Vyuma muka navimikafwa mulivwise kuwaha kutanga Mbimbiliya nakunganyala? Talenu vyuma vino vitanu vinakafwe vatu vavavulu.

Tangilenu kuchihela chamwenemwene. Esekenu kuwana chihela chize kacheshi navyemako. Zangamenu navyuma vyakumitangula mangana muhake muchima kuvyuma munakutanga. Mwatela kutangila kuchihela chamwaza kuze kunakuhita kapeho, kahechi nachimikafwa munganyale.

Kamwatela kutanga oku munakushinganyeka vyekako. Mbimbiliya yafuma kuli Setu wamwilu, ngocho namunganyala chikuma nge namupwa ngana mwakanyike uze ali nakusaka kulinangula kuli chisemi chenyi wazangi. Kachi nge mukwechi vishinganyeka vyavipi haMbimbiliya, kaha mwatela kwecha kushinganyeka vyuma kana mangana Kalunga aminangule.—Samu 25:4.

Lombenu shimbu kanda mutange. MuMbimbiliya mwatwama vishinganyeka vyaKalunga, ngocho twatela kumulomba mangana atukafwe tuyivwishise. Kalunga ashika “kuhana shipilitu yajila kuli vaze navamulombayo.” (Luka 11:13) Shipilitu yajila nayimikafwa mwivwishise vishinganyeka vyaKalunga. Kutwala muze, nayimikafwa mwivwishise “navyuma vyakujiminyina vyaKalunga.”—Wavaka-Kolinde 1, 2:10.

Tangenu nakwivwishisa. Kamwatela kufwila kaha kukumisa washiko. Mwatela kushinganyeka havyuma muli nakutanga. Lihulisenu vihula vyakufwana nganevi: ‘Vilinga muka ngunamono hali ou mutu nguli nakutanga? Nanguzachisa ngachilihi vyuma kana mukuyoya chami?’

Sakulenu vyuma muli nakufwila kutesamo. Hakusaka mukanganyale hakutanga chenu Mbimbiliya, mwatela kusakula vyuma vize navikamikafwa mukuyoya chenu. Munahase kusakula vyuma vyakufwana nganevi: ‘Ngunakusaka kulinangula vyavivulu hali Kalunga. Nguli nakusaka kupwa mutu wavilinga vyamwaza, chipwe lunga chipwe pwevo wamwenemwene muulo.’ Kaha mwatela kusakula mijimbu yimwe muMbimbiliya yize nayimikafwa mutesemo vyuma kana. *

Evi vyuma vitanu tunavuluka navimikafwa muputuke kutanga Mbimbiliya. Uno vyuma muka mwatela kulinga mangana mulivwise kuwaha chikuma kutanga Mbimbiliya? Chihande chinakavangizaho chili najijila jimwe jize najimikafwa.

^ par. 8 Kachi nge kamwatachikijile mijimbu yize nayimikafwako, kaha lwezenu Vinjiho jaYehova vamikafwe.