• MWAKA ASEMUKILE: 1964

  • MULIFUCHI ASEMUKILA: ENGLAND

  • CHIYOYELO CHENYI CHAKUNYIMA: MWANAPWEVO WAKULIKANGA UZE ASEMENE UNYIKE

MUJIMBU WAKUYOYA CHAMI

Ngwasemukilile muPaddington, ngalila yize yatwana navatu vavavulu munganda yaLondon, muEngland. Ngwapwile nakutwama namama navayayami vamapwevo vatatu. Tata apwilenga chitakwa, ngocho apitukilenga.

Omu ngwapwile ngukanyike mama angulwezele ngulombenga ufuku hiufuku. Ngwapwile nakaMbimbiliya kakandende kaze kapwile namukanda waJisamu, kaha ngwalilongesele mazu apwilemo nakuwemba jino kupwa mwaso. Ngweji kwanukanga mazu amwe ngwatangile mumukanda wami wakukaye aze apwilenga lika mumutwe akwamba ngwawo: “Likumbi limwe katweshi kukashinganyeka vyakulutweko.” Mazu kana angulingishile nguhonenga kusavala nakuputuka kushinganyeka kaha vyakulutwe. Ngwashinganyekele ngwami: ‘Chikupu vene mukuyoya mwasakiwa vyuma vyavivulu. Jino vyuma muka ngunakuyoyela?’ Kangwapwile nakusaka kufwako.

Ngwaputukile kushinganyeka chikuma havyuma vyakupanda. Ngwahanjikilenga navafu, nakuya kumafuka navakwetu vaka-shikola, nakutalanga mivwimbimbi yakwivwisa woma hamwe navakiko. Twashinganyekele ngwetu yapwile yamwaza chikuma kaha nawa yakwivwisa woma.

Ngwaputukile kuhungumuka chikuma omu ngwapwile kaha namyaka yakusemuka 10. Ngwaputukile kunwa makanya, nakushimbula chiku angutuvile tulo. Kutwala muze, ngwaputukile kunwa nalyamba. Kahomu ngwapwile namyaka yakusemuka 11, ngwaputukile kunwa nawala. Numba tuhu kangwazangilenga omu wevwakanyinengako, oloze ngwazangilengako kaha kupenda. Ngwazangilenga nawa myaso nakukina. Kakavulu ngwayilenga kuviwanyino nakuvihela vyakunwina wala. Ngwaseunukilenga naufuku kaha nawa ngwakukindulukilenga shimbu kanda likumbi litutuke. Nge kunachi ngwazeyelenga chikuma, ngocho kangwayilenga kushikolako. Kakavulu nge nguli mushikola, ngwalovekelenga nakunwa wala nakukinduluka cheka.

Echi changulingishile ngufwele omu ngwakumishile shikola. Numba tuhu mama evwile chikuma kupihya nakupwa namatoto, oloze katachikijile kanawa vilinga vyamiko. Twazungilenga namama, kaha kutwala muze ngwachinyine hembo. Ngwatwaminenga nakajila kami Tony uze apwile Rastafarian. Kaha Tony nawa apwilenga mwiji, alandulwilenga maundu akupendesa kaha nawa apwile napuho yaulyanyi. Nakushimbula chiku omu ngwapwile namyaka yakusemuka 16 ngwemichile, kaha ngwasemene mwana walunga.

 OMU MBIMBILIYA YALUMWINE KUYOYA CHAMI

Omu ngwapwile nakutwama kuchihela kuze valaminyinenga vajike vamapwevo vaze vapwile navakemba ngwaliwanyine naVinjiho jaYehova. Vaka-fulumende vanguhanyine kapete kakutwamamo. Vinjiho jaYehova vavali vamapwevo vatambukililenga vakwetu vamwe vaze twatwaminenga navo. Kaha likumbi limwe nayami ngwayile nakwivwililako. Ngwafwililile kusopolola makuli aVinjiho jaYehova. Oloze vazachishile Mbimbiliya hakukumbulula vihula vyami vyosena mujila yakuunda kaha nawa yakwivwakana kanawa. Vangwivwishile kuwaha hakuwana nge vapwile valikoji kaha nawa vavavwovu. Kufumaho, nayami ngwetavilile kulinangula Mbimbiliya.

Nakushimbula chiku, ngwalinangwile vyuma vimwe muMbimbiliya vize vyalumwine kuyoya chami. Kufuma vene kuunyike wami, ngwevwilenga woma kufwa. Oloze ngwatachikijile jino vyuma anangwile Yesu kutalisa kukusanguka. (Yowano 5:28, 29) Ngwalinangwile nawa nge Kalunga anguzakama. (WaPetulu 1, 5:7) Kaha nawa mazu angukwachile chikuma kumuchima shina ahali Yelemiya 29:11 akwamba ngwavo: “Yehova nambe ngwenyi, ‘Ngunatachikiza vyuma nguli nakushinganyeka hali enu. Nguli nakushinganyeka kumitwamisa mukuunda, keshi kuminehela lupiko, mangana mukayoye kanawa kulutwe nakupwa nalutalililo.’” Ngwaputukile kufwelela jino ngwami ngunahase kupwa nalutalililo lwakukatwama muPalachise haya myaka yosena hano hamavu.—Samu 37:29.

Vinjiho jaYehova vangusolwelele zangi yamwenemwene. Omu ngwayile kukukunguluka chavo halwola lwatete, vatu vosena vanguzakamine nakungusolwela chisambo. (Yowano 13:34, 35) Jila vangutambwililemo yalihandunwine chikuma nomu chapwile kuchachi yetu. Vinjiho jaYehova vangutambwile namavoko avali chamokomoko navilinga vyami. Kakavulu vashimutwililenga nayami, nakunguzakama, nakunguhana vyuma vyeka vize ngwasakiwile kumujimba. Ngwevwilenga nge nayami ngwatwama mutanga yayinene yavatu vakwechi michima yamwaza.

Vyuma ngwalinangwile muMbimbiliya, vyangulingishile ngutachikize nge ngwatelele kwalumunako vyuma vimwe mukuyoya chami mangana ngukavangize jishimbi jaKalunga jamwakupwila nachiyoyelo chize etavila Kalunga. Chipwe ngocho, kachapwile chachashi kwecha kunwa makanyako. Kaha nawa myaso yimwe yize ngwapwilenga nakwivwilila yangulingishile ngutwaleho lika kunwa lyamba, ngocho ngwalitwaminyine kwivwilila myaso kana. Hakuwana nge ngwasakilenga kupwa wakuunda, ngocho ngwalitwaminyine kuyanga kuviwanyino nakuvihela vyakunwina wala kuze chapwile chachashi kuputuka cheka kunwa. Kaha nawa ngwafwililile kupwa namasepa vamwenemwene vaze navangukafwa ngwalumune kuyoya chami.—Vishimo 13:20.

Tony naikiye nawa apwile nakulinangula Mbimbiliya naVinjiho jaYehova kuze ayile. Kahomu Vinjiho jaYehova vakumbulwilenga vihula vyenyi kuzachisa Mbimbiliya, naikiye etavilile vyuma apwile nakulinangula kupwa vyamuchano. Kutwala muze azachile nangolo nakwalumuna kuyoya chenyi. Alitwaminyine kulikata namasepa jenyi vaze vapwile vilyanyi, nakwecha vilinga vyauhwanga, nawiji nakunwa lyamba. Hakusaka twivwise Yehova kuwaha, tuvosena twalumwine chiyoyelo chetu chachipi, nakukafwa mwanetu apwenga navilinga vyamwaza. Kaha kuheta mu 1982 twalimbachile.

“Makumbi ano kangwasavala nakulizakamina havyuma vyakulutwe chipwe kwivwa woma kufwako”

Ngweji kwanukanga omu ngwahehwojwelenga vihande vyamujimangazini jaKaposhi Kakutalila naTonenu! * jize japwile namijimbu yavatu vaze valumwine kuyoya chavo ngana muze ngwasakile kulinga nayami. Vyakutalilaho vyavo vyangukafwile chikuma. Vyangukolezezele ngutwaleho lika kwalumuna chiyoyelo chami. Ngwalembelelenga Yehova angukafwe. Ami naTony vatumbapachishile muJuly 1982 nakupwa jino tuVinjiho jaYehova.

OMU NGUNANGANYALA

Kutunga usepa wakukola naYehova Kalunga chinayovola mwono wami. Ami naTony tunamono omu Yehova natukafwe muukalu wosenou tunahichimo. Tunalinangula kupendamina hali Kalunga halwola tunahichinga muukalu, kaha tunakwivwa chikupu ngwetu natuzakamanga mutanga yetu.—Samu 55:22.

Ngwafwililile kukafwa vana vami navakiko vatachikize Yehova nganomu ngwalingile yami. Ngweji kwivwanga jino kuwaha nayami omu nguli nakumona vana vavo vali nakuzovoloka hakupwa nachinyingi chakutachikiza Kalunga.

Makumbi ano kangwasavala nakulizakamina havyuma vyakulutwe chipwe kwivwa woma kufwako. Ami naTony twasaka kutambukila vikungulwilo vyavivulu vyaVinjiho jaYehova nakuvakolezeza chalumingo hichalumingo. Tweji kwazananga navo mumulimo wakunangula vatu ngwetu nge navafwelela muli Yesu, kaha navakiko navakalivwisa kuwaha kuyoya chahaya myaka yosena.

^ par. 17 Vausoneka nawa kuli Vinjiho jaYehova.