Uno chikupu vaYuleya “vafumine kumafuchi osena” nakuya kuYelusalema haPendekoseta 33 C.E. tahi?

Vatu vali mumukwakwa wamuYelusalema haPendekoseta 33 C.E.

Nganomu yahanjika Mbimbiliya hali Vilinga 2:5-11, namuka-kusoneka wakaYuleya Philo asonekele mujimbu umwe wakuvuluka liyongomena lyavatu vaze vayile kuYelusalema haPendekoseta 33 C.E.

Philo asonekele kutalisa kuvatu vaze vayile kuYelusalema ngwenyi: “Mayevuyevu avaYuleya vakufuma kujinganda jajivulu vayilenga kuchiwanyino hichiwanyino, vamwe vahichilenga mupambo, vakwavo mutulungalwiji. Vatu kana vafumine kumututuko nakumulauko nakunote nakusulo.” Anungulwile nawa mazu apwile mumukanda uze Angalipa I, muzukulu lyaHelote Wamunene atuminyine Mwangana wavaLoma Caligula. Mumukanda kana Angalipa asonekele kutalisa kuYelusalema ngwenyi: “Eyi Nganda Yajila . . . kayapwa nganda yalifuchi lyavaYuta kahako, oloze namafuchi eka apwile kwakamwihi aze vayulilenga.”

Angalipa asonekele jingalila jize vayulilenga kuli vaYuleya kuhakilako navihela vyakwakusuku vyakufwana nge Mesopotamya, nakunote yaAfrica, naAja, naHelase, namatungu akukalungalwiji Mendetelenya. Mutu alinangula chikuma Joachim Jeremias ambile ngwenyi, “Numba tuhu eji jingalila kajalumbununa kanawa maungeji avatu akuyanga kuYelusalemako, oloze katweshi kuhasa kuhuhwasana hamujimbu kanako mwomwo lwapwile hilushimbi kuli vaYuleya vakukola vosena kuya kuviwanyino kana.”—Lushimbi lwamuchivali 16:16.

Uno mayevuyevu avaYuleya vaze vayilenga kuviwanyino muYelusalema vatwaminenga kulihi?

Malala achijiva chakujila chakusanyina chize vawanyine muYelusalema

Mwaka himwaka vaYuleya valingilenga viwanyino vitatu muYelusalema. Viwanyino kana vyapwile Paseka, naPendekoseta naChiwanyino chaVisakila. Mulikulukaji lyamyaka lyakulivanga, mayevuyevu avaYuleya vaze vafumine kumafuchi osena vayilenga kuYelusalema kuviwanyino kana. (Luka 2:41, 42; Vilinga 2:1, 5-11) Ngocho ava vatu vosena vatelele kuwana kwakutwama.

Vatu vamwe vasavalilenga kuli masepa javo, kaha veka vasavalilenga mujizuvo jakufwetela. Kaha vavavulu vasavalilenga mujimbalaka, kaha veka vasavalilenga kujikembwe janganda kana. Omu Yesu asalile muYelusalema halikumbi lyamakumishilo lyachiwanyino, ayile nakusavalila munganda yaMbetane yize yapwile kwakamwihi naYelusalema.Mateu 21:17.

Vaka-kuvumbwojola vyakushikulu vawanyine jizuvo jimwe jize japwile najimbashiya jakusanyina jajivulu kwakamwihi natembele. Vashinganyekele ngwavo eji jizuvo atela jikiko vatwaminenga ava vatu nakusanyina shimbu kanda vengile mutembele. Muzuvo yimwe vasonekelemo mazu akusolola nge Theodotus uze apwile kapilishitu kaha nawa twamina wamusunangonga, “atungile sunangonga mangana vatangilengamo Tola . . . kaha atungile zuvo yayinene yize yapwile natupete vavavulu, namipayipi yameya mangana vangeji vakukalikiza vatwamemo.”