Chihula kana munahase kuchikumbulula ngachilihi? Vatu vavavulu vashinganyeka ngwavo Kalunga etavisa kulwa jita. Vamba ngwavo kushikulu Kalunga alwezelenga vaka-kumulemesa vamwe valwenga jita, kaha muMbimbiliya mwatwama unjiho wauvulu. Oloze veka vamba ngwavo Yesu MwanaKalunga anangwile vaka-kumukavangiza vazangenga vaka-kole javo. (Mateu 5:43, 44) Ngocho vamona ngwavo vishinganyeka vyaKalunga kutalisa kukulwa jita vyalumuka, kaha makumbi ano ketavisa kulwa jitako.

Nyi yenu mwashinganyeka ngachilihi? Uno Kalunga etavisa kulwa jita tahi? Nge mukiko, kaha eji kupwanga kusali yeya nge vatu vali nakulwa jita? Kuwana muvakumbulwila vihula kana nachimikafwa mukekese vishinganyeka vyenu hachihande chakulwa jita. Chakutalilaho, namwivwa ngachilihi nge munatachikiza ngwenu Kalunga etavisa kulwa jita kaha nawa ali kusali yavaka-kulwa jita vaze muli nakukundwiza nayenu? Namuwahilila chikuma nakufwelela ngwenu vaka-kole jenu namuvafungulula. Nyi ngachilihi nge munatachikiza ngwenu Kalunga ali kusali yavaka-kole jenu? Namwivwa kupihya chikuma.

Kutachikiza omu Kalunga amona kulwa jita chapwa chachilemu chikuma mwomwo nachimikafwa mwijive omwo apwa. Kachi nge muli nakuyanda mwomwo yajijita, kaha tunafwelela ngwetu namufwila kutachikiza muvakumbulwila chihula chino, Kutala Kalunga apwa kakulunganyi uze etavisa jijita nakujikundwiza mangana vatu vayande tahi, nyi apwa mutu wakaliu uze kazakama vaze vali nakuyandako?

Munahase kulikomokela hakutachikiza ngwenu vyuma yakumbulula Mbimbiliya hachihande kana vyalihandununa chikuma navyuma vashinganyeka vatu. Kufuma vene kushikulu nakuheta oholili, Kalunga amona kulwa jita mujila yoyimwe. Tutalenu jino vyuma yahanjika Mbimbiliya kutalisa kujila amwenenenemo kulwa jita kushikulu, namulikulukaji lyamyaka lyakulivanga omu Yesu apwile hano hamavu. Echi nachitukafwa tutachikize omu Kalunga amona kulwa jita makumbi ano, nakwijiva nawa numba nge vatu navakalwanga lika jita kulutwe.