinako zala yakalombolombo. Tunamono jino kukaluhwa chavyakulya hakuvuluka chipezaliso chakwate yimwe yatiliku, (1.08 L) navachilanda nandenali yimwe, fweto yize atambwilenga mutu hamilimo azachilenga halikumbi lyamuundu mulikulukaji lyamyaka lyakulivanga. (Mateu 20:2) Eyi ndenali yimwe yachichele mutu nahase kuyilanda vipezaliso vyajikwate jitatu jambale, manona ambale vawamwenenga kupwa amokomoko hakuwesekesa kutiliku. Uno vyakulya kanevi vanahase kuvizuka ngachilihi kutanga yayinene? Vatu vavalweza vapwenganga namuchima wakulama vyakulya vyavo nganomu vanachisolola hakuvuluka maji amilive navinyo kulya chize chapwilengako kunyima.

Kufuma vene mu 1914, tunamono vyuma vyakusolola nge ou muka-kutambuka hakavalu wilava achili lika nakutambuka. Mulikulukaji lyamyaka lyakusokesa 20, vatu kafwe jimiliyoni 70 vafwile nazala yakalombolombo. Liuka limwe lyambile ngwalyo: “Mumwaka wa 2012 swi namu 2014, vatu vakuheta kujimiliyoni 805 vanapunga muukalu waunene wakuhona kuwana vyakulya vyakutamo.” Mujimbu umwe wambile ngwavo: “Mwaka himwaka vatu vali nakufwa chikuma nazala kuhambakana vatu vanakufwa namusongo waAIDS, nachishikashika nawatulo (TB).” Numba tuhu vatu vanakilikita mangana vakeheseko zala mukaye, oloze kavahashile kuhonesa uze muka-kutambuka hakavalu wilavako.

MUKA-KUTAMBUKA HAKAVALU UTOMONOKA

“Ngwatalile, ngwamwene kavalu utomonoka, kaha uze atwamineho lijina lyenyi ikiye Kufwa. Kaha Fuka yapwile nakumukavangiza chikuma munyima. Jino vavahanyine wata hachihanda chimwe chakusokesa muvihanda viwana vyamavu, mangana vajihenga vatu napoko yamukwale yayisuku, nazala, namusongo wachihita, navisuma vahamavu.”—Kusoloka 6:8.

Ou muka-kutambuka hakavalu wamuchiwana emanyinako kufwa navyuma vyeka vize vyeji kunehanga kufwa. Kufuma mumwaka wa 1914, musongo vavuluka ngwavo Spanish flu wajihile jimiliyoni javatu. Musongo kanou wakwachile vatu vavavulu chikuma.

Ou musongo waSpanish flu wapwile kaha maputukilo. Vaka-kuhehwojola vamba ngwavo mulikulukaji lyamyaka lyakusokesa 20, makombakaji avatu vavavulu vanafu namusongo wachingongo. Makumbi ano misongo yakufwana nge AIDS, nachishikashika nawatulo (TB) yili nakujiha chikuma vatu numba tuhu kuli kuzovoloka chachinene mukutunga vitumbo.

Ukalu kana uli nakuneha kufwa, numba upwa wajijita chipwe wajizala, chipwe wamisongo. Fuka nawa kayazala navafuko kaha nawa kayahana lutalililoko.

 KUYOYA CHAMWAZA CHILI KULUTWE

Ukalu wosena tuli nakumona makumbi ano kalinwomu ukume. Anukenu ngwenu: Yesu “ayile nakufungulula” mu 1914, nakumbila Satana hamavu nakumukuchikilaho hakapyapya kakandende, oloze Yesu kakumishile kufungulula chenyiko. (Kusoloka 6:2; 12:9, 12) Kalinwomu ngana, Yesu mwafumisa ukalu wosena aneha Satana hano hamavu nakwenyeka vatu vosena vaze veji kukundwizanga Liyavolo. (Kusoloka 20:1-3) Yesu mwakafumisako ava vaka-kutambuka hatuvalu vatatu hamwe kaha naukalu vaneha. Mujila muka? Talenu vyuma yahanjika Mbimbiliya.

Kakweshi kukapwa cheka jitako, oloze nakukapwa kuunda. Yehova “mwakumisa jijita hamavu hosena. Mwahokwojola mata amanana nakuchika makunga.” (Samu 46:9) Vatu vaze vazanga kuunda “navakalivwisa kuwaha kuunda chamwenemwene.”—Samu 37:11.

Kakweshi kukapwa cheka zala yakalombolomboko, oloze vyakulya navikalisala. Mbimbiliya yamba ngwayo: “Hamavu nahakapwanga mbuto jamanona jakulisala. Hajipili hosena nahakapwanga mbuto jamanona jajivulu.”—Samu 72:16.

Yesu mwakafumisako ukalu wosena uze vaneha ava vaka-kutambuka hatuvalu vatatu

Kakweshi kukapwa cheka misongo nakufwako, oloze vatu vosena navakapwa vakulikangula nakukayoya haya myaka yosena. Kalunga “mwakahunda masoji osena kumeso avo, kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako.”—Kusoloka 21:4.

Omu Yesu apwile hano hamavu, ahanjikile vyakuyoya chamwaza chize nachikapwako kulutwe muchiyulo chenyi. Yesu apwile wakuunda, kaha alishile vatu mujila yakukomwesa, okilenga vaveji, kaha nawa asangwilenga vafu.—Mateu 12:15; 14:19-21; 26:52; Yowano 11:43, 44.

Vinjiho jaYehova navawahilila kumilweza vyuma mwatela kulinga oholyapwa shimbu kanda vafumiseko ava vaka-kutambuka hatuvalu. Kutala namwitavila kulinangula vyuma vyavivulu tahi?

^ par. 7 Kweseka naMbimbiliya, Yehova likiko lijina lyaKalunga.