ENOKE ayoyele myaka yayivulu. Pamo chinahase kupwa chachikalu kuli etu kushinganyeka chuma kana, oloze lunga kana ayoyele myaka 365, mutando yize munahase kuyoyela vatu vawana nakuzombokaho kweseka nakuyoya chamakumbi ano. Kweseka nalwola ayoyelelemo, Enoke kapwile kashinakajiko. Makulukaji amyaka akuzomboka 50, vatu vayoyelenga myaka yayivulu chikuma kuhambakana makumbi ano. Mutu watete Alama, ayoyele myaka yakuhambakana 600 numba Enoke asemuke, kufumaho ayoyele nawa myaka 300. Kaha nawa vana vaAlama vamwe vayoyele myaka yayivulu kuhambakana ikiye. Enoke pamo asolokelenga ukweze numba tuhu apwile namyaka yakusemuka 365. Kulumbununa nge kapwile kashinakajiko.

Chasoloka nge Enoke vasakile kumujiha. Achishinganyekenu ali nakuchina oku ali nakushinganyeka mujila vanakwilamo vatu kumujimbu navambulwila wakufuma kuli Kalunga. Vamukwachililile matoto chikuma. Vatu kana vamuhungile. Vakanyine mujimbu uze avambulilile nakulumbilisa nawa Kalunga uze amutumine. Kavahashile kuveta Yehova Kalunga kaEnokeko, oloze vafwililile kuveta mutu wenyi. Atela Enoke ahuhwasanyine numba nge mwakamona cheka tanga yenyi. Kutala apwile nakushinganyeka puwenyi navana venyi vamapwevo, nayou walunga Metusela, namuzukulyenyi Lameke tahi? (Kuputuka 5:21-23, 25) Uno awa akiko apwile makumishilo akuyoya chenyi nyi?

Enoke vamuvuluka kupwa mutu wakulipwila mumijimbu yamuMbimbiliya. Vamuvuluka kaha mumijimbu yayihi chikuma yitatu yamuMbimbiliya. (Kuputuka 5:21-24; WavaHepeleu 11:5; WaYuta 14, 15) Chipwe ngocho, jivesi kana jasolola nge lunga kana apwile walufwelelo chikuma. Uno mweji kuzakamanga vaka-tanga yenu tahi? Kutala mwalipikaho lyehi naukalu wakumifumbukila mwomwo yavyuma vyakwoloka mwafwelela tahi? Nge mukiko, kaha namulinangula vyavivulu hali Enoke.

“ENOKE ATAMBUKILENGA LIKA NAKALUNGA WAMUCHANO”

Vatu valingilenga vyuma vyavipi mumakumbi aEnoke. Vatu kana vapwile vamuchisemunwino chakusokesa 7 kufuma hali Alama. Halwola luze, vatu vapwile kwakamwihi nakukupuka chize vapwile nacho vaAlama naEve numba vachijimbalise. Echi chikiko chalingishile vatu vayoye myaka yayivulu. Chipwe ngocho, vatu vapwile muponde yayinene kumujimba nakushipilitu. Uhwanga wavulile chikuma. Uhwanga kana waputukile muchisemunwino chamuchivali haze Kena ajihile ndumbwenyi Avele. Chasoloka nge mwana kena umwe apwile wakulivwimba nakupwa chihwanga wamunene kuhambakana naKena. Kuheta muchisemunwino chamuchitatu mwapwile cheka uhwanga ukwavo. Vatu vaputukile kusaula lijina lyaYehova. Vazachishile lijina lyaKalunga mujila yakasautu nakuhona kulivumbika.—Kuputuka 4:8, 23-26.

Chasoloka nge kwitava kanechi chamakuli chikiko chalisalile chikuma mumakumbi aEnoke. Omu Enoke apwile nakuya nakukola, atelele kusakula vyakulinga mukuyoya chenyi. Kutala mwasakula kukavangiza vyuma valingilenga vatu vavavulu mumakumbi enyi tahi? Nyi mwasakula kutondatonda Yehova Kalunga wamuchano uze atangile melu namavu? Atela alinangwile vyavivulu hali Avele uze vajihile mwomwo yakulemesa Kalunga mujila yize evwililile kuwaha. Enoke naikiye asakwile kulinga mwomumwe. Mukanda waKuputuka 5:22 watulweza ngwavo: ‘Enoke  atambukilenga lika naKalunga wamuchano.’ Mazu kana asolola nge Enoke ikiye kaha evwilenga Kalunga woma havatu vosena vapwilengako halwola luze. Ikiye kaha mutu watete vavuluka muMbimbiliya mujila kaneyi.

Vesi yoyimwe yamba nawa ngwayo, Enoke atambukilenga lika naYehova nomu alingile hanaseme lyehi mwanenyi walunga Metusela. Chasoloka nge Enoke apwile natanga halwola apwile namyaka yakusemuka kafwe 65. Apwile napwevo uze kavavuluka muVisonekako kaha nawa apwile “navana vamalunga navava vamapwevo” vaze kavavuluka kuvula chavoko. Kachi nge chisemi walunga ali nakutambuka naKalunga oku ali nakulela vana nakuvazakama kumujimba, kaha atela nawa kuvanangula vyuma vyaKalunga. Enoke atachikijile ngwenyi atelele lika kulipanjika napuwenyi ngana muze ajinyine Yehova. (Kuputuka 2:24) Kaha akilikichile chikuma hakunangula vana venyi jijila jaYehova Kalunga. Vyuma muka vyafuminemo?

Mbimbiliya kayasolola unjiho wauvulu hachuma kanako. Kayahanjika vyuma vimwe halufwelelo lwaMetusela mwana Enokeko, uze vavuluka muMbimbiliya ngwavo ayoyele myaka yayivulu chikuma swi nomu afwile mumwaka uze lyejile Livaji lyalinene lyamumakumbi aNowa. Kaha nawa Metusela asemene mwana walunga, lijina lyenyi ikiye Lameke. Lameke atwalileho lika kuyoya nomu kaka yenyi Enoke afwile. Kaha nawa apwilenga lika nalufwelelo lwakukola. Yehova amuhwiminyinyine ahanjike upolofweto wakutalisa kuli Nowa, mwana Lameke, kaha upolofweto kana wateselemo omu lyakumine Livaji. Ngana mwakakuluka yenyi Enoke, Nowa naikiye vamuvuluka muvisoneka ngwavo atambukilenga naKalunga. Nowa kamwene Enokeko. Oloze Enoke asezele uswana wamwaza chikuma. Atela Nowa atambwile uswana kana kuli ise Lameke, chipwe kuli kaka yenyi Metusela nyi pamo kuli Yalete ise yaEnoke uze afwile halwola Nowa apwile namyaka yakusemuka 366.—Kuputuka 5:25-29; 6:9; 9:1.

Achishinganyekenu hachihandwa chapwile hali Enoke naAlama. Alama apwile wakukupuka, oloze alingile shili kuli Yehova nakusela vana venyi uswana waupi uze wavalingisa valikange. Numba tuhu Enoke kapwile wakukupukako, oloze atambukilenga naKalunga nakusela vana venyi uswana wakupwa nalufwelelo. Alama afwile omu Enoke apwile namyaka yakusemuka 308. Kutala vaka-tanga yenyi vamulilile chikuma tahi? Katwatachikizako. Kala mweshomwo chapwile, Enoke “atambukilenga lika naKalunga wamuchano.”—Kuputuka 5:24.

Kachi nge mukwechi mulimo wakuzakama tanga yenu kumujimba, kaha shinganyekenu havyuma namulinangula kuli Enoke. Numba tuhu chapwa chachilemu kuzakama tanga yenu kumujimba, oloze kuvazakama kushipilitu chikiko chuma chachilemu chikuma. (WaChimoteu 1, 5:8) Munahase kutesamo chuma kana hakuchilinga keshi hakuchihanjika kahako. Kachi nge namusakula kutambuka naKalunga ngana mwaEnoke, nakwitavila jindongi jaKalunga jimitwaminyine mukuyoya chenu, kaha nayenu namukasela vana venu uswana wamwaza, wakulondezeza chakutalilaho chenu.

ENOKE “APOLOFWETELE HALI VAKIKO”

Enoke atela evwilenga uli hakuwana nge ikiye kaha apwilenga nalufwelelo mukaye kavatu vakuzeneka lufwelelo. Uno Yehova Kalunga amwene milimo akilikichile tahi? Eyo. Likumbi limwe Yehova ahanjikile nayou ngamba yenyi wakushishika. Kalunga ahanyine Enoke mulimo wakwambulula mujimbu kuvatu vamumakumbi enyi. Kulumbununa nge atongwele Enoke kupwa kapolofweto watete, uze akwechi mujimbu wenyi vasoneka muMbimbiliya. Twatachikiza chuma kana mwomwo Yuta ndumbu yaYesu,  vamuhwiminyinyine asoneke upofweto waEnoke hanyima yamakulukaji amyaka. *

Upolofweto muka ahanjikile Enoke? Upolofweto kana wamba ngwavo: “Ivwenu! Yehova ejile namayongomena avatu jenyi vajila nakusopesa vatu vosena, nakupayisa vaka-kuzamukila Kalunga havilinga vyavo vyosena vyakuzamukila Kalunga vize valingile mujila yakuzamukila Kalunga, nahavyuma vyakukomwesa vyavipi vyosena vize vaka-shili, vaka-kuzamukila Kalunga vahanjikile hali Kalunga.” (WaYuta 14, 15) Mwatela kwijiva ngwenu, Enoke ahanjikile kwijiva nge Kalunga hanatesamo lyehi mazu aupolofweto kana. Kahomu mukiko valingile nakuupolofweto ukwavo wakavangijileho. Chishina chiliho shina echi: Ou kapolofweto apwile nakuhanjika vyuma vyamuchano vize afwelelele ngwenyi navilingiwa, kahechi chikiko chamulingishile ahanjike kwijiva nge vinatesamo lyehi.—Isaya 46:10.

Enoke mwambulwila vaka-kuzamukila Kalunga mujimbu

Vilinga vyavatu vyapwilenga ngachilihi numba Enoke ambulule mujimbu kanou wakusopesa? Uno apwile nakwambulila vosena vaze vasakile kuwivwa tahi? Achitalenu mazu kana awa akuhuhumuna, mumazu kana vazachisa lizu lyakwamba ngwavo “vaka-kuzamukila Kalunga” mazu akusopesa vatu, navilinga vyavo, nomu valingilililengamo vyuma kana. Upolofweto kana wahuhumwine vatu vosena mangana vatachikize ngwavo kufuma vene hakulikanga chapwile muEtene, kaye kosena kazalile navilinga vyavipi. Kaye kosena navakakanongesa mukukasumuna omu Yehova mwakeza “namayongomena avatu jenyi vajila,” vangelo vangolo vaze navakalwa jita nakwenyeka kaye kosena. Enoke naikiye ambulwile mujimbu kanou ukawenyi chakuzeneka woma. Atela Lameke alikomokelelenga hakumonomu kaka yenyi azachilenga mulimo kana nakumika. Nge mukiko chapwile, kaha natwivwishisa ovyo chapwililile ngocho.

Lufwelelo apwile nalwo Enoke lwatela kutukafwa twijive numba nge twamona kaye tuli nakuyoyelamo nganomu akamona Kalunga. Mujimbu wakusopesa uze avilikile Enoke noholili kuuchili, kaha twatela kuwambulula. Ngana muze Enoke ahuhumwine vatu, Yehova anehele chikupu Livaji lyalinene nakunongesa kaye kavaka-kuzamukila Kalunga mumakumbi aNowa. Kunongesa kana chasolola kunongesa chachinene chize chili nakwiza kulutwe. (Mateu 24:38, 39; WaPetulu 2, 2:4-6) Makumbi ano nawa, Kalunga namayongomena avatu jenyi vajila vanalizange mangana vasopese mujila yakwoloka kaye kavaka-kumuzamukila. Tuvosena twatela kumona mazu akuhuhumuna avilikile Enoke kupwa amalemu nakufwila kulwezako vakwetu. Vaka-tanga yetu namasepa jetu vanahase kutuhunga nakutuseza. Kaha lwola lumwe tunahase kwivwa uli. Oloze Yehova kasezele Enokeko, kaha namakumbi ano nawa keshi kuseza vangamba jenyi vakushishikako.

“VAMUNUNGULWILE MANGANA AZENEKE KUMONA KUFWA”

Uno makumishilo akuyoya chaEnoke apwile ngachilihi? Jila afwilililemo Enoke yapwa yakulipwila kuhambakana vyuma vyasolokele mukuyoya chenyi. Mujimbu wamumukanda waKuputuka wamba ngwawo: “Enoke atambukilenga lika naKalunga wamuchano. Jino kavamumwene cheka kumutuko, mwomwo Kalunga amumbachile.” (Kuputuka 5:24) Mujila muka Kalunga ambachililemo Enoke? Kaposetolo Paulu alumbunwine ngwenyi: “Mwomwo yalufwelelo, Enoke vamunungulwile mangana azeneke kumona kufwa, kaha kavamuwanyine chekako, mwomwo Kalunga amunungulwile. Shimbu kanda vamunungulule, atambwile unjiho ngwavo evwishile Kalunga kuwaha.” (WavaHepeleu 11:5) Uno mazu akaposetolo Paulu akwamba ngwenyi “vamunungulwile mangana azeneke kumona kufwa” atalisa mulihi? JiMbimbiliya jimwe jamba ngwavo Kalunga atwalile Enoke mwilu. Oloze keshi mukikoko. Mwomwo Mbimbiliya yamba ngwayo, Yesu Kulishitu kaha ikiye watete kusangula nakuya mwilu.—Yowano 3:13.

 Kaha mujila muka jino Enoke “vamunungulwile” mangana azeneke “kumona kufwa”? Yehova ikiye anungulwile kuyoya chaEnoke nakuchineha kukufwa kuchina navakamujiha mujila yaukenya kuli vaka-kole jenyi. Chakavanga, Enoke atambwile “unjiho ngwavo evwishile Kalunga kuwaha.” Mujila muka? Shimbu kanda afwenga, Enoke atela vamumwenesele chuma chakumwenesa kuli Kalunga pamo chize chasolwele kaye kosena kupwa palachise. Omu vakumishile kumumwenesa chinjikizo chakusolola nge Yehova namwitavila, Enoke asavalile jino tulo twakufwa. Kaposetolo Paulu asonekele kutalisa kuli Enoke nakumalunga namapwevo veka vakushishika ngwenyi: “Vosena ava vafwile nalufwelelo lwavo.” (WavaHepeleu 11:13) Kufumaho, vaka-kole vaputukile kutondatonda mujimba wenyi, oloze ‘kavauwanyineko,’ atela Yehova auswekele mangana vazeneke kuuzachisa kukukundwiza kulemesa chamakuli. *

Nganomu vanasolola muli evi Visoneka, twesekenu jino kushinganyeka omu chakumine kuyoya chaEnoke. Achishinganyekenu hachuma chino. Enoke vapwile nakumuhangasana, kaha apwile nakuzeyelako lika. Vaka-kumuyanjisa valingile hanga chivamununga, oku vanachimbilila namatoto mwomwo yamujimbu wakusopesa uze avambulilile. Enoke awanyine chihela chakuswama hakatando kakandende, oloze ejivile chikupu ngwenyi keshi kuhasa kuchina nakuya kwakusukuko. Vapwile jino hakamwihi nakumujiha mujila yaukenya. Omu apwile nakuhwima, alombele kuli Kalunga kenyi. Kaha kuunda chejile hali ikiye. Kaha kwasolokele chakumwenesa chimwe, kwijiva nge Enoke ali lyehi kuchihela kana.

Atela vapwile nakusaka kujiha Enoke mujila yaukenya omu Yehova amumbachile

Achishinganyekenu Enoke ali nakumona kaye kaze kalihandunwine chikuma nakaze atachikijile. Kuli ikiye chasolokele kwijiva nge ali nakumona litepa lyaEtene, oloze kamwapwile vakeluve nakulama kuchina vatu navengilamoko. Malunga namapwevo vosena amwene vapwile vakulikangula kumijimba kaha nawa vosena hivakweze. Vosena vapwile mukuunda. Kamwenemo chijindo chipwe luyanjisa kutalisa kukwitavako, vyuma vize atachikijile kanawa. Chikupu vene, Enoke amwene ngwenyi Kalunga namwitavila kaha nawa amuzanga. Atachikijile ngwenyi chihela kana chikiko mwakatwamamo nakupwa limbo lyenyi. Omu kuunda chapwile nakutohwelako, Enoke afwikile hameso nakusavala tulo twakufwa.

Kaha noholyapwa hanga asavalila tulo twakufwa oku nawa hanga apwila muvishinganyeka vyaYehova Kalunga. Ngana muze ashikile Yesu, nakukeza lwola omu vosena vaze vali muvishinganyeka vyaKalunga navakevwa lizu lyaKulishitu nakulovoka muvimbumbe, nakukamona lifuchi lyalihya lyamwaza lyakuunda.—Yowano 5:28, 29.

Kutala nayenu muli nakufwila kukatwama mulifuchi kana tahi? Achishinganyekenu omu namukevwa hakuliwana naEnoke. Shinganyekenu nawa havyuma vyamwaza natukalinangula kuli ikiye. Mwakatulweza kanawa numba nge vyuma twashinganyekele kutalisa kukuyoya chenyi chamakumishilo vyapandama kuvyuma amwene. Oloze kuli vyuma vikwavo vyavilemu twatela kulinangula kuli ikiye oholyapwa vene ngana. Omu Paulu akumishile kushimutwila hali Enoke atwalileho lika nakwamba ngwenyi: “Chakuzeneka lufwelelo, chachikalu kumwivwisa Kalunga kuwaha.” (WavaHepeleu 11:6) Ocho kuwaha kana enu vayaya kachi nge tuvosena natulondezeza Enoke uze apwile nalufwelelo lwakukola!

^ par. 14 Vatu vamwe vaze valinangula chikuma Mbimbiliya vamba ngwavo Yuta anungulwile mazu kufuma mumukanda vavuluka ngwavo Mukanda waEnoke, oloze mukanda kana kawasolola owo ausonekeleko kaha nawa wahanjika vyuma vyamakuli hali Enoke. Mumukanda kana mwatwama upolofweto wakwoloka waEnoke, oloze atela vaufumishile mumikanda yakushikulu yize katweshi nayo makumbi anoko. Atela wapwile mukanda chipwe pamo valingile vyakuvalweza kuvatu. Ngocho Yuta atela azachishile unjiho wakwoloka wakushikulu, chipwe pamo alinangwile vyaEnoke kuli Yesu, uze atachikijile kanawa Enoke shimbu apwile mwilu.

^ par. 20 Chochimwe nawa, Kalunga atela amwene ngwenyi mujimba waMose nou waYesu kavatelelele kuuzachisa mujila kaneyi yakuhengako.—Lushimbi lwamuchivali 34:5, 6; Luka 24:3-6; WaYuta 9.